2 Samuel 19

Guarani 2015 (Ñanderuete Ñe’ẽ Porã 2015)

← Chapter 18 Jump to: Chapter 20 →

1Upéi oñemomarandu Joábpe: Péina tetã ruvicha hasẽ, ha omba’embyasy Absalon rehe.

2Ha pe árape oiko ñembyasy, vy’a rendaguépe, mayma tetãyguakuéra apytépe; ohendúgui hikuái pe árape tetã ruvicha imba’embyasyha ita’ýra ñemano rehe.

3Ha pe árape tetãyguakuéra oike ñemiháme távape, ha otĩete ku okañýva ramoguáicha ñorãirõ hágui.

4Ha tetã ruvicha katu oñu’ã hova ha ojahe’o hatã, he’ívo: Che ra’y Absalon, Absalon, che ra’y, che ra’y.

5Upémaramo Joab ou tetã ruvicha rendápe, ha he’i: Ko árape remotĩmba ne rembiguaikuérape, ko árape ha’ekuéra osalva nde rekove, nde ra’y ha nde rajykuéra, ne rembireko ha ne kuñakuéra rekove.

6Nde katu rehayhuve nderehe ija’e’ỹvape ha remboyke umi nderayhúvape; ko árape rehechauka ore mburuvichakuéra térã nde soldadokuéra mba’eveteha nde resápe; ko árape rehechauka porã chéve avei Absalon oikove rire, ha ore romanomba rire hendaguépe nde revy’aveva’erãmo’ãha.

7Ko’ág̃a epu’ã katu, tereho okápe ha eñe’ẽ porã ne rembiguaikuérape; ndaupéichai ramo che ha’e ndéve Ñanderuete rérape ndopytamo’ãiha nendive peteĩ kuimba’énte jepe ko pyharépe; ha péva ivaivéta ndéve opaite mba’evai ojehumava’ekue ndéve ne mitã guive ko ára kóva peve.

8Upémaramo tetã ruvicha opu’ã ha oguapy pe táva rokẽme, ha oñemomarandu opaite tetãyguakuérape, oje’évo: Péina ápe tetã ruvicha oguapyhína pe táva rokẽme. Ha opaite soldadokuéra ou tetã ruvicha rendápe; ambue Israelguakuéra ohopáma katu hogakuérape.

9Ha opaite tetãygua Israelgua oñoñe’ẽ’api ojoapytepekuéra, he’ívo: Pe tetã ruvicha ningo ñandesalva ñanderehe ija’e’ỹva poguýgui, ha’e ñandepe’a Filisteayguakuéra poguýgui; ha ko’ágã katu okañy hetãgui okyhyjégui Absalóngui.

10Ha ñamoĩva’ekue Absalon ñande ári, ha’e katu omanóma ñorãirõme. Mba’érehepa ñaha’ãrõ reive, jaha jevy katu tetã ruvicha David rendápe.

11Ha tetã ruvicha David ohendu guive tetãyguakuéra ñe’ẽguyguy omondo peteĩ hembiguái pa’i Sadoc ha Abiatárpe, he’iukávo: Peñe’ẽ Judaygua karai ancianokuérape ha pegueru ichupekuéra: Mba’érepa peha’ãrõve peju jevy hag̃ua che rendápe che aiko jevy hag̃ua pene retã ruvicha ramo.

12Peẽ ningo che ryke’ykuéra voi, che kangue ha che ro’o. Mba’érepa pende tapykuéta pegueraha jevy hag̃ua tetã ruvichápe hogateépe.

13Pejéta avei Amasápe: Nde piko ndaha’éi avei che kangue ha che ro’o. Ndoikói ramo ndehegui soldádo ruvicha che renondépe, opaite ára peve, Joab rendaguépe, Ñanderuete tachenupã nupã.

14Péicha David oñembopy’apeteĩ jevy opaite Judayguakuéra ndive, ha peteĩ kuimba’e ñe’ẽicha he’iuka tetã ruvichápe: Eju jevy nde, ha opaite ne rembiguaikuéra ndive, oresãmbyhy hag̃ua.

15Upéramo tetã ruvicha David og̃uahẽ pe Jordan ypy peve. Ha Judayguakuéra ou Gilgal peve ohug̃uaitĩ hag̃ua hetã ruvicha ndive, ha ombohasa hag̃ua ichupe pe ysyry Jordan rupi.

16Ha Siméi, Gera ra’y, Benjamin ñemoñare, Bahurimguáva, pya’e pya’e oguejy Judaygua kuimba’ekuéra ndive ohug̃uaitĩ hag̃ua tetã ruvicha Davídpe.

17Ha hendive ou 1.000 kuimba’e Benjaminguáva, ha avei Siba, Saul rogaygua rembiguaiguasu, 15 ita’yrakuéra ndive ha 20 hembiguaikuéra ndive, ha ha’ekuéra ohasa pe Jordan, tetã ruvicha og̃uahẽ mboyve.

18Ha ohasa rire hikuái pe y ojehasaha rupi ombosako’ipa ombohasa hag̃ua tetã ruvicha ha hogayguakuérape ibarcokuérape. Upéramo Siméi, Gera ra’y, oñesũ tetã ruvicha renondépe, ha’e ohasa mboyve pe ysyry Jordan.

19Ha he’i tetã ruvichápe: Ani reñongatu nde py’apýpe pe tembiapo vai ajapova’ekue ha ani nemandu’átei mba’evai ne rembiguái ojapova’ekue pe ára, nde che jára ha che retã ruvicha, resẽ ramoguare Jerusaléngui. Aníkena tetã ruvicha reñongatu umi mba’evai nde py’apýpe.

20Che, ne rembiguái, ahechakuaa añemoangaipa hague, ha ko árape aju che raẽte Jose rogaygua apytégui aguejy ahug̃uaitĩ hag̃ua che jára, ha che retã ruvichápe.

21Ha Abisai, Sarvia memby, he’i: Nomanoiva’erã piko Siméi, omaldeci haguére pe kuimba’e Ñanderuete oiporavova’ekuépe.

22Upémaramo David he’i: Mba’éiko che areko nendive Sarvia memby, ko árape reiko cherehe ija’e’ỹva ramo chepy’ara’ã hag̃ua. Omanova’erã piko ko árape peteĩ Israelgua, reimo’ã piko che ndaikuaaiha ko árape apyta jevyha Israel retã ruvicha ramo.

23Ha tetã ruvicha he’i Siméipe: Neremanomo’ãi. Ha tetã ruvicha ome’ẽ ichupe inẽ’ẽ.

24Mefibóset, Saul ra’y, oguejy avei ohug̃uaitĩ hag̃ua tetã ruvichápe. Ndojohéiri ipy ha noikytĩri hendyva, ndojohéiri avei ijao, pe ára tetã ruvicha osẽ guive ou jevy peve py’aguapy reheve.

25Ha Mefibóset osẽ Jerusaléngui ohug̃uaitĩ hag̃ua tetã ruvichápe, ha David he’i ichupe: Mefibóset, mba’éguipa nderehói chendive ra’e.

26Ha ha’e he’i jevy: Tetã ruvicha, che jára, che rembiguái chembotavyva’ekue, che voi ha’ékuri ichupe: Emboape chéve peteĩ búrro aha hag̃ua hi’ári tetã ruvicha rendápe; ne rembiguái ikarẽgui.

27Ha’e katu oñe’ẽvai rei cherehe, che jára ha che retã ruvicha renondépe; che jára ha che retã ruvicha katu ojogua ningo peteĩ yvága rembiguáipe; ejapókena ndéve iporãve háicha.

28Che ru rogayguakuéra omanombava’erãmo’ã ne renondépe, che jára ha che retã ruvicha katu omoĩ ne rembiguáipe ne mesápe okaru hag̃ua umi oñehenóiva apytépe. Mba’evete voi ndarekói ko’ã mba’e ári ajerureve hag̃ua tetã ruvichápe.

29Ha tetã ruvicha he’i ichupe: Mba’upéiko ñañe’ẽvéta. Che ha’émakuri nde ha Siba peñomboja’otaha pe yvy rehe.

30Ha Mefibóset he’i hetã ruvichápe: Topytapa ichupe g̃uarã, che avy’áma che jára ha che retã ruvicha ou jevymaha py’aguapy reheve hógape.

31Avei Barzilái, peteĩ Galaadgua, oguejy Rogelímgui, ha ohasa pe Jordan tetã ruvicha ndive, omoirũ hag̃ua ichupe Jordan mboypýri.

32Ha Barzilái itujaitereíma, 80 áñoma oguereko, ha’e ome’ẽva’ekue tetã ruvichápe hembi’urã oĩ ramoguare Mahanaímpe, ha’égui voi kuimba’e ipirapire hetáva.

33Ha tetã ruvicha he’i Barziláipe: Ehasa chendive ha che romongarúta chendive Jerusalénpe.

34Ha Barzilái he’i tetã ruvichápe: Mboy áñopa ikatúne aikoveve, ajupi hag̃ua tetã ruvicha ndive Jerusalénpe.

35Ko árape aguerekóma 80 áño. Ikatútapa aiporavo gueteri mba’e iporãva ha ivaíva apytégui. Aha’ãkuaavétapa hi’upy ha imboy’upy. Ahendukuaavénepa kuimba’e térã kuña purahéi. Ma’erãpa aikóta mba’e pohýi ramo che jára ha che retã ruvichápe g̃uarã.

36Che amoirũsénte tetã ruvichápe Jordan mboypýri amo gotyove. Mba’érehepa tetã ruvicha chembotuichase.

37Che ajerure ndéve ehejána ne rembiguái tojevy, ha tamano che távape, añenokuaa hag̃ua che ru ha che sy tyvýpe. Péina ápe katu ne rembiguái Quimam, che ra’y, toho che jára ha che retã ruvicha ndive, rejapo hag̃ua hese ndéve iporãve háicha.

38Ha tetã ruvicha he’i: Tou katu Quimam chendive, ha che ajapóta hese pe ndéve iporãve háicha, ha opaite mba’e rejeruréva chehegui, che ajapóta.

39Upérõ opaite tetãygua ohasa pe Jordan; ha tetã ruvicha David ohasa rire pe Jordan, ha’e ohetũ Barziláipe ha ohovasa ichupe, ha upéi ha’e ojevy hógape.

40Uperire tetã ruvicha ohasa Gilgálpe, ha Quimam ou hendive; ha mayma Juda soldádo aty omoirũ tetã ruvichápe, upéicha avei Israel soldádo aty mbytere.

41Upérõ opaite kuimba’e Israelgua ou tetã ruvicha rendápe, ha he’i ichupe: Mba’érehe piko opaite kuimba’e Judaygua, ore pehẽnguekuérava oñemomba’emava’ekue nderehe, ha ombohasákuri tetã ruvicha ha hogayguakuérape pe ysyry Jordan rupi.

42Ha Judayguakuéra ombohovái opaite Israelguápe: Pe tetã ruvicha ore pehẽnguetégui voi. Ha mba’ére piko pévare peñembopochy. David piko oremongaru, térãpa rohupity ichugui oimeraẽva jopói.

43Upéramo umi kuimba’e Israelgua ombohovái jevy, ha he’i Judayguakuérape: Ore ningo 10 tríbu, upévare David ore mba’eve pendehegui. Mba’ére piko oreapo’ietéra’e. Ndaoréi raẽpa roñe’ẽra’e rogueru jevy hag̃ua ore retã ruvichápe. Ha umi kuimba’e Judaygua oñe’ẽ pohyieteve Israel kuimba’ekuérape.

← Chapter 18 Jump to: Chapter 20 →