2 Kings 16

Guarani 2015 (Ñanderuete Ñe’ẽ Porã 2015)

← Chapter 15 Jump to: Chapter 17 →

1Peka, Remalías ra’y, oisãmbyhývo 17 áño; Acaz, Jotam ra’y, oñepyrũ oisãmbyhy Juda retãme.

2Acaz oñepyrũ ramoguare oisãmbyhy oguereko 20 áño, ha oisãmbyhy Jerusalénpe 16 áño; ha’e ndojapói iporãva Ñanderuete resa renondépe, itúva David ojapo haguéicha.

3Oikónte uvei umi Israel retã ruvichakuéra rape vai rehe, ha ohapyuka avei ita’ýrape kuave’ẽmby ramo, umi tembiapo ahẽ ojapo haguéicha umi tetã Ñanderuete ohundiva’ekue ha omosẽva’ekuépe Israel ñemoñarenguéra renonderãgui.

4Upéicha avei oikuave’ẽ ha ohapy mba’e ryakuã porã umi yvy yvatehápe, ha umi cérro yke rupi, ha yvyraguasu ikuarahy’ã porãva guýpe.

5Upéramo Rezin, Síria retã ruvicha, ha Peka, Remalías ra’y, Israel retã ruvicha, ojupi hikuái Jerusalen peve ondyry ha omongora hag̃ua Acázpe; ha ndaikatúi omoĩ hikuái ichupe ipoguýpe.

6Umi ára umívape Rezin, Siria retã ruvicha, oipe’a Judayguakuéragui pe táva Elat, ha omosẽ Judayguakuérape upégui. Upéi Edom ruvicha katu ou Elátpe ha oiko ipype hikuái ko ára kóva peve.

7Upémaramo Acaz omondo ñe’ẽ rerahahára Tiglat-pileser, Asíria retã ruvicha rendápe, he’iukávo ichupe: Che ningo ne rembiguái ha nde ra’y, ejupi ha chepe’a Síria ha Israel retã ruvichakuéra pógui, opu’ãva cherehe.

8Ha Acaz ojapyhy pe pláta ha pe óro oĩva Ñanderuete rogaguasu ha tetã ruvicha rógape, ha oguerahauka Asíria retã ruvichápe jopói ramo.

9Upérõ Asíria retã ruvicha ojapo iñe’ẽ; ha’e ou ojeity hag̃ua Damásco ári, ha omoĩ ipoguýpe, ogueraha tembiguai-kuéra Asíria retãme, Kir yvýpe, ha ojuka Rezínpe.

10Upéi tetã ruvicha Acaz oho Damáscope, Asíria retã ruvicha Tiglat-pileser rendápe; ha tetã ruvicha Acaz ohechávo pe kuave’ẽmby renda oĩva Damáscope, oguerahauka pa’i Uríaspe peteĩ kuatia ha’e ojapouka hag̃ua avei peichagua kuave’ẽmby renda Jerusalénpe.

11Ha pa’i Urías omopu’ã peichagua kuave’ẽmby renda, tetã ruvicha ojerure hagueichaite ichupe pe kuatia rupi oúva Damáscogui; upéicha pa’i Urías ojapo tetã ruvicha rembipota ha’e og̃uahẽ mboyve Damáscogui.

12Ha tetã ruvicha og̃uahẽvo Damáscogui, ohechávo pe kuave’ẽmby renda, ha’e oñemboja hese oikuave’ẽ hag̃ua hi’ári;

13ha ohapy ikuave’ẽmby ha oñohẽ avei víno kuave’ẽmby ramo hi’ári ha ohypýi ikuave’ẽmby py’aguapy reheguáva ruguykue pe kuave’ẽmby rendápe.

14Ha ogueruka pe kuave’ẽmby renda bronceguiguáva oĩva Ñanderuete rogaguasúpe, hóga renonderãme, ha omoĩ ko kuave’ẽmby renda pyahúva pe ambue kuave’ẽmby yke rehe, yvate gotyomive.

15Ha tetã ruvicha Acaz he’i pa’i Uríaspe: Ko kuave’ẽmby rendaguasu pyahúpe remyendytareína: Ojehapy hag̃ua kuave’ẽmby pyharevegua ha ka’arugua, tetã ruvicha kuave’ẽmby, tetãyguakuéra kuave’ẽmby ha pe tembi’u reheguáva, hi’ári rehypýita umi kuave’ẽmby ojehapypáva ruguykuépe, ha ambue kuave’ẽmby ruguykue. Pe kuave’ẽmby renda bronceguiguáva katu che mba’erã amba’eporandu hag̃ua ha’érupi.

16Ha pa’i Urías ojapo opaite mba’e tetã ruvicha Acaz he’i haguéicha ichupe.

17Ha tetã ruvicha Acaz oikytĩ avei umi pyenda ojokóva umi tácho ha omboguapy porãva carrokuéra ári, oipe’a avei ichugui umi tácho; oipe’a avei pe yendaguasu umi tóro ra’ãnga bronceguiguáva árigui ha omboguapy porã ita ári.

18Ha Asíria retã ruvicha rehehápe oipe’a avei pe tape po’i itéchova ha hokẽva, tetã ruvicha oiporúva oho hag̃ua hogaguasúgui Ñanderuete rogaguasúpe.

19Ambue tembiapo Acaz ojapova’ekue ojehai Juda retã ruvichakuéra rembiapokue kuatiañe’ẽme.

20Ha tetã ruvicha Acaz omano rire oñeñotỹ ichupe avei David távape, ha ita’ýra Ezequías oisãmbyhy hendaguépe.

← Chapter 15 Jump to: Chapter 17 →