2 Samuel 2

Guarani 2015 (Ñanderuete Ñe’ẽ Porã 2015)

← Chapter 1 Jump to: Chapter 3 →

1Ko’ã mba’e rire David omba’eporandu Ñanderuetépe, he’ívo: Ajupítapa peteĩva ko’ã Juda távape. Ha Ñanderuete he’i ichupe: Ejupi. Ha David oporandu jevy: Mamópa ajupíta. Ha Ha’e he’i: Hebrónpe.

2Upéicha David ojupi, ha hendive mokõive hembireko: Ahinoam, pe Jisreelgua; ha Abigail, péva Nabal, Carmelgua rembirekore.

3David ogueraha avei umi kuimba’e hendive oikova’ekuépe, opaite igentekuéra reheve; ha oiko hikuái Hebrónpe ha ijerekuévo.

4Ha Judayguakuéra ou Hebrónpe ha oiporavo Davídpe Juda tríbu ruvicha ramo. Ha oñemombe’u Davídpe oje’évo ichupe: Umi Jabes, Galaadgua oñotỹma Saúlpe.

5Upéramo David oguerahauka ñe’ẽ umi Jabes, Galaadguápe, he’iukávo ichupekuéra: Ñanderuete tapenderovasa peiporiahuvereko haguére pende jára Saúlpe, peñotỹvo ichupe.

6Ñanderuete tapendeporiahuvereko ha taipy’aporã penendive ha che avei ajapóta penderehe mba’eporã ko’ã pene rembiapo porã rupi.

7Ko’ágã pemombaretéke pende po ha peñembopy’aguasúke; omano ramojepe Saul, pende jára, Juda rogayguakuéra cheporavóma itríbu ruvicha ramo.

8Abner, Ner ra’y, Saul soldádo aty ruvicha, ogueraha Isboset, Saul ra’ýpe, ha oho Mahanaímpe.

9Ha omoĩ ichupe tetã ruvicha ramo Galaad ári, Suri ári, Jisreel ári, Efrain ári, Benjamin ári, ha mayma ambue Israel tríbu ári.

10Isboset oguereko 40 áño oñepyrũ ramo oiko hag̃ua Israel retã ruvicha ramo, ha oisãmbyhy mokõi áño. Juda tríbu añoiténte opyta David poguýpe.

11David oisãmbyhy Juda tríbupe 7 áño ha 6 jasy Hebron guive.

12Abner, Ner ra’y, osẽ Mahanaímgui ha oho Gabaónpe, Isboset, Saul ra’y ñorãirõharakuéra ndive.

13Ha Joab, Sarvia memby, ha David ñorãirõhára osẽ avei ha ojojohu Gabaon y rendápe, Joab oñemohenda pe y ágotyo ha Abner pe y amo gotýo.

14Ha Abner he’i Joábpe: Topu’ã ko’ág̃a mitãrusukuéra, ha toñorãirõ ñane renondépe. Ha Joab ombohovái jevy: Topu’ã katu.

15Upémaramo opu’ã ha oiporavo hikuái 12 Bejamingua, Isboset, Saul ra’y rembiguaikuéra, ha 12 David rembiguái.

16Ha peteĩteĩva ipojái oñoakã rehe, ha ombyasuru ikyse puku ojoyke rehe ha oñondive ho’apa hikuái; upévagui oñembohéra pe tenda: Helcat-hazurim (ñu kyse pegua), péva opyta Gabaónpe.

17Oñeñorãirõ mbarete pe árape, David rembiguaikuéra katu ombopoguy Abner ha Israelguakuérape.

18David kuimba’e apytépe oĩ mbohapyve Sarvia memby: Joab, Abisai ha Asael. Ko Asael iñakuã peteĩ guasu ñúme guáicha.

19Ha Asael oñani Abner rapykuéri, opia’ỹ rehe akatúa ni asu gotýo.

20Ha Abner oma’ẽ hapykue gotýo ha he’i: Ndéiko ndaha’éi Asael. Ha ha’e he’i: Héẽ, che ha’e.

21Upémaramo Abner he’i ichupe: Eñemboyke akatúa térã asu gotýo, ha ndepojái oimeraẽ kuimba’e rehe, ha eñemomba’e imba’ekue rehe. Asael katu ndojeiséi hapykuérigui.

22Ha Abner he’i jevy Asaélpe: Ejei che rapykuérigui, mba’érepa rombopoguýta roity peve. Upéicharamo mba’éichapa amopu’ãvéta che resa nde ryke’y Joab renondépe.

23Ha ha’e ndojeiséigui, Abner oikutu ichupe ijyvyra puku akua apýrape icostílla 5-hápe, ha pe yvyra puku akua osẽ ijatukupe gotýo, ha upepete ha’e ho’a ha omano. Mayma oúva guive Asael rapykuéri opyta ha oma’ẽ Asael retekue rehe.

24Joab ha Abisai katu oho meme Abner rapykuéri. Ha og̃uahẽvo Amma cérro rembe’ýpe pe kuarahy oikéma, péva opyta Gia rovái, Gabaon rapépe desiérto gotýo.

25Ha Benjamin ñemoñarenguéra oñembyaty Abner ndive, ha oñemohenda porã hikuái pe cérro ru’ã ijyvatevehápe.

26Ha Abner osapukái Joábpe, ha he’i: Opaite ára pevépa kyse puku oporombokusuguéta. Ndereikuaáipa py’aro opava’erãha ha hembýta ñembyasy. Araka’épa eréta ne irũnguérape anivéma hag̃ua omuña ipehẽnguekuérape.

27Ha Joab he’i jevy: Ñanderuete rekovére, nde nereñe’ẽi rire tetãyguakuérape, ha’ekuéra omuñaveva’erãmo’ã ipehẽnguekuérape ko’ẽmba peve.

28Upémaramo Joab ombopu hymba ratĩngue, ha mayma Judaygua opytapa ha nomuñavéi Israelguakuérape, ha noñorãirõvéi hikuái.

29Ha Abner ha hendiveguakuéra oguata Araba ypy peve upe pyhare pukukue, ha ohasa rire pe Jordan, ohasa Bitron pukukue ha og̃uahẽ hikuái Mahanaímpe.

30Ha Joab avei ojevy ha nomuñavéi Abnérpe ha ombyatypa hetãyguakuérape oipapa hag̃ua ichupekuéra, David rembiguaikuéra apytégui noĩvéi 19 kuimba’e ha Asael.

31Ha David rembiguaikuéra ojuka Benjamingua ha Abner reheguáva apytégui 360 kuimba’e.

32Upéi Joab ojapyhyuka Asael retekue, ha oñotỹ hikuái itúva tyvýpe, Belénpe. Ha Joab, iñirũnguéra ndive, oguata pyhare pukukue ha ko’ẽmbávo og̃uahẽ hikuái Hebrónpe.

← Chapter 1 Jump to: Chapter 3 →