2 Samuel 10

Guarani 2015 (Ñanderuete Ñe’ẽ Porã 2015)

← Chapter 9 Jump to: Chapter 11 →

1Ko’ã mba’e rire, omano Nahas, Amongua retã ruvicha, ha hendaguépe opyta ita’ýra Hanun.

2Ha David he’i: Che aiporiahuverekóta Hanun, Nahas ra’ýpe, itúva ojapo haguéicha cherehe, ha David omondo hembiguaikuérape omoangapyhy hag̃ua ichupe itúva ñemano rehe. Ha David rembiguaikuéra og̃uahẽvo Amon ñemoñarenguéra rendápe;

3umi Amon ñemoñare ruvicha’i he’i hetã ruvicha Hanúnpe: Hi’ãpa ndéve David ombou umívape ombotuicha hag̃ua nde rúpe ha nemoangapyhy hag̃ua. David oiméne ombou hembiguaikuéra ne rendápe ohecha ha oikuaapa hag̃uánte ko tavapy kóva ohundi hag̃ua.

4Upéramo Hanun oapresa David rembiguaikuérape omoperõ hag̃ua hendyva mbyte peve, ha oikytĩ ijao mbyte rupi hevi ro’o peve ha omondo jevy ichupekuéra.

5Ha’ekuéra omombe’uka ko’ã mba’e Davídpe, otĩgui nog̃uahẽséi hendápe, upévare tetã ruvicha he’iuka ichupekuéra: Pepyta Jericópe okakuaa jevy peve pene rendyva, ha uperire ae peju jevy che rendápe.

6Ha Amon ñemoñarenguéra ohechakuaáma ramo David ndaija’eveimaha hesekuéra, omondo ojokuái hag̃ua mba’erepy rehe umi Siriayguápe oĩva Bet-rehob ha Sobápe, 20.000 kuimba’e yvy rupigua; ha Maaca retã ruvichágui 1.000 kuimba’e; ha Tóbgui 12.000 kuimba’e.

7David ohendúvo ko’ã mba’e, omondo Joábpe opaite isoldadokuéra ipy’aguasúva ndive.

8Ha Amon ñemoñarenguéra osẽ ha oñemoĩ oñorãirõ hag̃ua itavaguasu rokẽ ypýpe, ha umi Siriaygua oikóva Sobápe, Rehóbpe, Tóbpe ha Maacápe, oñemohenda ñúme.

9Ha Joab ohechávo oñorãirõtaha henondéguio ha hapykuéguio, oiporavo opaite Israelgua ipy’aguasuvéva, ha oñemoĩ ojeity hag̃uáicha Siriayguakuéra ári.

10Ha pe soldádo aty hembýva omoĩmba ityvýra Abisai poguýpe ojeity hag̃ua Amon ñemoñarenguéra ári.

11Upéi Joab he’i Abisaípe: Umi Siriaygua imbareteve ramo chehegui, eju chepytyvõ hag̃ua; ha Amon ñemoñarenguéra imbareteve ramo ndehegui che roipytyvõta.

12Eñemombaretéke ha ñañeha’ãmbaitéke ñane retã rehehápe ha Ñanderuete táva rehehápe; Ñanderuete tojapo ichupe iporãve háicha.

13Joab ha hetãygua hendive oĩva oho ojeity hag̃ua Siriayguakuéra ári; ha’ekuéra katu okañy henonderãgui.

14Amon ñemoñarenguéra ohechávo umi Siriaygua okañymbamaha, ha’ekuéra okañy avei Abisai renonderãgui, ha oikepa itavapýpe oñemo’ã hag̃ua. Ha Joab oheja Amon ñemoñarenguéra ha ojevy Jerusalénpe.

15Umi Siriaygua ohecha vove Israelgua ipu’aka hague hesekuéra oñembyaty jevy.

16Ha Hadad-ézer omondo ogueruka hag̃ua umi Siriaygua oikóva Éufrates mboypýri; ha Sobac, isoldádo ruvicha ou isoldádo aty reheve Helámpe, ha oñemoĩ Hadad-ézer soldádo ruvicha poguýpe.

17Ha péva ojekuaaukávo Davídpe, ha’e ombyatyuka opaite Israelguápe, ha ohasa rire hendivekuéra pe ysyry Jordan rupi ou Helámpe, ha Siriayguakuéra oñemoĩ oñorãirõ hag̃ua David ndive, ha ojeity Israelguakuéra ári.

18Joab ombopoguy katu Siriayguakuérape ohundívo 700 cárro ñorãirõ reheguávape ha ojuka 40.000 kuimba’e kavaju ariguápe; ha oikutu avei Sobácpe, isoldádo aty ruvichápe, ha ojuka ichupe.

19Umi Síria retã ruvicha oipytyvõva’ekue Hadad-ézerpe, ohechávo mba’éichapa ndaipu’akamo’ãiha Israelguakuéra rehe, oñemoĩ peteĩ ñe’ẽme Israel ndive, ha oiko hembiguái ramo ha upe ára guive umi Siriaygua okyhyjéma oipytyvõve hag̃ua Amon ñemoñarenguérape.

← Chapter 9 Jump to: Chapter 11 →