2 Samuel 21

Guarani 2015 (Ñanderuete Ñe’ẽ Porã 2015)

← Chapter 20 Jump to: Chapter 22 →

1Ou peteĩ ñembyahýi mbohapy áño pukukue David oikoveha árape, ha David omba’eporandu Ñanderuetépe, ha Ha’e he’i ichupe: Péva ojehu Saul ojuka haguére heta Gabaonguápe.

2Upémaramo tetã ruvicha David ohenói umi Gabaonguápe, ha oñe’ẽ hendivekuéra. Umi Gabaongua ndaha’éi Israel ra’ykuéra, ha’ekuéra Amorguakuéra rembyrénte, ha Israel ra’ykuéra oñembopy’apeteĩva’ekue hendivekuéra, Saul katu oñeha’ã ojukapa hag̃ua ichupekuéra ohayhuitereígui Israel ha Juda ra’ykuérapente.

3David he’i Gabaonguakuérape: Mba’épa ajapóta penderehe amboyke hag̃ua Saul rembiapo vaikue ha peẽ pehovasa jevy hag̃ua Ñanderuete retãme.

4Ha Gabaonguakuéra he’i ichupe: Ore ndoroipotái pirapire térã óro Saul rogayguágui, ha ndoroipotái avei omano Israelgua kuimba’e. Upérõ David he’i ichupekuéra: Peẽ pejéva guive, ajapóta.

5Ha’ekuéra he’i jevy tetã ruvichápe: Pe kuimba’e orembyaiseva’ekue, ha oñeha’ãmbaiteva’ekue orehundiete hag̃ua Israel retãpýgui, ichuguínte

6toñeme’ẽ oréve 7 kuimba’e iñemoñaréva apytégui, ore rojuvy hag̃ua umívape Ñanderuete renondépe Gibéape, Saul onace haguépe ha Ñanderuete oiporavo haguépe ichupe. Ha tetã ruvicha he’i ichupekuéra: Che amoĩta ichupekuéra pende pópe.

7David osalva Mefibóset, Jonatan ra’ýpe, Saul ra’yre; David ha Jonatan, Saul ra’y, oñembopy’apeteĩva’ekue Ñanderuete renondépe.

8Upéi tetã ruvicha oapresa mokõi Rispa membykuimba’e, péva Aja membyre, mokõivéva imembyva’ekue Saúlgui, hérava Armoni ha Mefibóset; ha 5 Merab memby, péva Saul rajy ha ha’e imembyva’ekue Adriélgui, Barzilái, pe Meholagua ra’yre.

9Ha David omoĩ ko’ã 7 Saul ñemoñare Gabaonguakuéra pópe, ha ha’ekuéra ojuvy ichupekuéra pe cérrope Ñanderuete renondépe; ha péicha ko’ã 7 omano oñondive; ãva ojejuka, oñepyrũvo oñemono’õ cebáda (ojogua trígope).

10Upémaramo Rizpa, Aja memby, ogueraha peteĩ ao hũ ha omyasãi ijupe g̃uarã peteĩ ita yvate ári, upe guive oñangareko imemby retekuéra rehe, ani hag̃ua yryvukuéra oñemboja hetekue rehe arakuépe térã mymba ñarõ pyharekuépe. Rizpa oñangareko hesekuéra heta semána rupi, cebáda ñemono’õ guive pe ama puku ára oñepyrũ jevy peve (péva rirénte oñeñotỹkuaa hetekue).

11Ha oñemombe’u Davídpe, Rizpa, Aja memby, Saul kuñakue ojapóva.

12Upémaramo David oho ha ojapyhyuka Saul kangue ha ita’ýra Jonatan kanguekue, umi kuimba’e Jabes, Galaadguágui, ha’ekuéra oipe’ava’ekue Bet-san plázagui, umi Filisteaygua omosãingo ramoguare ichupekuéra, ojuka rire Saúlpe Gilbóape,

13ha upégui oguerahauka Saul ha ita’ýra Jonatan kanguekue, ha ogueraha avei umi ojejuvyva’ekue kanguekue,

14oñotỹmba hag̃ua Benjamin yvýpe, Zelápe, itúva Cis tyvýpe; ha ojejapopaite tetã ruvicha David he’iukava’ekue guive. Upeguive Ñanderuete ojapo jevy mba’eporã Israel retã rehe.

15Filisteayguakuéra ou jevy ojeity hag̃ua Israel ári, ha David, hembiguaikuéra ndive, oho oñorãirõ hag̃ua hendivekuéra; ha David ikane’õve ohóvo.

16Upérõ Isbi-benob, peteĩ kuimba’e ijyvateitereíva (gigánte) ñemoñare, ijyvyra puku akua apýra oguereko 3,35 kílo brónce omonde avei hetemo’ãha pyahu ha iku’akuápe peteĩ kyse puku pyahu, ha ha’e oñeha’ãmba ojuka hag̃ua Davídpe.

17Ha Abisai, Sarvia memby, og̃uahẽ oipytyvõ hag̃ua ichupe, ha oikutu pe Filisteayguápe ha ojuka ichupe. Upémaramo David irũnguéra oñe’ẽme’ẽvo he’i ichupe: Araka’eve ko ára guive tenonderã gotýo neresẽmo’ãvéima orendive ñorãirõme, aníntemo rembogue Israel resapeha.

18Oiko jevy peteĩ ñorãirõ Filisteayguakuéra ndive Góbpe; upéramo Sibecái, peteĩ Husatgua, ojuka Sáfpe, kóva avei umi kuimba’e ijyvateitereíva ñemoñare.

19Oiko jevy ambue ñorãirõ Góbpe Filisteayguakuéra ndive; upéramo Elhanan, Jaaré-oregim ra’y, peteĩ Belengua, ojuka Goliat, Gatguápe, ijyvyra akua ýva ojogua pe yvyrápe ojeporúva ojepyaha hag̃ua ao.

20Upéi oiko jevy ambue ñorãirõ Gátpe, irundyháma, pépe oĩkuri peteĩ kuimba’e ijyvateitereíva, ha’e 6 ikuã, ha 6 ipysã avei, oñondivepa 24; ha’e avei kuimba’e ijyvateitereíva ñemoñare.

21Ko’ãva ohenói Israélpe ñorãirõme, ha Jonatan, Sima ra’y, David ryke’y ojuka ichupe.

22Ko’ã irundy kuimba’e ijyvateitereíva ñemoñare oiko Gátpe, ha’ekuéra ho’ava’ekue David ha hembiguaikuéra po rupi.

← Chapter 20 Jump to: Chapter 22 →