2 Samuel 17

Guarani 2015 (Ñanderuete Ñe’ẽ Porã 2015)

← Chapter 16 Jump to: Chapter 18 →

1Upéramo Ahitófel he’i Absalónpe: Ehejána taiporavóta 12.000 kuimba’épe aha hag̃ua David rapykuéri, ko pyharépe amuña hag̃ua ichupe.

2Ha ajeitýta hi’ári ikane’õ ha ipo ikangy jave; péicha amongyhyjéta opaite tetãygua oĩva guive hendive okañy hag̃ua ha ajukáta tetã ruvichápente.

3Péicharamo aguerupa jevýta ndéve g̃uarã opaite tetãyguakuéra opoígui ijáragui ha ha’ekuéra oupa jevývo, oikopáta avei py’aguapýpe, nde voi reheka peteĩ kuimba’épente rejuka hag̃ua.

4Ko tekombo’epy kóva Absalon, ha opaite Israel karai ancianokuéra ohayhu avei.

5Upérõ Absalon he’i: Pehenói avei ko’ág̃a Husai, pe Aracguápe, ñahendu hag̃ua avei iñe’ẽ.

6Ha Husai og̃uahẽvo Absalon rendápe, Absalon he’i ichupe: Péicha he’íkuri Ahitófel; ha ajapótapa hekombo’e térã nahániri. Mba’épa nde ere.

7Upérõ Husai he’i Absalónpe: Pe tekombo’e Ahitófel ome’ẽva’ekue naiporãi.

8Ha Husai he’ive: Nde reikuaa porã voi nde ru ha hendiveguáva kuimba’e ipy’aguasuha, ha ipy’akuéra oñembyasyha ku óso imembýva ñúmeicha, ojepe’árõ guáicha ichugui imembykuéra. Nde ru kuimba’e ñorãirõha pegua voi, ha ndoiko reimo’ãi ikuimba’ekuéra ndive ipyhare ramojepe.

9Katuete ha’e oimeva’erã kañyhápe umi itakuaguasu rupi, térã ambue hendápe. Ha iñepyrũme ho’a ramo peteĩteĩ ndereheguáva, oimeraẽ ohendúvante he’íta: Sarambi oikóma Absalon kuimba’ekuéra apytépe.

10Upérõ pe kuimba’e ipy’aguasúva ku leõicha, ipy’a kangyva’erã; opaite Israelgua oikuaa porãgui nde ru kuimba’e ipy’aguasuveha, ha opaite oĩva guive hendive avei.

11Che ningo ha’e ndéve embyaty hag̃ua opaite Israelgua nendive, Dan guive Beerséba peve, hetaitereíta ku yvyku’i yguasu rembe’y peguáicha, ha ndete voi reho emoakã raku ichupekuéra pe ñorãirõrãme.

12Upérõ jajeity hi’ári, mamo oĩháme, ha jajeity ramo hi’ári ku ysapy ho’a háicha yvy apére, ñahundíta ichupe katuete opaite iñirũnguéra ndive.

13Ha okañy ramo peteĩ távape oñemo’ã hag̃ua, opaite Israelgua ogueraháta sã upe táva upévape ñambotyryrypa hag̃ua ysyry peve, ndopytavéi peve upépe peteĩ itánte jepe.

14Upémaramo Absalon ha mayma Israelgua he’i: Husai, Aracgua ñe’ẽ iporãve Ahitófel ñe’ẽgui. Péva Ñanderuete rembiapo voi anítei ojejapo Ahitófel rekombo’e, ha Ñanderuete ombouségui mba’evai Absalon ári.

15Upéi Husai he’i pa’ikuéra Sadoc ha Abiatárpe: Péicha ha péicha Ahitófel ohekombo’e Absalónpe ha Israel karai ancianokuérape, che katu péicha ahekombo’e ichupe.

16Upévagui emondo pya’e peteĩ tembijokuáipe, ha’e omombe’u hag̃ua Davídpe: Ani pepytátei ko pyharépe pe desiértope ojehasahápe pe Jordan, ani oikótei sarambi tetã ruvicha rehe ha opaite tetãygua rehe oĩva guive hendive.

17Ha Jonatan ha Ahimaas okañy Rogel ykua ypýpe, ha peteĩ kuña tembiguái oho jepi omomarandupa hag̃ua ichupekuéra, ha’ekuéra ndaikatúigui ojehechauka pe táva pévape; ha ha’ekuéra oho jepi omomarandupa hag̃ua tetã ruvicha Davídpe.

18Ha peteĩ mitãrusu ohecha Jonatan ha Ahimaáspe osẽnguévo ha oho omombe’upa Absalónpe; upévare mokõivéva pya’e pya’e oguata og̃uahẽ meve Bahurímpe peteĩ kuimba’e rógape, oguerekóva ikorapýpe peteĩ yvykua, ha upépe oñemokañy hikuái.

19Pe kuñakarai óga jára katu ogueru peteĩ ahoja ha oipyso pe yvykua juru ári, ha omyasãi hi’ári mba’e ra’ỹi oñembyatyramóva; ha avave ndohechái mba’eve.

20Ha Absalon rembiguaikuéra og̃uahẽvo ko kuñakarai rógape, oporandu ichupe he’ívo: Mamópa oime Ahimaas ha Jonatan. Ha pe kuñakarai he’i ichupekuéra: Ohasáma hikuái pe y ojehasaha rupi. Ha’ekuéra oheka ha ndojohúigui ichupekuéra oho jevy Jerusalénpe.

21Ha oho rire, osẽ hikuái yvykuágui ha oho omombe’upa Davídpe, ha he’i ichupe: Pepu’ãke ha pya’e pehasapa ko y kóva rupi, Ahitófel ohekombo’égui mba’épa ojejapova’erã penderehe.

22Upémaramo David opu’ã, ha opaite iñirũnguéra oĩva guive hendive, ha ohasa hikuái pe Jordan iko’ẽ mboyve; ha avave ndopytái ohasa’ỹre pe Jordan.

23Ha Ahitófel ohechávo ndojejapoiha ha’e ohekombo’e haguéicha, ojupi hymba búrro ári, ha oho itávape; ha omohenda porãmba rire hogapy, oho ojejuvy, upéicha ha’e omano, upéi oñeñotỹ ichupe itúva tyvýpe (sepultúrape).

24Ha David og̃uahẽ riréma Mahanaímpe, Absalon ohasa pe Jordan opaite hapichakuéra Israelgua ndive.

25Ha Absalon omoĩ Amasápe isoldádo ruvicha ramo, Joab rendaguépe. Amasa peteĩ Ismaelgua ra’y, hérava Itra, péva oñemog̃uahẽva’ekue Abigail, Nahas rajy rehe, péva Sarvia reindy ha Joab sy.

26Upéicha Israelguakuéra omopu’ã icampaménto Galaad yvýpe, Absalon ndive.

27David og̃uahẽ rire Mahanaímpe, Sobi, Nahas ra’y, Rabaygua, peteĩ Amon ñemoñare; ha Maquir, Amiel ra’y, peteĩ Lodebargua; ha Barsilái, peteĩ Galaadgua Rogelímgui,

28ogueru Davídpe ha iñirũnguérape: Tupa, kambuchi, trígo, cebáda, trígo ku’i, mba’e ra’ỹi ñemaimbepyréva, kumanda, lentéja,

29eíra, kamby kyrakue, ovecha, kesu, vaka kambykueguiguáva, ho’u hag̃ua, péicha he’ígui hikuái: David ha iñirũnguéra katuete ikane’õ ha ijy’uhéi hikuái pe desiérto rehe.

← Chapter 16 Jump to: Chapter 18 →