2 Samuel 20

Guarani 2015 (Ñanderuete Ñe’ẽ Porã 2015)

← Chapter 19 Jump to: Chapter 21 →

1Ha oiko upépe peteĩ kuimba’e iñañáva, hérava Seba, Bicri ra’y, peteĩ Benjamingua, péva ombopu pe turu, ha he’i: Ñande ndajarekói mba’eve David ndive, ha mba’evete Isai ra’y ndive, Israelguáva guive tohopa hógape.

2Péicha opaite kuimba’e Israelgua oheja rei Davídpe oho hag̃ua Seba, Bicri ra’y rapykuéri; Judayguakuéra katu oho David rapykuéri pe ysyry Jordan guive Jerusalen peve.

3Ha David og̃uahẽ rire hógape, Jerusalénpe, omoinge umi 10 kuña ohejava’ekue oñangareko hag̃ua hóga rehe peteĩ ógape ha ome’ẽ ichupekuéra hembi’urã; ha araka’eve ndoikovéi hendivekuéra, opyta hikuái ñembotyhápe imena’ỹvaicha, omano meve.

4Upéi he’i tetã ruvicha Amasápe: Embyatyuka chéve kuimba’ekuéra Judayguáva guive, ha mbohapy ára haguépe pejupa che rendápe.

5Amasa oho ombyatypa hag̃ua Judayguakuérape; hi’areteve katu oje’eva’ekuégui ichupe.

6Upéicharõ David he’i Abisaípe: Seba, Bicri ra’y, ko’ág̃a ojapóta ñanderehe mba’evaieteve Absalóngui; upévare ejapyhy nde jára rembiguaikuéra, ha tereho hapykuéri anítei oike peteĩ táva oñemongorávape ha okañy ñandehegui.

7Upémaramo Abisai ombyaty opaite kuimba’e oĩva Joab poguýpe, umi Ceretgua, umi Peletgua ha mayma ipy’aguasúva, ha osẽ hikuái Jerusaléngui omuña hag̃ua Seba, Bicri ra’ýpe.

8Ha oĩ jave hikuái pe itaguasu oĩva Gabaon ypýpe, ohug̃uaitĩ ichupekuéra Amasa. Ha Joab omonde hetemo’ãha ha hi’ári omoĩ iku’akuaha ha ikyse akua hyru reheve, ha péva oheja ho’a ichugui oñemotenondévo.

9Upéramo Joab he’i Amasápe: Oho porãntepa ndéve, che ryke’y. Ha ojapyhy ipo akatúvape Amasa rendyva, ku ohetũ hag̃uáicha ichupe.

10Ha Amasa nopenái pe kyse akua rehe oĩva Joab po asúpe; ha Joab oikutu ichupe ipy’a juruetépe, ha oñohẽ yvy rehe hyekue, ha ho’a ha omano, oikutu jevy’ỹre ichupe. Upéi, Joab ha ityvýra Abisai oho hikuái Seba, Bicri ra’y rapykuéri (omuñávo ichupe).

11Ha peteĩ kuimba’e Joab poguy pegua oñembo’y ijypýpe, ha he’i: Oimeraẽva ohayhúva David ha Joábpe, toho Joab rapykuéri.

12Ha Amasa ojepyso tape mbytépe ha oñemongy’apa huguýpe; ha mayma ohasáva guive opyta ha oma’ẽ hese. Upévare upe kuimba’e oĩva Joab poguýpe ohechávo oimeraẽva omombytaha, omboyke Amasa retekue tapégui ñu gotýo, ha omyasãi hi’ári peteĩ ahoja.

13Ha omboyke rire hetekue tapégui, oúva guive ohasapa omoirũ Joábpe, omuña hag̃ua Seba, Bicri ra’ýpe.

14Ha Seba ohasa opaite Israel tríbu yvy rupi Abel-bet-maaca peve, ha opaite iñirũnguéra oñembyaty oho hag̃ua avei hapykuéri.

15Joab katu, ikuimba’ekuéra ndive, omongora Abel-bet-maacápe, ha omopu’ã hikuái yvy atýra pe táva tápia renondépe; ha opaite tetãygua oĩva Joab ndive oñeha’ã oity hag̃ua pe tápia yvate.

16Upémaramo peteĩ kuña iñarandúva osapukái tavapy guive he’ívo: Pehendumi, pehendumi; ajerure peẽme pejemi Joábpe toumi ko’ápe, añe’ẽ hag̃ua hendive.

17Ha Joab oñembojávo hese, pe kuña he’i: Ndéiko Joab. Ha ha’e he’i: Che ha’e. Ha ha’e he’i ichupe: Ehendumi ne rembiguái ñe’ẽ. Ha ha’e he’i: Ere katu ha torohendu.

18Upémaramo ha’e oñe’ẽ jevy ha he’i: Ymaite ningo oje’emiva’ekue: Upe oikuaaséva peteĩ mba’e toporandu Abelguápe; ha péicha ohupity umi mba’e oikuaaséva.

19Ore táva ohayhu py’aguapy ha nomoambuéi heko Israel táva apytépe; ha nde reñeha’ã rembyai hag̃ua peteĩ táva sy reheguáva Israel retãme. Mba’érehe piko rembyaireína Ñanderuete mba’éva.

20Joab he’i jevy: Mba’evéicha ramo ani ko’ã mba’e ojehútei chéve, che nahundiséi ha nambyaiséi pende táva.

21Ore rohekánte peteĩ kuimba’e Efrain cérro peguápe, hérava Seba, Bicri ra’y, oñemoĩva tetã ruvicha David rehe; pévape añoite peme’ẽ, ha aháta pende távagui. Ha pe kuña he’i Joábpe: Péina ápe iñakãngue oñemombóta ndéve tápia árigui.

22Ha pe kuña iñarandúva oho oñe’ẽ hag̃ua itavayguakuéra ndive oakã’o hag̃ua Seba, Bicri ra’ýpe, ha omombo hikuái iñakãngue Joábpe; upérõ Joab ombopu pe turu ha ohopa hikuái hogakuérape. Ha Joab ou jevy tetã ruvicha rendápe Jerusalénpe.

23Péicha Joab omyakã jevy opaite Israel soldádo aty, ha Benaía, Joiada ra’y, omyakã Ceretgua ha Peletguakuérape.

24Ha Adoram omyakã impuésto cobraharakuérape, ha Josafat, Ahilud ra’y, oiko mburuvichaguasu ramo David poguýpe.

25Seva kuatia haihára, Sadoc ha Abiatar, pa’ikuéra ramo;

26ha Ira, peteĩ Jairgua, opyta David pa’i ramo.

← Chapter 19 Jump to: Chapter 21 →