2 Samuel 9

Guarani 2015 (Ñanderuete Ñe’ẽ Porã 2015)

← Chapter 8 Jump to: Chapter 10 →

1Ha David oporandu: Hemby piko peteĩ Saul rogaygua, aiporiahuvereko hag̃ua ichupe Jonatan rayhupápe.

2Ha oiko peteĩ tembiguái Saul rogaygua, hérava Siba, upévape oñehenói ou hag̃ua David rendápe. Ha tetã ruvicha David oporandu ichupe: Nde piko Siba. Ha ha’e he’i: Che ha’e, ne rembiguái.

3Upérõ tetã ruvicha oporandu ichupe: Hemby gueteri piko Saul rogayguáva, ahechauka hag̃ua ichupe Ñanderuete poriahuvereko. Ha Siba he’i tetã ruvichápe: Hemby gueteri peteĩ Jonatan ra’y, oguata’ỹva.

4Upéramo tetã ruvicha oporandu ichupe: Mamópa oime. Ha Siba he’i jevy tetã ruvichápe oime Maquir, Amiel ra’y rógape, Lodebar távape.

5Upéramo tetã ruvicha David omondo ipiári ogueru hag̃ua ichupe Maquir, Amiel ra’y rógagui, Lodebar távagui.

6Ha Mefibóset, Jonatan ra’y, Saul ra’yre, ou David rendápe, ojeity hováre yvýpe omomba’e hag̃ua Davídpe. Ha David he’i: Mefibóset. Ha ha’e he’i: Na’ápe aĩ, ne rembiguái.

7Ha David he’i ichupe: Ani rekyhyjétei, che añetehápe roiporiahuverekóta nde ru Jonatan rayhupápe, ha ame’ẽmbáta ndéve nde ru Saul yvy; ha nde katu tapiaite rekarúta che mesápe.

8Ha’e oñakãityhápe he’i: Máva piko che, ne rembiguái, rema’ẽ hag̃ua peteĩ cheichagua jagua re’õngue rehe.

9Upéramo tetã ruvicha ohenói Siba, Saul rembiguaikuépe, ha he’i ichupe: Opaite Saul ha hogaygua mba’ekue guive che ame’ẽmba nde jára ra’ýpe.

10Nde katu remba’apóta ijyvy rehe, nde ra’y ha ne rembiguaikuéra ndive, ha reñangarekóta imba’ekue rehe ikatu hag̃uáicha nde jára ra’y oguereko tembi’u ho’u hag̃ua; ha Mefibóset, nde jára ra’yre okarúta tapiaite che mesápe. Ha Siba oguereko 15 ta’ýra ha 20 tembiguái.

11Ha Siba he’i jevy tetã ruvichápe: Opaite mba’e nde ere hagueichaite ne rembiguáipe, ajapopáta katuete. Upérõ tetã ruvicha he’i jevy: Mefibóset katu okarúta che mesápe, peteĩ tetã ruvicha ra’ytee ramoguáicha.

12Ha Mefibóset ita’yrami peteĩ, hérava Mica. Ha Siba pehẽnguekuéra ha hogayguakuéra opyta Mefibóset rembiguái ramo.

13Ha oiko Mefibóset Jerusalénpe, tapiaite okaru tetã ruvicha mesápe; ha ipy mokõivéva ndikatúi omongu’e.

← Chapter 8 Jump to: Chapter 10 →