2 Kings 8

Guarani 2015 (Ñanderuete Ñe’ẽ Porã 2015)

← Chapter 7 Jump to: Chapter 9 →

1Eliséo oñe’ẽ pe kuñakarai ndive, imembýpe ha’e omoingove jevyva’ekuépe, ha he’i ichupe: Epu’ã ha tereho nde ha opaite nde rogayguakuéra mamo ikatuhápe; Ñanderuete omboútagui ñembyahýi ipohýiva ko tetãme 7 áño pukukue.

2Upéramo pe kuñakarai opu’ã ha ojapopa Ñanderuete rembiguái he’i haguéicha ichupe; ha ha’e oho hogayguakuéra reheve Filisteaygua retãme 7 áño pukukue.

3Ha ohasa rire umi 7 áño, pe kuñakarai ou jevy Filisteayguakuéra retãgui; upéi oho tetã ruvicha rendápe ha ojerure asy oñeme’ẽ jevy hag̃ua ichupe hóga ha ijyvy (imba’éva voi).

4Ha tetã ruvicha oñe’ẽ jave hína Gejazi ndive, Eliséo rembiguái, he’i ichupe: Ajerure ndéve emombe’úna chéve Eliséo rembiapokue techapyrãva.

5Ha ha’e omombe’u jave hína tetã ruvichápe mba’éichapa omoingove jevy peteĩ omanomava’ekuépe, péina ápe pe kuñakarai, máva memby ha’e omoingove jevyva’ekue, og̃uahẽ hendápe ojerurévo tetã ruvichápe oñeme’ẽ jevy hag̃ua ichupe hóga ha ijyvy. Upémaramo Gejazi he’i: Tetã ruvicha, che jára, kóa ha’e pe kuñakarai ha kóa ningo imemby, Eliséo omoingove jevyva’ekue.

6Ha tetã ruvicha oporandu pe kuñakaraípe, ha ha’e omombe’upa ichupe. Upéramo tetã ruvicha he’i peteĩ soldádo ruvichápe: Eme’ẽukapaite jevy ichupe opaite imba’éva guive, ha opaite ikoga’akue ohejaha ára guive ko tetãme ko ára kóva peve.

7Upéi Eliséo ou Damáscope; ha Benadad, Síria retã ruvicha, hasyetehína ha oñemombe’u ichupe: Ñanderuete rembiguái og̃uahẽma ne rendápe.

8Ha tetã ruvicha he’i Hazaélpe: Eraha nendive jopoikuéra, ha tereho ejejohu Ñanderuete rembiguái ndive, ha emba’eporandu ha’érupi Ñanderuetépe, akuerátapa ko mba’asy kóvagui.

9Ha Hazael ojapyhy ipópe heta jopói umi Damásco mba’erepyeta apytégui, ohupipa 40 caméllo ape ári ha oho ojojohu hag̃ua Eliséo ndive, ha og̃uahẽvo oñemoĩ henondépe, ha he’i: Nde ra’y Benadad, Síria retã ruvicha, chembou ne rendápe, he’ívo: Akuerátapa ko mba’asy kóvagui térãpa mba’e.

10Ha Eliséo he’i ichupe: Tereho ere ichupe: Añetehápe rekuerava’erãmo’ã ko mba’asýgui, upeichavéramo jepe Ñanderuete ohechauka chéve ha’e omanotaha katuete.

11Ha Ñanderuete rembiguái oma’ẽ porã hese, ombohova pytãmba peve, ha upéi ojahe’o.

12Upéramo Hazael he’i ichupe: Mba’érehe piko nerasẽ, che jára. Ha ha’e he’i: Ahechágui umi mba’evai nde rejapótava Israel ñemoñarenguéra rehe; rehapýta itáva oñemongorapyréva, imitãrusukuérape rejukáta kyse pukúpe, imitãkuéra reipetepáta yvy rehe, ha rembovopáta kuña hyeguasúva rye.

13Ha Hazael he’i: Ha mba’e apoha piko ko ne rembiguái, che peteĩ jaguánte, ajapo hag̃ua ko’ã mba’evaietéva. Ha Eliséo he’i jevy: Ñanderuete ohechaukáma chéve ndetaha Síria retã ruvicharãha.

14Ha Hazael oho, ha oike ijára rendápe, oporandúva ichupe: Mba’éiko he’i ndéve Eliséo. Ha ha’e ombohovái ichupe: He’i chéve katuete rekuerataha.

15Ha ambue ára ko’ẽvo, ojapyhy peteĩ ahoja ha omoinge ýpe, ha omoĩ Benadad rova ári, omano hag̃ua; upéi Hazael oisãmbyhy hendaguépe.

16Joram, Acab ra’y, oisãmbyhy ramo Israel retãme 5 áño, Joram, oñepyrũ avei oisãmbyhy Juda retãme, itúva Josafat rendaguépe.

17Ha’e oguereko 32 áño oñepyrũ ramo oisãmbyhy Jerusalénpe ha oiko 8 áño Juda retã ruvicha ramo.

18Ha oiko umi Israel retã ruvicha rape rehe, ojapo opaite mba’evai Ñanderuete resa rendondépe Acab rogayguakuéraicha; Acab rajy voi ningo hembireko.

19Upeichavéramo jepe Ñanderuete nohundiséi Judápe, hembiguái David rayhupápe, he’iva’ekuégui ome’ẽtaha ichupe opaite árape tesapeha rendy ichupe ha ita’yrakuérape.

20Hi’árape Edom retã opu’ã Juda rehe ha ojei ipoguýgui, ha omoĩ jevy hikuái hi’ári peteĩ tetã ruvicha.

21Joram upeaja ohasa Zaírpe opaite iñorãirõ cárro reheve; ha opu’ã pyhare ojeity hag̃uáicha Edomgua ári, ha’ekuéra katu omongora ichupe, icárro ruvichakuéra reheve; ha Israelguakuéra okañymba hóga tymba pirekueguiguápe.

22Upéicha Edom ojei Juda poguýgui ko ára kóva peve. Upejave avei opu’ã hese Libna.

23Ambue Joram rembiapokue ha opaite mba’e ojapova’ekue ojehai Juda retã ruvicha rembiapokue kuatiañe’ẽme.

24Ha Joram omano rire, oñeñotỹ ichupe David távape; ha ita’ýra Ocozías oisãmbyhy hendaguépe.

25Israel retã ruvicha Joram, Acab ra’y, oisãmbyhývo 7 áño; Ocozías, Juda retã ruvicha, Joram ra’y oñepyrũ oisãmbyhy Juda retãme.

26Ocozías oguereko 22 áño oñepyrũ ramo oisãmbyhy Jerusalénpe, peteĩ áñonte oiko Juda retã ruvicha ramo. Isy réra Atalía, Omri, Israel retã ruvicha rajy.

27Oiko Acab rogaygua rape rehe, ha ojapo mba’e ivaíva Ñanderuete resa renondépe, Acab rogayguakueraichaite; ha’e ningo Acab rajy ména voi.

28Ha Ocozías oho Joram, Acab ra’y ndive, Ramot, Galaad peguápe, ojeity hag̃ua Hazael, Síria retã ruvicha ári; umi Siriaygua katu ojapi hu’ýpe Jorámpe.

29Ha tetã ruvicha Joram ou Jizreélpe oñepohãno hag̃ua, umi Siriaygua ojapi haguégui ichupe Ramot rovái, oñorãirõ ramoguare Hazael, Síria retã ruvicha ndive. Ha Ocozías, Juda retã ruvicha, Joram ra’y, ou oñandu Joram, Acab ra’ýpe, Jizreélpe.

← Chapter 7 Jump to: Chapter 9 →