2 Samuel 24

Guarani 2015 (Ñanderuete Ñe’ẽ Porã 2015)

← Chapter 23 Jump to:

1Ñanderuete ipochy Israel ndive, David oñembotuicha haguére ipy’apýpe, upévare Ñanderuete voi omoinge David akãme ha’e oipapauka hag̃ua Israel ñorãirõharakuérape, upévare David he’i Joábpe: Tereho ha eipapa Israelgua ha Judayguakuérape.

2Ha tetã ruvicha David he’i Joab, isoldádo ruvichápe, oĩva hendive: Tereho ko’ág̃a mayma Israel retã rehe, Dan guive Beerséba peve, ha eipapa ñane retãyguakuérape, aikuaa hag̃ua mboýpa oĩ hikuái.

3Joab katu he’i hetã ruvichápe: Ñanderuete, nde Jára, tombohetave 100 jevyve ne retãyguakuéra, ha che jára ha che retã ruvicha tohechakuaa gueteri umívape; ma’erã piko che jára ha che retã ruvicha oipapaukase ñane retãyguakuérape.

4Ha tetã ruvicha ñe’ẽ imbareteve Joábgui ha isoldádo ruvichakuéra ñe’ẽgui. Upévare osẽ Joab ambue soldádo ruvichakuéra ndive, ojapo hag̃ua David rembipota ha oipapa hikuái Israel retãyguakuérape.

5Ha ohasávo pe Jordan opyta hikuái Aroérpe, oĩva Gad ñúme, Gad ha Jazer gotýo.

6Upéi oho hikuái Galaádpe, ha Hodsi yvypépe; ha upégui Danjaánpe ha Sidon jere rehe.

7Upéi oho Tíro, pe táva oñemongorapyrévape ha mayma Hevgua ha Canaanguakuéra távape, osẽ meve hikuái Beerséba, Négev peguápe, oĩva Juda departaméntope.

8Oguatapa rire opaite tetãpy rehe, ohasa 9 jasy ha 20 ára.

9Ha Joab omombe’u Davídpe ojohu hague Israelguakuéra apytépe 800.000 kuimba’e imbaretéva ohekyikuaáva kyse puku, ha Judaygua apytépe 500.000 kuimba’e.

10David oipapaukapa rire hetãyguakuérape, ipy’apy ñe’ẽ oikarãi ichupe ha’e ojapo vai haguére ha David he’i Ñanderuetépe: Ivaiete che rembiapo ajapova’ekue; ha ko’ág̃a ajerure ndéve, eipe’a chehegui che angaipa, chetavyete aipapauka haguére che retãyguakuérape.

11Ha pyhareve David opu’ã rire, Ñanderuete ñe’ẽ ou proféta Gádpe, péva David techapahára, ha he’i ichupe:

12Tereho ha ere Davídpe: Péicha he’i pende Ruete: Mbohapy jehavira ahechaukáta ndéve, nde reiporavo hag̃ua ijapytégui peteĩnte, Che rohavira hag̃ua.

13Upéicha Gad ou David rendápe ha oikuaauka ichupe, ha he’i: Reipotápa ou ne retãme 7 áño pukukue ñembyahýi térã nde rekañy mbohapy jasy nderehe ija’e’ỹvagui, térãpa mbohapy ára javeve peteĩ mba’asy vaiete oñemyasãiva ne retãme. Ejepy’amongetáke ko’ágã, ha eiporavo ko’ã mbohapy jehavira apytégui pe mba’e, amombe’u jevy hag̃ua chembouharépe.

14Upémaramo David he’i Gádpe: Tuicha ajepy’apy; toro’ánte Ñanderuete pópe, iporiahuvereko ituichave, ani hag̃ua ha’a yvyariguakuéra pópe.

15Upérõ Ñanderuete ombou mba’asy vai iñasãiva Israel retãpy rehe pe pyhareve guive pe ára he’i hague peve; ha omano heta hetãyguakuéra, Dan guive Beerséba peve, 70.000 kuimba’e.

16Ha pe yvága rembiguái oipyso ipo Jerusalen ári ombyai hag̃uáicha, Ñanderuete oñemomba’embyasy pe tembiapo vai péva rehe, ha he’i ijyvága rembiguái, tetãyguakuéra mbyaihárape: Iporãntema ko’ág̃a, ejoko nde po. Ha pe yvága rembiguái oĩhína pe Araúna, Jebusgua ñemitỹngue mopotĩhápe.

17Ha David he’i Ñanderuetépe, ohechávo pe yvága rembiguái ohundi hetãyguakuérape: Che añemoangaipákuri, che rembiapo iñañákuri; mba’éiko ojapóra’e che retãyguakuéra. Ajerure ndéve nde po tou che ha che ru róga ári.

18Ha Gad ou David rendápe pe árape, ha he’i ichupe: Ejupi ha emopu’ã peteĩ kuave’ẽmby renda Ñanderuetépe g̃uarã, Araúna, pe Jebusgua ñemitỹngue mopotĩhápe.

19Ha David ojupi, Gad he’i haguéicha ichupe, ha Ñanderuete oipota háicha.

20Ha Araúna ohechávo tetã ruvicha ha hembiguaikuéra ouha henda gotýo, osẽ ojohu hag̃ua ichupe ha ojayvy tetã ruvicha renondépe, hova omboja peve yvy rehe.

21Ha Araúna he’i: Mba’érehe piko che jára ha che retã ruvicha ou hembiguái rendápe. Ha David he’i jevy: Ajogua hag̃ua ndehegui ne ñemitỹngue potĩha renda, amopu’ã hag̃ua upépe kuave’ẽmby Ñanderuetépe g̃uarã, ikatu hag̃uáicha opi ñemanoita tetãyguakuéra apytégui.

22Ha Araúna he’i Davídpe: Ejapyhy katu ha eikuave’ẽ nde, che jára ha che retã ruvicha reipotahápe; péina ápe torokuéra kuave’ẽmbyrã ha umi cangálla ha mba’e ra’ỹi jykyiha katu eiporu jepe’a ramo.

23Opaite ko’ã mba’e Araúna ome’ẽ tetã ruvichápe. Ha upéi Araúna he’i tetã ruvichápe: Jahve, nde Jára, taipy’a porãite nendive.

24Ha tetã ruvicha he’i Araúnape: Nahániri, hepyetépente che ajoguase ndehegui; ndaikuave’ẽmo’ãi Ñanderuetépe kuave’ẽmby oñeme’ẽ reiva’ekue chéve. Upéramo David ojogua pe ñemitỹngue potĩha ha gueikuéra 558 grámo pláta rehe (óro morotĩ rehe).

25Ha upépe David omopu’ã peteĩ kuave’ẽmby renda Ñanderuetépe g̃uarã ha oikuave’ẽ kuave’ẽmby ojehapypáva ha kuave’ẽmby py’aguapy reheguáva; ha Ñanderuete ohendu David mba’e jerure asy, ha opi pe mba’asy vai Israel retãme.

← Chapter 23 Jump to: