2 Samuel 14

Guarani 2015 (Ñanderuete Ñe’ẽ Porã 2015)

← Chapter 13 Jump to: Chapter 15 →

1Joab, Sarvia memby, oikuaávo tetã ruvicha py’apy ohecha nga’uitereiha Absalónpe,

2omondo Tecóape ogueru hag̃ua peteĩ kuña iñarandúva, ha he’i ichupe: Ajerure ndéve, reiko hag̃ua imba’embyasy gua’úva ramo, eñemonde ao vosá, ani remohyakuã nde rete acéite ryakuã porãme, reikóta uvei peteĩ kuña are guivéma oikóva imba’embyasýva ramo peteĩ omanomava’ekue rehe.

3Ha reikéta tetã ruvicha rendápe, ha reñe’ẽta ichupe opaite ñe’ẽ amombe’útava guive ndéve ko’ág̃a.

4Upéi pe kuña Tecoaygua oike tetã ruvicha rendápe, ha ojeity yvýpe ovapývo, ombotuicha ichupe ha he’i: Chepytyvõmína, che retã ruvicha.

5Ha tetã ruvicha he’i ichupe: Mba’épa ojehu ndéve. Ha ha’e he’i jevy ichupe: Che ningo peteĩ kuña imenave’ỹva, che ména omanóma.

6Ha ne rembiguái ningo imemby mokõi, ha ãva oiko vai oñondive ñúme, ha ndaipórigui avave oipe’ava’erã ojuehegui, peteĩ oikutu ambuépe ha ojuka ichupe.

7Ha péina mayma che génteva opu’ã cherehe he’ívo: Eme’ẽke pe tyke’ýra jukaharépe, rojuka hag̃ua avei ichupe ojuka haguére ityke’ýrape. Péicha ramo ningo oñemboguéta tatapỹimi hembýva chéve, ndopytamo’ãvéi che ména réra ha iñemoñare yvy apére.

8Upémaramo tetã ruvicha he’i pe kuñáme: Tereho nde rógape, ha che ha’éta ojejapova’erãva nderehehápe.

9Ha pe kuña Tecoaygua he’i tetã ruvichápe: Tetã ruvicha, che jára, pe teko ñaña to’a cheárinte ha che ru rogaygua ári; tetã ruvicha ári ndo’amo’ãi ha’e oikóta hekopotĩva ramo.

10Ha tetã ruvicha he’i ichupe: Oĩ ramo pe oñe’ẽvaíva nderehe, eru chéve, ha ha’e nandejopymo’ãvéi.

11Upémaramo pe kuña he’i: Ajerure ndéve che retã ruvicha, tanemandu’a Ñanderuete, nde Jára rehe, ani hag̃ua oñeñohẽ avei ambue che memby ruguykue ha ha’e oñehundi avei. Ha David he’i ichupe: Ñanderuete rekovére, ndo’amo’ãi yvýpe peteĩ ne memby akãrague jepe.

12Ha pe kuña he’i: Ajerure ndéve ehejána ne rembiguáipe te’ive peteĩ ñe’ẽmi ndéve. Ha ha’e he’i: Eñe’ẽ.

13Upémaramo pe kuña he’i: Mba’érehepa, nde neremoingéira’e avei ne akãme ãichagua mba’e Ñanderuete retãygua rehe. Nde erégui ko’ã ñe’ẽ ko’ãva, nde voi reñembojovake, tetã ruvicha ndoipotáigui avei ita’ýra omosẽva’ekue ou jevy hag̃ua.

14Añetehápe ñande ningo ñamanombava’erã, ha jaiko ku ýicha oñeñohẽva’ekue yvýre, ndaikatuvéima oñemono’õ jevy; Ñanderuete voi ndoipe’amo’ãi pe tekove yvy apégui, oñeha’ãmba katu ou jevy hag̃ua pe oñemosẽva’ekuépe.

15Aju amombe’u hag̃ua, ko’ã mba’e tetã ruvicha, che járape, tetãyguakuéra chemongyhyjéguinte; ha ne rembiguái he’i ipy’apýpe: Ha’éta ko’ã mba’e tetã ruvichápe; ikatúntemo ha’e ojapo hembiguái ñe’ẽ.

16Pe tetã ruvicha cherendúta, chepytyvõta ha cheguenohẽta pe kuimba’e pógui, ohundiséva che membýpe ha che rekove avei.

17Ne rembiguái katu he’i: Tajohu angapyhy ne ñe’ẽ rupi, che jára; che retã ruvicha ningo oiko Ñanderuete yvága rembiguáicha, oikuaa hag̃ua ivai ha iporãva. Péicha Ñanderuete, nde Jára toĩ nendive.

18Upéramo David he’i pe kuñáme: Che ajerure ndéve ani reñomítei chehegui mba’evete amba’eporandútava ndéve. Ha pe kuña he’i: Eñe’ẽ che jára, che retã ruvicha.

19Ha pe tetã ruvicha he’i: Noĩripa Joab po nendive opaite ko’ã mba’e ko’ãva rapykuéri. Pe kuña oñe’ẽ jevy ha he’i: Toikove che jára ánga nañañemboykekuaái akatúa térã asu gotýo, opaite che jára ha che retã ruvicha he’iva’ekuégui; añetéko, ne rembiguái Joab voi chembou, ha ha’e omoĩ ne rembiguái jurúpe ko’ã ñe’ẽ ko’ãva.

20Aiko hag̃ua ambue ramoguáicha, Joab ne rembiguái ojapo ko’ã mba’e; ha che jára katu iñarandu Ñanderuete yvága rembiguáicha, ha oikuaa voi umi mba’e ojehúva ñane retãme.

21Upémaramo pe tetã ruvicha he’i Joábpe: Péina ápe che voi ajapopa ko’ã mba’e; tereho ha egueru jevy che ra’y karia’y Absalónpe.

22Ha Joab ojeity yvýpe ovapývo ha ombotuicha ha ohovasa rire tetã ruvichápe he’i: Ko árape ne rembiguái oikuaa ojohu hague py’aporã nde resa renondépe, tetã ruvicha, che jára ojapógui hembiguái ñe’ẽ.

23Uperire Joab opu’ã ha oho Gesúrpe, ha ogueru Absalónpe Jerusalénpe.

24Ha David he’i: Toho hógape, ha ani ha’e ohecha che rova, upéicha Absalon ojevy hógape, ndohechái katu tetã ruvichápe.

25Ha Israel retãme ndaipóri avave iporãvéva ha ijukyvéva Absalóngui; ipy pyte guive iñakã mbyte peve ndaipóri hese mba’eve ivaíva.

26Meme áño ha’e oikytĩuka peteĩ jevýnte iñakãrague anítei ipohyiete ichupe g̃uarã ha ipohyikue ohupity 2,23 kílo.

27Ha Absalon ita’ýra mbohapy ha peteĩ itajýra, hérava Tamar, péva peteĩ kuña neporãva.

28Ha Absalon oiko ramo jepe mokõi áño pukukue Jerusalénpe, ha’e ndohechái gueteri hetã ruvicha rova (itúvape).

29Ha Absalon ohenoiuka Joábpe omondo hag̃ua ichupe tetã ruvicha rendápe, ha’e katu ndouséi; upévare ohenoiuka jevy ichupe, ha ndouséi jevy.

30Upémaramo he’i hembiguaikuérape: Pema’ẽ, Joab kokue oĩ che kokue yke rehe, ha oguereko upépe cebáda (ojogua trígope); tapeho ha pemyendy hese tata. Ha Absalon rembiguaikuéra oho ha ohapy Joab kokue.

31Upéramo Joab opu’ã ha ou Absalon rógape, ha he’i ichupe: Mba’érehepa ne rembiguaikuéra ohapy che kokue.

32Ha Absalon he’i Joábpe: Péina ápe, che amondókuri ndepiári, reju hag̃ua ko’ápe, romondo hag̃ua tetã ruvicha rendápe ha’e hag̃ua ichupe: Ma’erãpa ajúra’e Gesúrgui, iporãveva’erãmo’ã aime ramo gueteri upépe. Tahechána ko’ág̃a tetã ruvicha rova; ha oĩ ramo chepype angaipa tachejuka.

33Upérõ Joab oho tetã ruvicha rendápe ha omombe’u ichupe. Upémaramo David ohenoiuka Absalónpe, ha ha’e ou tetã ruvicha rendápe, ha oñakãity yvy peve hetã ruvicha renondépe, ha David ohetũ Absalónpe.

← Chapter 13 Jump to: Chapter 15 →