2 Samuel 13

Guarani 2015 (Ñanderuete Ñe’ẽ Porã 2015)

← Chapter 12 Jump to: Chapter 14 →

1Ko’ã mba’e rire, David ra’y, Amnon ohayhu Tamárpe, ha’e ningo peteĩ kuñataĩ iporãitéva. Ko Tamar, Absalon reindy, ha Absalon, David ra’y avei (ambue hembirekógui).

2Amnon iñakãrakuetereígui Tamar rehe ha opyta hasy. Tamar ndoikói gueteri kuimba’e ndive, upévagui Amnon oimo’ã hasyetereiha oiko hag̃ua hendive.

3Ha Amnon iñirũ peteĩ hérava Jonadab, kuimba’e iñaranduetéva, péva David ryke’y Sima ra’y.

4Ha kóva he’i ichupe: Tetã ruvicha ra’y, mba’érehepa ko’ẽ ko’ẽ rehe ndepiruve rehóvo. Neremombe’umo’ãipa chéve. Ha Amnon he’i ichupe: Che ahayhu Tamárpe, che ryvy Absalon reindýpe.

5Ha Jonadab he’i ichupe: Eñeno nde rupápe ha eñembohasyete gua’u; ha ág̃a nde ru ou ramo neandúvo, ere ichupe: Ajerure ndéve toumi che reindy Tamar chemongaru hag̃ua, ha tombosako’i che renondépe che rembi’urã, ha ahechávo ta’u ipo peguáre.

6Ha Amnon oñeno ha oñembohasyete gua’u; ha tetã ruvicha ou oñandúvo ichupe. Ha’e he’i itúvape: Ajerure ndéve tou che reindy Tamar che rendápe, ha che renondépe tojapo mokõi mbeju, che ha’u hag̃ua ipógui.

7Ha David omondo hembijokuáipe Tamar rógape ha he’i ichupe: Tereho ko’ág̃a nde kyvy Amnon rógape, ha ejapo hembi’urã.

8Ha Tamar oho ikyvy Amnon rógape, ha’e oñeno jave hupápe; ha’e ogueru trígo ku’i ha ombojehe’a, ha henondépe ojapo ichugui mbeju ha ombojy.

9Upéi omoĩ pe páila henondépe; ha’e katu ndo’uséi. Ha Amnon he’i: Peguenohẽmba opavavépe ko’águi. Ha opavave osẽ hógagui.

10Upéramo Amnon he’i Tamárpe: Egueru pe tembi’u pe koty ojekehápe akaru hag̃ua nde pógui. Ha Tamar ogueraha pe mbeju ombosako’iva’ekue ikyvy Amnon rupápe.

11Ha Tamar omoĩvo henondépe ho’u hag̃ua, Amnon ojapyhy ichupe, he’ívo: Eju nde che reindy eñeno chendive.

12Ha ha’e he’i ichupe: Nahániri, che kyvy, ani chemotĩtei; péicha ndojejapoiva’erã Israel retãme. Ani rejapótei ko mba’e ivaietéva.

13Mamóiko che ahava’erã atĩetereígui, ha nde avei retĩetéta Israel retãme, reikóta tekove iñañaitéva ramo. Ajerure ndéve, eñe’ẽ tetã ruvichápe, ha’e katuete cheme’ẽta ndéve.

14Amnon katu nohenduséi ichupe, imbaretevégui ichugui, orãirõ ichupe.

15Uperire Amnon ndaija’evéi hese, ha ikuerái ichugui, ha pe a’e’ỹ oñandúva, ituichaiteve pe mborayhu oñanduva’ekuégui. Ha Amnon he’i ichupe: Epu’ã ha tereho.

16Ha ha’e he’i ichupe: Anítei, che kyvy; nde chemosẽ ramo ko’ág̃a ivaieteve, cherãirõ ramoguarégui. Ha’e katu nohenduséi ichupe.

17Upévare ohenói peteĩ hembiguáipe ha he’i ichupe: Emosẽ chéve kóvape, ha emboty porã hapykuerépe pe okẽ.

18Ha Tamar omonde peteĩ typói para ijeguakáva, umi ao omondéva tetã ruvicha rajykuéra omenda mboyve. Upérõ Amnon rembiguái onohẽ ichupe okápe ha omboty porã pe okẽ hapykuerépe.

19Upémaramo Tamar ojapyhy tanimbu ha omosarambi iñakã ári, ha omondoro pe ao para omondéva, ha omoĩ ipo iñakã ári ha oho sapukaipópe.

20Ha ikyvy Absalon oporandu ichupe: Oiko piko ra’e nendive nde kyvy Amnon. Ekirirĩ katu che reindy; ha’e ningo ne pehẽngue; ani rejepy’apyeterei ko’ã mba’e rehe. Upéicha Tamar opyta Absalon rógape tuicha ñembyasy reheve.

21Ha tetã ruvicha David oikuaa rire ko’ã mba’e ipochyeterei.

22Ha Absalon katu nde’íri Amnónpe ivaíva ni iporãva; jepémo Absalon ipy’aro Amnon ndive, orãirõ haguére iteindýra Tamárpe.

23Ohasa rire mokõi áño, Absalon oñapĩ ijovechakuéra Baal-hazórpe, oĩva Efrain ypýpe; ha ohenoise karuguasúpe opaite tetã ruvicha ra’ykuérape.

24Upévare Absalon oho tetã ruvicha rendápe, ha he’i: Péina ágã ne rembiguái oñapĩhína ijovechakuéra; che ajerure che retã ruvicha tou che rendápe hembiguaikuéra ndive.

25Ha tetã ruvicha he’i Absalónpe: Nahániri, che ra’y, ndorohopamo’ãi, anítei ipohyieterei ndéve g̃uarã. Oñeha’ãmba ramo jepe ha’e David ndohoséi, ohovasa katu ichupe ohokuévo.

26Upémaramo Absalon he’i: Ndaikatúirõ reho, ajerure ndéve tou orendive Amnon che pehẽngue. Ha David he’i jevy ichupe: Ma’erãpa ohóta nendive.

27Ha Absalon omyangekõietereígui ichupe, David oheja oho hendive Amnon ha opaite ambue tetã ruvicha ra’ykuéra.

28Ha Absalon he’íkuri hembiguaikuérape, ajerure peẽme peme’ẽ heta víno ombohory hag̃ua Amnon py’a, ha che ha’e ramo: Peikutu Amnónpe, upévo pejuka, ha ani pekyhyjétei, che voi ha’égui peẽme. Peñeha’ãmbaitéke, ha pendepy’aguasúke.

29Ha Absalon rembiguaikuéra ojapo Amnon rehe oje’e haguéicha ichupekuéra. Upéramo opaite tetã ruvicha ra’ykuéra opu’ã ha ojupi imburikakuéra ári ha okañy hikuái Absalóngui.

30Ha oime ramo gueteri hikuái tape rehe, og̃uahẽ David rendápe ñe’ẽ guyguy he’íva: Absalon ojukapaite tetã ruvicha ra’ykuérape, ha nahembýi avavete.

31Upérõ David opu’ã omondoro ijao ha ojeity yvýpe, ha opaite hembiguaikuéra oĩva guive hendive omondoro avei ijaokuéra.

32Upéramo Jonadab, Sima ra’y ha David sobríno, he’i Davídpe: Ani ere che jára ojejukapa hague tetã ruvicha ra’ykuérape, Amnon añóntepe ojejuka; péva Absalon voi he’i oikotaha, Amnon orãirõha ára guive iteindýra Tamárpe.

33Upévarehe ani rerovia pe ñe’ẽguyguy rehendúva: Tetã ruvicha ra’ykuéra ojejukapaiteha, Amnónpe ojejukánte.

34Absalon katu okañy. Ha pe ma’ẽhára oñangarekóva pe távare, oma’ẽ porãvo ohecha heta tetãygua ouvahína cérrogui.

35Upérõ Jonadab he’i Davídpe: Péina pépe ouhína tetã ruvicha ra’ykuéra, ne rembiguái he’i haguéicha ndéve.

36Ha’e oñe’ẽmbávo, añetehápe ouhína tetã ruvicha ra’ykuéra, jahe’o sorópe ou hikuái. Ha tetã ruvicha ha opaite hembiguaikuéra ojahe’o tuichaiterei avei.

37Ha Absalon okañy ha oho Talmai, Amiud ra’y, Gesur retã ruvicha rendápe. Ha David ojahe’o ita’ýra rehe ko’ẽ ko’ẽ rehe.

38Upéicha Absalon okañy oiko hag̃ua Gesúrpe, ha upépe opyta mbohapy áño.

39Ha tetã ruvicha pochy rendy Absalónre oguéma; hi’angapyhýmagui voi Amnon omanova’ekue rehe.

← Chapter 12 Jump to: Chapter 14 →