2 Kings 22

Guarani 2015 (Ñanderuete Ñe’ẽ Porã 2015)

← Chapter 21 Jump to: Chapter 23 →

1Josías oñepyrũvo oisãmbyhy oguereko 8 áño, ha’e oisãmbyhy Jerusalénpe 31 áño. Isy réra Jedida, Adaia rajy, peteĩ Boscatgua.

2Ha ojapo iporãva Ñanderuete resa renondépe, ha oiko opaite ijypykue David rape rehe, oñemboyke’ỹ rehe akatúa gotýo ni asu gotýo.

3Tetã ruvicha Josías ombotývo 18 áño, tetã ruvicha omondo Safan, Azalías ra’y, Mesulam ra’yre, kuatiahaihára, Ñanderuete rogaguasúpe, he’ívo ichupe:

4Tereho pa’iguasu Hilcías rendápe, ha ere ichupe tombyaty umi pirapire ojereruva’ekue Ñanderuete rogaguasúpe, umi okẽ ñangarekohára oñongatuva’ekue tetãyguakuéragui,

5ha tome’ẽ umi omba’apóvape ko ogaguasu rehe, umi omoakãvape Ñanderuete rogaguasu ñemyatyrõme, omyatyrõuka jevy hag̃ua Ñanderuete rogaguasu oñembyaihápe;

6ha umi yvyra mba’apohárape, ojogua hag̃ua yvyra ha ita mba’apopyréva omyatyrõ hag̃ua Ñanderuete rogaguasu;

7ha ani oñeporandu ichupekuéra mboy pirapirépa oiporúra’e ha mba’éichapa oiporúra’e, ha’ekuéra ojapopágui py’a porãgui.

8Upéramo pa’iguasu Hilcías he’i pe kuatiahaihára Safánpe: Ajohúkuri pe kuatiañe’ẽ tembiapoukapy reheguáva Ñanderuete rogaguasúpe. Ha Hilcías ome’ẽ pe kuatiañe’ẽ Safánpe, ha ha’e omoñe’ẽ.

9Upéi ou pe kuatiahaihára Safan tetã ruvicha rendápe, omba’emombe’u hag̃ua tetã ruvichápe, ha he’i ichupe: Ne rembiguaikuéra ome’ẽ pe pirapire oñeñongatuva’ekue Ñanderuete rogaguasúpe umi óga rehe omba’apóvape ha umi omoakãvape Ñanderuete rogaguasu ñemyatyrõ rembiapo.

10Pe kuatiahaihára Safan omombe’u avei tetã ruvichápe, he’ívo: Upépe pa’i Hilcías ojohu peteĩ kuatiañe’ẽ ha ome’ẽ chéve. Ha Safan omoñe’ẽ tetã ruvicha renondépe.

11Ha tetã ruvicha ohendúvo pe kuatiañe’ẽ tembiapoukapy rehegua omondoro ijao,

12ha he’i pa’i Hilcíaspe, Ahicámpe, Safan ra’y; Acbórpe, Miquéas ra’y; kuatiahaihára Safánpe, ha Asaíape, tetã ruvicha rembiguaiguasukuéra, péicha:

13Tapeho ha peporandu cherehe Ñanderuetépe, tetãyguakuéra rehe ha avei opaite Judaygua rehe. Ñanderuete pochy hendyhína ñanderehe, ñande rukuéra nohendúi ha ndojapói haguére Ñanderuete rembiapoukapy he’i háicha ikuatiañe’ẽme.

14Upéramo pa’i Hilcías, Ahicam, Acbor, Safan ha Asaía, oho pe profetísa Húlda rendápe, péva Salum rembireko, Ticva ra’y, Harhas ra’yre, ha’e oñangareko pa’ikuéra ao rehe, ojeporúva Ñanderuete rógape, péva oiko Jerusalénpe, peteĩ óga oñemopu’ãramóvape, ha oñe’ẽ hikuái Húlda ndive.

15Ha Húlda he’i ichupekuéra, péicha he’i Ñanderuete, Israel Jára: Ere pe kuimba’e penembouva’ekuépe che rendápe:

16Péicha he’íkuri Ñanderuete: Péina ápe Che agueru ko távape, ha ipype oikóva guive ári, opaite mba’evai he’íva guive pe kuatiañe’ẽme omoñe’ẽva’ekue Juda retã ruvicha renondépe.

17Ha’ekuéra opoi haguére chehegui, ha ohapy mba’e ryakuã porãva ambue jarakuérape, chembopochy hag̃ua ipo rembiapo vai rupi; che pochy hendýma ko yvy pehẽngue kóva rehe ha ndoguemo’ãi.

18Ha Juda retã ruvicha penembouva’ekue che rendápe omba’eporandu hag̃ua chéve, ichupe pejéta, péicha he’i Ñanderuete, Israel Jára: Rehendúgui pe kuatiañe’ẽ he’íva,

19reñembyasy ha reñemomirĩgui pende Ruete renondépe, rehendúvo pe maldición che ha’emava’ekue Jerusalén ha Jerusalenguakuéra rehe, remondorógui nde ao, rejahe’ógui che renondépe, upévare Che rohendúma, he’i pende Ruete.

20Pévarupi Che rogueraháta nde rukuéra ndive, ha rejegueraháta reñeñotỹ hag̃ua py’aguapýpe, ha nde resa ndohechamo’ãi ambotapere ramo ko táva kóvape. Upéi oho hikuái omombe’u hag̃ua tetã ruvichápe pe oje’eukáva guive ichupe.

← Chapter 21 Jump to: Chapter 23 →