2 Kings 3

Guarani 2015 (Ñanderuete Ñe’ẽ Porã 2015)

← Chapter 2 Jump to: Chapter 4 →

1Josafat, Juda retã ruvicha oisãmbyhy ramo 18 áño; Joram, Acab ra’y oñepyrũ oisãmbyhy Israel retãme, Samáriape, 12 áño ha’e oisãmbyhy.

2Joram ojapo ivaíva Ñanderuete resa renondépe, ndohupitýi ramojepe isy ha itúvape; oipe’águi Baal rete ra’ãnga itúva ojapova’ekue.

3Ha’e ojapo umi Jeroboam, Nebat ra’y, angaipakuéra, ha’e omoangaipava’ekue Israelguakuérape, ha noñemboykéi ichugui.

4Upéramo Mesa, Moab retã ruvicha, hymba heta ha opytágui Israel retã ruvicha poguýpe, ome’ẽva’erã Israel retãme cáda áño 100.000 ovecha ra’y ha 100.000 ovecha mácho raguekue.

5Acab omano rire katu, Moab retã ruvicha opu’ã Israel retã ruvicha rehe.

6Upéramo Joram, Israel retã ruvicha, osẽ Samáriagui ha oipapa opaite Israelguápe.

7Ha he’iuka Josafat, Juda retã ruvichápe: Moab retã ruvicha opu’ã cherehe: Rehótapa chendive ñañorãirõ hag̃ua oñondive Moabgua ndive. Ha ha’e he’i: Aháta, che ningo ndeichagua avei, che retã ne retãicha, ha che kavajukuéra nde kavajukuéraicha avei.

8Ha he’i: Mba’e tapérepa jaháta. Ha ha’e he’i: Edom desiérto rape rupi.

9Ha osẽ: Israel retã ruvicha, Juda retã ruvicha ha Edom retã ruvicha, ha ojereségui desiértogui oiko 7 ára pukukue, upeaja hi’y opa, soldádo ha hymbakuérape g̃uarã.

10Upéramo Israel retã ruvicha he’i: Ma’ẽ, Ñanderuete piko ohenói mbohapy tetã ruvichakuérape omoĩ hag̃ua Moabguakuéra pópe.

11Ha Josafat katu he’i: Ápe piko ndaipóri Ñanderuete proféta, ha’érupi ñamba’eporandu hag̃ua ichupe. Ha peteĩ Israel retã ruvicha rembiguái he’i: Ápe oime Eliséo, Safat ra’y, oikova’ekue Elías rembiguái ramo.

12Ha Josafat he’i: Ha’e oguerekóne Ñanderuete ñe’ẽ. Ha Eliséo ou Israel retã ruvicha, Josafat ha Edom retã ruvicha rendápe.

13Upéramo Eliséo he’i Israel retã ruvichápe: Mba’éiko che aguereko nendive. Terehóna nde ru ha nde sy profetakuéra rendápe. Ha Israel retã ruvicha he’i: Nahániri, Ñanderuete piko ombyatymba’e ko’ã mbohapy tetã ruvichápe omoĩ hag̃ua Moabguakuéra pópe.

14Ha Eliséo he’i: Yvága atykuéra Jára rekovére ha ichupe g̃uarã che amba’apo’aína, ndaha’éi rire Josafat rehehápe, ndahechaiva’erãmo’ã nde rova, ha nañe’ẽiva’erãmo’ã nendive.

15Ko’ág̃a pegueru chéve peteĩ mbaraka mbopuhára. Ha ombopúvo pe mbaraka mbopuhára, Ñanderuete po ou Eliséo ári.

16Ha ha’e he’i: Péicha he’i Ñanderuete: Pejo’o ko’ã cerrokuéra pa’ũme (válle) heta yvykua.

17Ñanderuete he’ígui: Ndapehechamo’ãi yvytu térã ama ko cérro pa’ũ kóvape, upeichavéramo jepe henyhẽta ýgui, ha peẽ ha pene rymbakuéra pey’úta.

18Ha ko’ã mba’e ndaha’éi mba’eve Ñanderuetépe g̃uarã; hi’ári omoĩta Moabguakuérape pende pópe.

19Ha peẽ pembyaipava’erã umi táva tápia yvate ha opaite tava’ikuéra iporãva avei, ha peitypáta yvyra iporãva guive, ha pejatýta hypa hag̃ua umi ykua, ha ikokue iporãva pembyaipáta itápe.

20Ojehu upe pyhareve oñekuave’ẽvo kuave’ẽmby, Edom retãgui ou heta y ha oñuãmba pe yvy.

21Ha opaite Moabgua ohendúvo umi mbohapy tetã ruvicha ojupiha ojeity hag̃ua hi’arikuéra, oñembyaty hikuái umi oguerahakuaáva guive ñorãirõ rembiporu ha oñemoĩ hikuái hetã rembe’ýpe.

22Ha ambue pyhareve, Moabguakuéra opu’ãvo ha pe kuarahy ohesapévo y ape rehe, ha’ekuéra mombyry guive ohecha pe y, ipytãva tuguýicha.

23Ha he’i hikuái: Tuguy ningo amóva, umi tetã ruvicha oñorãirõmba oñondivekuéra, ha ojojukapa hikuái kyse pukúpe. Ko’ág̃a Moabguakuéra jaha jaguerupa imba’ekuéra.

24Ha og̃uahẽvo hikuái Israel oñembyatyhápe, Israelguakuéra opu’ã ha ojeity Moabguakuéra ári, ha omokañy ichupekuéra, omuña ha ojuka hikuái heta Moabguakuérape.

25Ha ombotapere hikuái itavakuéra, ikokuekuéra, peteĩteĩva oitývo heta ita, ha omyenyhẽ hikuái yvukuéra ha oitypa yvyra iporãva guive, hemby peve Kir-harásetpe, pe táva oñemongora porã ita reheve, upéi umi ita mombohakuéra omongora ha ohundi hikuái.

26Moab retã ruvicha ohechakuaávo ndaipu’akamo’ãiha pe ñorãirõre, ogueraha hendive 700 soldádo oiporukuaáva kyse puku ha oho ojeity hag̃ua Edom retã ruvicha ári, ndaipu’akái katu hese.

27Upémaramo ojapyhy ita’ýra ypykue, oisãmbyhyva’erãmo’ãva hendaguépe, ha oikuave’ẽ ichupe kuave’ẽmby ojehapypáva ramo táva tápia yvate ári. Upévare Israelguakuéra ipochyete ha ojei hikuái oupa jevy hag̃ua hetãme.

← Chapter 2 Jump to: Chapter 4 →