2 Samuel 6

Guarani 2015 (Ñanderuete Ñe’ẽ Porã 2015)

← Chapter 5 Jump to: Chapter 7 →

1Ha David oiporavo Israel apytégui 30.000 kuimba’e.

2Ha David opu’ã oho hag̃ua Baala, Juda peguápe, opaite hetãyguakuéra ndive ogueru hag̃ua upégui Ñanderuete karameg̃ua, oñehenoiháme yvága atykuéra Jára rérape, pe oikóva querubinkuéra pa’ũme.

3Omoĩ hikuái Ñanderuete karameg̃ua peteĩ cárro pyahúpe, ha ogueraha hikuái Abinadab rógagui, oĩva cérro rembe’ýpe: Ha Uza ha Ahío, Abinadab ra’ykuéra, omboguata pe cárro pyahu.

4Péicha ogueraha hikuái Ñanderuete karameg̃ua Abinadab rógagui, oĩva pe cérro rembe’ýpe, Uza oguata pe cárro ykére ha Ahío oho pe karameg̃ua renonderãme.

5Ha David ha opaite Israelguakuéra rogaygua ojeroky joa Ñanderuete renondépe opaichagua mba’epu reheve: Árpa, mbaraka, mba’e pararã, mimby ha platillokuéra reheve.

6Ha og̃uahẽvo hikuái Nacon kokue ypýpe, Uza oipyso ipo Ñanderuete karameg̃ua rehe ojoko hag̃ua, umi guéi oñepysãngágui.

7Ha Ñanderuete pochy hendy Uza rehe, ha upepete ombohasyete ichupe, ha ho’ávo, omano Ñanderuete karameg̃ua ykére, opoko haguére pe karameg̃ua rehe, (pa’ikuérante ikatúva opoko).

8Ha David oñembyasyete Ñanderuete ojuka haguére Uzápe, ha ombohéra pe yvy pehẽngue Perez-Uza (he’ise ñenupã), ko ára peve.

9Ha David okyhyje Ñanderuetégui pe árape ha he’i: Mba’éichapa amog̃uahẽne Ñanderuete karameg̃ua Jerusalénpe.

10Upéicharupi David ndoguerusevéi Ñanderuete karameg̃ua itávape ha oguerahauka Obed-edom rógape, ha’e ningo peteĩ Gatgua.

11Ha Ñanderuete karameg̃ua opyta Obed-edom peteĩ Gatgua rógape mbohapy jasy, upévare Ñanderuete ohovasa Obed-edómpe ha hogayguakuérape.

12Oñemombe’u tetã ruvicha Davídpe, oje’évo ichupe: Ñanderuete tuicha ohovasa Obed-edom rogayguakuérape ha opaite oguerekóva guive, Ñanderuete karameg̃ua rupi. Upémaramo David oho, ha ogueru vy’apópe Ñanderuete karameg̃ua Obed-edom rógagui David távape.

13Ha Ñanderuete karameg̃ua ojeguerahamimi rire, 6 páso, David oikuave’ẽ peteĩ tóro ha peteĩ tóro ra’yrusu oñemongyrapyréva,

14ha David ojeroky imbaretekue ome’ẽ háicha Ñanderuete renondépe; ha oñemonde ao jeguaka (efod) pa’i omondévape ojejapopyréva líno inimbógui.

15Ha péicha David ha opaite Israelguakuéra ogueraha Ñanderuete karameg̃ua vy’apópe ha turu púpe.

16Ha Ñanderuete karameg̃ua og̃uahẽvo David távape, péina Mical, Saul rajy, oma’ẽ peteĩ hovetã guive, ha ohecha tetã ruvicha Davídpe opopo ha ojerokyhína Ñanderuete karameg̃ua renondépe; ha Mical omboyke ichupe ipy’apýpe.

17Upéi omoinge hikuái Ñanderuete karameg̃ua hendag̃uáme peteĩ óga aoguiguápe David omopu’ãukava’ekue; ha David oikuave’ẽ kuave’ẽmby ojehapypáva ha heta ambue kuave’ẽmby py’aguapy reheguáva Ñanderuete renondépe.

18Ha David oikuave’ẽmbávo kuave’ẽmby ojehapypáva ha kuave’ẽmby py’aguapy reheguáva, ohovasa hetãyguakuérape Ñanderuete rérape.

19Ha ome’ẽ opaite Israelguápe, kuimba’e ha kuñakuérape, peteĩteĩme peteĩ pan, so’o pehẽngue ha pan he’ẽ parral’ aguiguaréva. Uperire tetãyguakuéra peteĩteĩva oho jevy hógape.

20Upéi ojevy avei David omomaitei hag̃ua hogayguakuérape; ha Mical osẽ ojejohu hag̃ua hendive, ha he’i: Mba’eichaitépa opyta porã ko árape Israel retã ruvicha oñemboi rire umi hembiguái kuñakuéra rovake, ojapo háicha umi kuimba’e otĩ’ỹva.

21Upéramo David he’i Micálpe: Ñanderuete renondépe ajapo, cheporavova’ekue chererohoryvégui nde rúgui ha mayma nde rogayguágui, chemoingo hag̃ua mburuvichaguasu ramo Ñanderuete retã, Israel ári, upéicharupi ajeroky Ñanderuete renondépe.

22Ha ko’yteve añemomirĩvéta ko ára kóvagui, ha nde resápe che ndaha’éi ramojepe mba’eve; umi tembiguái kuñáva renondépe umi nde reñe’ẽvaiha rehe, chembotuicha ningo hikuái.

23Ha Mical, Saul rajy, araka’eve naimembýi omanoha ára peve.

← Chapter 5 Jump to: Chapter 7 →