2 Samuel 15

Guarani 2015 (Ñanderuete Ñe’ẽ Porã 2015)

← Chapter 14 Jump to: Chapter 16 →

1Ojehu rire ko’ã mba’e, Absalon ou oñembojára peteĩ cárro rehe, heta kavaju rehe, ha 50 kuimba’e oñaniva’erãva henonderãme.

2Ha Absalon opu’ã jepi pyhareve, ha oñemoĩ tape yképe oĩháme pe táva rokẽguasu; ha oimeraẽ oiko vaíva ha oúva tetã ruvicha rendápe ñembojovake rekávo, Absalon ohenói ichupe hendápe ha he’i: Mba’e tavayguápa nde. Ha ha’e he’i ichupe pe táva réra ou haguégui.

3Upéicharamo Absalon he’i ichupe: Ema’ẽ, pe eréva iporã ha hekoite pegua, ág̃a katu ndererekomo’ãi peteĩnte jepe nerendútava tetã ruvicha rendápe.

4Ha Absalon he’ive: Máva tamora’e chemoĩ ko tetã mbojovakehára ramo ou hag̃ua che rendápe opaite oguerekóva guive teko vai térã oimeraẽ mba’e ambojovake hag̃ua.

5Ha oñemboja ramo peteĩ hendápe ojayvy hag̃ua henondépe, ha’e oipyso ijyva oñu’ã ha ohetũ hag̃ua ichupe.

6Péicha ojapo opaite Israelgua ndive oúva tetã ruvicha rendápe ñembojovake rekávo; upéicha Absalon omonda Israelguakuéra ñe’ã.

7Irundy áño rire, Absalon he’i tetã ruvichápe: Che ajerure ndéve cherejána taha Hebrónpe, ame’ẽ hag̃ua che kuave’ẽmby ha’eva’ekue ame’ẽtaha Ñanderuetépe.

8Ne rembiguái ome’ẽva’ekue iñe’ẽ (vóto) oĩ ramoguare Gesúrpe, Síriape, ha’évo: Ñanderuete chererahauka jevy ramo Jerusalénpe che aikuave’ẽta Ñanderuetépe g̃uarã peteĩ kuave’ẽmby.

9Ha tetã ruvicha he’i ichupe: Tereho py’aguapy reheve. Ha ha’e opu’ã ha oho Hebrónpe.

10Upéramo Absalon omondo ñemiháme ñe’ẽrerahahára opaite Israel tríbupe ha he’iuka ichupekuéra: Ág̃a pehendúvo pe turu pu pejéta: Absalon oisãmbyhýma tetã ruvicha ramo Hebrónpe.

11Ha Absalon ndive oho 200 kuimba’e ha’e ohenoiva’ekue, ko’ãva ohónte hendive oikuaa’ỹrehe mba’eve.

12Ha Absalon ohenoiuka Ahitófel, Giloguápe, David rekombo’ehára, itáva Gilógui. Upéicha pe ñepu’ã okakuaave ohóvo, ha heta hetave tetãygua oho Absalon rapykuéri.

13Ha David rendápe ou peteĩ mba’e mombe’uhára ha he’i ichupe: Israelgua ñe’ãnguéra ohopa Absalon rapykuéri.

14Upémaramo David he’i opaite hembiguaikuérape oĩva guive hendive Jerusalénpe: Pepu’ãke ñakañy, ndaikatúi ñasẽ reívo Absalon renondégui, ha peñembopya’éke jahakuévo, anítei ha’e oñembopya’eve ha ñanderupity, ha oity ñandeári, ha oikutu tetãyguakuérape kyse puku rãimbépe.

15Umi tetã ruvicha rembiguaikuéra he’i tetã ruvichápe: Péina ápe, ore ne rembiguaikuéra, roimembaite ore jára poguýpe, ore retã ruvicha oipota háicha rojapóta avei.

16Upémaramo tetã ruvicha osẽ ha opaite hogayguakuéra oho hapykuéri. Ha tetã ruvicha ohejánte hóga ñangarekoha ramo 10 ikuñáva.

17Pe tetã ruvicha ha opaite tetãygua osẽ Jerusaléngui, ha opyta hikuái pe óga paha peguápe.

18Upéicha hembiguaiteéva omoirũ ichupe, umi Ceretgua ha Peletguakuéra, avei Gatguakuéra, 600 kuimba’e omoirũva’ekue ichupe Gat guive, ha oho hikuái tetã ruvicha renonderãme.

19Ha pe tetã ruvicha he’i Itai, Gatguápe: Ma’erãpa rehose nde avei orendive. Ejevy ha epyta tetã ruvicha ndive; nde voi ningo tetã ambueygua oñemosẽva’ekue avei hetãgui.

20Kuehénte nde rejúkuri, ha ág̃a piko rehoséma orendive. Che voi ndaikuaa porãi che raperã. Ejevy katu ha eraha ne irũnguérape nendive. Ñanderuete tanepytyvõ ha toiko nendive tapiaite.

21Ha Itai oñe’ẽ jevy tetã ruvichápe he’ívo ichupe: Ñanderuete rekovére, ha che jára rekovére, che ndapoimo’ãi che retã ruvichágui amanóta ramojepe, mamo che jára, che retã ruvicha oĩháme, pépe oĩva’erã avei ne rembiguái.

22Upémaramo David he’i Itaípe: Eju katu ha jaha. Itai, pe Gatgua ojapo háicha, opaite ambue kuimba’ekuéra ojapo avei ha opaite hogayguakuéra omoirũ avei Davídpe.

23Ha opaite tetãygua osẽ ojahe’óvo sapukaipópe; upéi ohasa pe Cedron ysyry rupi oho hag̃ua desiérto rape rehe.

24Sadoc, ha hendive opaite Levi ñemoñarenguéra, omoirũ avei Davídpe ha ogueraha hendivekuéra Ñanderuete karameg̃ua, ipype oĩ Ñanderuete rembiapoukapykuéra; ha omohenda hikuái pe karameg̃ua peteĩ tendápe, Abiatar oikuave’ẽ hag̃ua ha osẽmba peve pe távagui umi omoirũséva Davídpe.

25Ha tetã ruvicha katu he’i Sadócpe: Egueraha jevy Ñanderuete karameg̃ua itávape. Ág̃a ajohu ramo py’a porã Ñanderuete resa renondépe, Ha’e ombosako’ipáne ajevy hag̃ua, upévo ahecha jevýne pe karameg̃ua renda,

26ha he’i ramo: Nde ndachembohoryvéi, ápe aĩ, Ha’e tojapo chehegui ichupe iporãve háicha.

27Tetã ruvicha he’i avei pa’i Sadócpe: Nandéi piko proféta. Ejevy py’aguapy reheve pe távape, ha toho nendive nde ra’y, Ahimaas, ha Jonatan, Abiatar ra’y.

28Eikuaa porãke che apytáta pe desiértope ha aha’ãrõta og̃uahẽ meve peteĩ ñe’ẽ pendehegui.

29Upémaramo Sadoc ha Abiatar ogueraha jevy Ñanderuete karameg̃ua Jerusalénpe, ha opyta hikuái upépe.

30Upérõ David ojupi pynandi jahe’opópe pe olívo rape rehe, ha omo’ã iñakã. Ha hendive opaite tetãyguakuéra omo’ã joa avei iñakãnguéra, ha ojahe’o joa ojupikuévo.

31Ha oñemomarandu Davídpe, oje’évo ichupe: Ahitófel oime Absalon ndive, umi oñemoĩmava’ekue nderehe apytépe. Upémaramo David he’i: Ñanderuete tombyai Ahitófel rekombo’epy.

32David og̃uahẽ jave pe cérro ru’ãme omomba’eguasu hag̃ua Ñanderuetépe, osẽ ohug̃uaitĩvo ichupe Husai, peteĩ Aracgua, ijao osoropáva ha yvytimbo iñakã ári (oñembyasyetereígui).

33Ha David he’i ichupe: Rehasa ramo chendive, mba’e pohyivéta chéve.

34Rejevy ramo távape, ha ere ramo Absalónpe: Tetã ruvicha, che aikóta ne rembiguái ramo aiko haguéicha nde ru rembiguái ramo; péicha rembyaikuaa cherehehápe Ahitófel ñe’ẽ.

35Upépe oĩta avei nendive pa’ikuéra Sadoc ha Abiatar. Upévagui rehendúva guive tetã ruvicha rógape, emombe’u pa’i Sadoc ha Abiatárpe.

36Ha hendivekuéra oime mokõive ita’ýra, Ahimaas, Sadoc ra’y ha Jonatan, Abiatar ra’y, ha’ekuéra rupi reikuaaukáta chéve opaite mba’e rehendúva guive.

37Péicha Husai, David angirũ ou Jerusalénpe; Absalon oike avei ko táva kóvape.

← Chapter 14 Jump to: Chapter 16 →