2 Kings 9

Guarani 2015 (Ñanderuete Ñe’ẽ Porã 2015)

← Chapter 8 Jump to: Chapter 10 →

1Upéramo pe proféta Eliséo ohenói peteĩ proféta remimbo’épe, ha he’i ichupe: Ejeku’a jokua ha eraha ko acéite ryru nde pópe, ha tereho Ramot, Galaad peguápe.

2Reg̃uahẽvo upépe rehecháta Jehu, Josafat ra’y, Nimsi reminenóme; ha reikévo, eguenohẽ ichupe ityke’yrakuéra apytégui, ha egueraha ichupe peteĩ kotýpe.

3Upéi ejapyhy pe acéite ryru, ha eñohẽ iñakã rehe, ha upévo eréta: Péicha he’iuka Ñanderuete: Che romona acéite reheve Israel retã ruvicha ramo. Ha reipe’ávo pe okẽ, eñani upégui, ha aníke reha’ãrõtei.

4Ha pe mitãrusu, pe proféta remimbo’e, oho Ramot, Galaad peguápe.

5Ha’e og̃uahẽvo umi soldádo ruvichakuéra oguapy joáma pe ógape, ha ha’e he’i: Mburuvicha, añe’ẽse nendive. Jehu he’i: Máva ndivépa. Ha ha’e he’i: Nendive voi, che ruvicha.

6Ha ha’e opu’ã, ha oike hendive peteĩ kotýpe, upérõ pe proféta remimbo’e oñohẽ pe acéite iñakã ári, ha he’i ichupe: Péicha he’i Ñanderuete, Israel Jára: Che romona acéite reheve Israel retã ruvicha ramo.

7Reikutúta opaite nde jára Acab rogayguápe, Che añevenga hag̃ua che rembiguái profetakuéra ruguykue rehe, opaite ambue che rembiguái ruguykue rehe, Jezabel po oñohẽmava’ekue.

8Ha oñehundíta opaite Acab rogaygua, ha ahundíta Acab rógagui opaite kuimba’e tembiguáiva térã tembiguai’ỹva Israel retẽme.

9Ha Che añemoĩta Acab rogaygua rehe, ku Jeroboam, Nebat ra’y rógaicha, ha Baasa, Ahias ra’y rogayguáicha, oñemoĩmba haguére hikuái avei cherehe.

10Ha jaguakuéra ho’úta Jezabélpe Jizreel ñúme, ha ndaiporimo’ãi avave oñotỹtava ichupe. Upéi ha’e oipe’a pya’e pe okẽ, ha oñani tape rehe.

11Upéi osẽ Jehu ijára rembiguaikuéra rendápe, ha he’i hikuái ichupe: Oĩpa py’aguapy. Mba’upéiko ou ne rendápe, pe mba’e tarova. Ha ha’e he’i ichupekuéra: Peẽ peikuaa voi pe kuimba’épe ha iñe’ẽ avei.

12Ha’ekuéra katu he’i: Japu, emombe’u porãna oréve ko’ág̃a voi. Ha ha’e omombe’u ichupekuéra: Péicha he’i Ñanderuete: Che romona acéite reheve Israel retã ruvicha ramo.

13Upéramo pya’e pya’e peteĩteĩva ojapyhy ijahoja ha omoĩ Jehu py guýpe, ha ombopu turu, ha he’i hikuái: Jehu oikóma tetã ruvicha ramo.

14Péicha Jehu, Josafat ra’y, Nimsi remineno, opu’ã Joram rehe. Upejave Joram oĩhína Ramot, Galaádpe, opaite Israelgua ndive oñorãirõ Hazael, Síria retã ruvicha ndive;

15upégui tetã ruvicha Joram ou jevýma Jizreélpe oñepohãno hag̃ua ijekutukuégui, ha’e oñorãirõ ramoguare Hazael, Síria retã ruvicha ndive. Ha Jehu he’i: Oime ramo peẽ peipota avei, aníke avave oñanítei ko távagui, omba’emombe’u hag̃ua Jizreélpe.

16Upéramo Jehu voi ojupi henda ári ha oho Jizreélpe, upépe opyta Joram, hasýgui ha’e. Upépe oĩ avei Ocozías, Juda retã ruvicha, oguejyva’ekue oñandu hag̃ua Jorámpe.

17Ha pe soldádo oma’ẽva pe óga ijyvatevehágui Jizreel rehe, ohecha Jehu soldadokuéra ouvahína, ha he’i: Ahecha peteĩ soldádo aty oúva. Ha Joram he’i: Ere peteĩ kavaju ariguápe toho hendapekuéra, oporandu hag̃ua: Oĩpa py’aguapy.

18Ha oho peteĩ kavaju arigua oikuaa porã hag̃ua, ha he’i: Tetã ruvicha péicha he’i: Rejúpa py’aguapy reheve. Ha Jehu he’i ichupe: Ani rejepy’apy péva rehe. Eñemoĩ katu che rapykuéri. Ha pe soldádo oĩva pe óga ijyvatevehápe omba’emombe’u jevy Jorámpe ha he’i: Pe soldádo oñemondova’ekue og̃uahẽ Jehu rendápe ndouvéi katu.

19Upévagui oñemondo jevy ambue kavaju ariguápe, ha péva og̃uahẽvo Jehu rendápe he’i jevy: Tetã ruvicha oporanduka: Rejúpa py’aguapy reheve. Ha Jehu he’i jevy: Anítei rejepy’apy péva rehe. Eñemoĩ katu che rapykuéri.

20Pe soldádo pe óga yvatégui oma’ẽva he’i jevy hetã ruvichápe: Kóa og̃uahẽ avei hendapekuéra ha ndouvéi; ha pe ouvahína ojoguaiterei Jehu, Nimsi remineno guatápe, oúgui hatãiterei.

21Upémaramo Joram he’i: Pejokua che kavajukuéra che cárrore. Ha oñembosako’ipa rire Joram, Israel retã ruvicha, ha Ocozías, Juda retã ruvicha, peteĩteĩ icárrope osẽ ojejohu hag̃ua Jehu ndive, ha ojohu ichupe Nabot, Jizreelgua yvýpe (lótepe).

22Joram ohechávo Jehúpe he’i ichupe: Jehu, rejúpa py’aguapy ha jekupyty porã reheve. Ha Jehu ombohovái: Mba’éichagua py’aguapy piko oĩta, nde sy oiko ramo teko vaieta ha paje apópe.

23Upémaramo Joram ombojere ikavajukuéra, ha okañývo he’i Ocozíaspe: Jehu oñemopu’ãma cherehe, cháke O-cozías.

24Jehu katu oipyso iguyrapa ha ojapi ichupe ijatukupéguio ipaléta pa’ũme; ha pe hu’y ohasa icorazon rupi, ha Joram ho’a icárrope.

25Upéi Jehu he’i Bidcárpe, isoldádo ruvichápe: Ejapyhy ichupe ha emombo ichupe Nabot, Jizreel pegua lótepe. Nemandu’ápa jaha ramoguare umi tapicha apytépe itúva Acab ndive, ha Ñanderuete he’i ramoguare ko ñe’ẽ kóva hese:

26Kuehe ára ahecha haguéicha Nabot ruguy ha ita’yrakuéra ruguy, he’i Ñanderuete: Avengáta ndéve ko lóte kóva rehe. Ejapyhy ko’ág̃a hetekue, ha emombo Nabot lótepe, Ñanderuete he’i haguéicha.

27Ohechávo ko’ã mba’e, Ocozías, Juda retã ruvicha, okañy avei pe tape ohóva Bet-hagan gotýo. Ha Jehu oho hapykuéri, he’ívo: Pejapi avei kóvape icárrope. Ha ojapi ichupe hikuái Gúrpe ojejupihápe, Ibleam ypýpe. Ha Ocozías okañy ohóvo Megído peve, ha upépe omano.

28Ha hembiguaikuéra ogueraha ichupe cárrope Jerusalénpe, ha upépe oñotỹ hikuái ichupe ityvýpe, ituvakuéra ndive, David távape.

29Ocozías oñepyrũ oisãmbyhy Juda retãme, Joram, Acab ra’y, oisãmbyhýma ramoguare 11 áño tetã ruvicha ramo.

30Ha Jehu og̃uahẽ Jizreélpe; ha Jezabel oikuaávo, oñembohesa kuarahy’ã para ha ombojeguaka iñakã, ha oñemyakãsẽ peteĩ hovetã rupi.

31Ha Jehu oikévo táva rokẽ rupi, Jezabel he’i ichupe: Osẽ porãmbapára’e Zimrípe, ojuka ramoguare ijárape.

32Ha Jehu oma’ẽvo hovetã gotýo, he’i: Mávapa oĩ chendive. Máva piko. Ha ojayvy mokõi térã mbohapy hembiguái ha oma’ẽ hese.

33Ha ha’e he’i ichupekuéra: Peity ichupe yvýpe. Ha ha’ekuéra oity ichupe; ha huguy ohypýi pe tápia ha kavajukuéra rehe; ha Jehu, iñirũnguéra ndive ohasa hi’ári.

34Upéi ha’e oike okaru ha hoy’u hag̃ua, ha hyg̃uatãmba rire he’i: Tapeho pema’ẽ pe kuña añaitéva rehe, ha peñotỹ ichupe, tetã ruvicha rajy ningo avei.

35Ha oho hikuái oñotỹ hag̃uáicha, ndojohuvéima katu hese, ikanguekuémante, ha ipykue ha ipo pytekuerakuémante.

36Ha ou jevy hikuái, ha omombe’u ichupe. Ha Jehu he’i: Kóa voi ningo Ñanderuete he’imava’ekue Elías, pe Tisbegua juru rupi, he’ívo: Jizreel lótepe jaguakuéra ho’uva’erã Jezabel ro’o.

37Ha Jezabel retekue oñemombóta mymba repotícha Jizreel rape rehe, ikatuve’ỹ hag̃uáicha avave he’i, kóa ningo Jezabel retekue.

← Chapter 8 Jump to: Chapter 10 →