Judges 7

Hausa Arabic 2020 (أَتَّوْرَتْ دَ أَنَّبَاوَا)

← Chapter 6 Jump to: Chapter 8 →

1أَنَانً وَتَرَانَ، سَيْ يٜىٰرُبَّعَلْ، وَتُواْ جِدْعَوْنَ، تَرٜىٰدَ دُكَنْ سُواْجُواْجِنْسَ سُكَتَاشِ دَ سَسَّڢٜىٰ، سُكَ كَڢَ سَنْسَنِنْسُ كُسَدَ مَٻُٻُّغَرْ ضُوً هَرُوادْ؞ مِدِيَنَاوَا سُكَ كَڢَ سَنْسَنِنْسُ عَثِكِنْ ݣُورِنْ دَيَكٜىٰ تَأَرٜىٰوَ دَسُو، كُسَدَ تُدُنْ مُواْرٜىٰ؞

2يَهْوٜىٰهْ يَثٜىٰ وَ جِدْعَوْنَ «مُتَنٜىٰنْ دَ كَكٜىٰ دَسُو سُنْيِيَوَ؞ بَذَنْ بَادَ مِدِيَنَاوَا أَ حَنُّنْسُ حَكَبَ دُواْمِنْ كَدَ مُتَنٜىٰنْ إِسْرَٰٓءِيلَ سُبُغَ ڧِرْجِ سُثٜىٰ، ‹ڧَرْڢِنْمُ نٜىٰ يَثٜىٰثٜىٰمُ؞›

3يَنْذُ سَيْ كَيِ شٜىٰلَ غَ مُتَنٜىٰنْ كَثٜىٰ، ‹دُكْ وَنْدَ يَنَ جِنْ ڟُواْرُواْ يَنَ كُمَ ضَوَرْ جِكِے، يَكُواْمَ غِدَا!› » سَيْ مُتُمْ دُبُو عَشِرِنْ دَ بِيُ سُكَ كُواْمَ، دُبُو غُواْمَ سُكَ ڟَيَ تَرٜىٰدَ جِدْعَوْنَ؞

4سَيْ يَهْوٜىٰهْ يَثٜىٰ وَ جِدْعَوْنَ «حَرْ يَنْذُ مُتَنٜىٰنْ سُنْيِيَوَ؞ كَيْسُ بَاكِنْ كُواْغِ دُواْمِنْ إِنْ وَارٜىٰ مَكَسُ عَثَنْ؞ سَعَدَّ نَثٜىٰ، ‹غَا وَنْدَ ذَيْ تَڢِے تَرٜىٰدَكَيْ،› شِينٜىٰ ذَيْ تَڢِے، وَنْدَ كُمَ نَثٜىٰ، ‹بَذَيْ تَڢِے تَرٜىٰدَكَيْ بَ،› شِيكُوَ بَذَيْ تَڢِے تَرٜىٰدَكَيْ بَ؞»

5جِدْعَوْنَ كُوَ يَا كَيْ مُتَنٜىٰنْ بَاكِنْ كُواْغِ، سَيْ يَهْوٜىٰهْ يَثٜىٰ مَسَ «كَوَارٜىٰ غٜىٰڢٜىٰ طَيَ دُكْ وَنْدَ يَشَا ضُوَ كَمَرْ يَدَّ كَرٜىٰ يَكَنْ لَسَ؞ كَكُمَ وَارٜىٰ غٜىٰڢٜىٰ طَيَ دُكْ وَنْدَ يَدُرْڧُسَ دَ ڠُوِوَرْسَ يَشَا ضُوَ دَ حَنُّنْسَ؞»

6يَوَنْ مُتَنٜىٰنْ دَ سُكَ لَشِ ضُوَ كَمَرْ كَرٜىٰ سُو طَرِے عُكُنٜىٰ؞ دُكَنْ سَوْرَنْ سُواْجُواْجِنْ كُوَ سُنْ دُرْڧُسَ عَكَنْ ڠُوِوَرْسُ نٜىٰ سُكَشَا ضُوً؞

7يَهْوٜىٰهْ كُوَ يَثٜىٰ وَ جِدْعَوْنَ «ذَنْثٜىٰثٜىٰكَ إِنْبَاكَ نَصَرَا عَكَنْ مِدِيَنَاوَا دَ مُتُمْ طَرِے عُكُ طِنَّنْ دَ سُكَ لَشِ ضُوَ كَمَرْ كَرٜىٰ؞ كَسَلَّمِ سَوْرَنْ، كُواْوَ يَكُواْمَ غِدَنْسَ؞»

8جِدْعَوْنَ يَبَرْ مُتُمْ طَرِے عُكُ طِنَّنْ تَرٜىٰ دَشِ؞ دُكَنْ سَوْرَنْ سُواْجُواْجِنْ إِسْرَٰٓءِيلَ كُوَ يَسَلَّمٜىٰسُ، عَمَّا سُكَ بَرْ دُكَنْ عَبِنْثِنْسُ دَ ڧَهُواْنِنْسُ أَ حَنُّنْ طَرِے عُكُنَّنْ؞ سَنْسَنِنْ مِدِيَنَاوَا كُوَ يَنَ ڧَسَا دَسُو عَثِكِنْ ݣُورِ؞

9أَوَنَّنْ دَرٜىٰ يَهْوٜىٰهْ يَثٜىٰ وَ جِدْعَوْنَ «كَتَاشِ، كَڢَاطَوَ سَنْسَنِنْ مِدِيَنَاوَا دَيَاڧِ، غَمَا نَا بَادَسُو أَ حَنُّنْكَ؞

10عَمَّا عِدَنْ كَنَ جِنْ ڟُواْرُواْ كَكَيْ مُسُ يَاڧِ، سَيْ كَغَنْ‌غَرَ سَنْسَنِنْسُ تَرٜىٰدَ بَاوَنْكَ ڢُرَ؞

11عَثَنْ ذَاكَجِے أَبِنْدَ سُكٜىٰثٜىٰوَ؞ بَايَنْ حَكَ، ذَاكَسَامِ ڧَرْڢِنْ حَلِنْ دَ ذَاكَ ڢَاطَوَ سَنْسَنِنْ دَ يَاڧِ؞» سَيْ جِدْعَوْنَ تَرٜىٰدَ بَاوَنْسَ ڢُرَ يَغَنْ‌غَرَ كُسَدَ سَنْسَنِنْ أَبُواْكَنْ غَابَنْسُ؞

12مِدِيَنَاوَنْ دَ أَمَلٜىٰكَاوَنْ دَ مُتَنٜىٰنْ ڧَبِيلُنْ غَبَسْ، سُكَ بَظُو عَثِكِنْ ݣُورِنْ، يَوَنْسُ كُوَ كَمَرْ ڢَارِ نٜىٰ؞ سُنَ كُمَ دَ رَاڧُمَ دَيَوَ كَمَرْ يَشِ عَبَاكِنْ تٜىٰكُ؞ بَاوَنْدَ يَ عِيَ ڧِرْغَسُ؞

13سَعَدَّ جِدْعَوْنَ يَ إِسُواْ، سَيْ يَجِ وَنِ مُتُمِنْ مَدْيَنَ يَنَ ڢَطَا وَ أَبُواْكِنْسَ مَڢَرْكِنْ دَ يَيِ؞ يَنَ ثٜىٰوَ «نَيِ مَڢَرْكِ؞ نَغَ دُنْڧُلٜىٰنْ غُرَاسَرْ بَلٜىٰ يَغَنْ‌غَرُواْ حَرْ عَثِكِنْ سَنْسَنِنْمُ، يَبُغِ تٜىٰنْتِ؞ تٜىٰنْتِنْ كُوَ يَڢَاطِ يَݣُونْتَ عَڧَسَا غَبَاطَيَ؞»

14أَبُواْكِنْسَ يَأَمْسَ يَثٜىٰ «كَيْ! لَلَّيْ وَنَّنْ تَكُواْبِنٜىٰ نَ جِدْعَوْنَ طَنْ يُواْوَشْ، مُتُمِنْ إِسْرَٰٓءِيلَ! اللَّهْ يَا رِغَا يَا بَادَ مِدِيَنَاوَا دَ سُواْجُواْجِنْمُ دُكَ أَ حَنُّنْسَ!»

15سَعَدَّ جِدْعَوْنَ يَجِ مَڢَرْكِنْ دَ وَنَّنْ مُتُمْ يَيِ دَ ڢَسَّرَرْسَ، سَيْ يَرُسُنَ دَ ڢُسْكَرْسَ حَرْ ڧَسَا يَيِ وَ يَهْوٜىٰهْ سُجَّدَ؞ سَيْ يَكُواْمَ سَنْسَنِنْ مُتَنٜىٰنْ إِسْرَٰٓءِيلَ يَثٜىٰ «كُتَاشِ، غَمَا يَهْوٜىٰهْ يَا رِغَا يَا بَاكُ نَصَرَا عَكَنْ سُواْجُواْجِنْ مَدْيَنَ!»

16جِدْعَوْنَ كُوَ يَرَبَ وَطَنَّنْ مُتُمْ طَرِے عُكُ طِنْ كَشِ عُكُ، يَكُمَ بَا كُواْوَنٜىٰ مُتُمْ ڧَهُواْ دَ سَنْدَا مَيْ وُتَادَ تُلُ دُواْمِنْ أَ رُڢٜىٰ سَنْدَنْ؞

17يَثٜىٰ مُسُ «كُدُوبٜىٰنِ، كُيِ دُكْ أَبِنْدَ نَكٜىٰيِ؞ سَعَدَّ نَكَيْ بَاكِنْ سَنْسَنِنْسُ، يَدَّ نَيِ، كُو مَا كُيِ دَيْدَيْ حَكَ؞

18سَعَدَّ نِے دَ ڧُنْ‌غِيَتَ مُكَ بُوسَ ڧَهُواْنِ، سَيْ كُو مَا كُبُوسَ نَاكُ ڧَهُواْنِنْ أَوُرَارٜىٰنْ دَ كُكٜىٰ كٜىٰوَيٜىٰ دَ سَنْسَنِنْ، سَعَنً كُيِ إِيهُ كُثٜىٰ، ‹دُواْمِنْ يَهْوٜىٰهْ دَ جِدْعَوْنَ!› »

19جِدْعَوْنَ تَرٜىٰدَ مُتُمْ طَرِے وَطَنْدَ سُكٜىٰ تَرٜىٰدَشِ، سُكَ كَيْ بَاكِنْ سَنْسَنِنْ وَجٜىٰنْ ڟَكَرْ دَرٜىٰ بَايَنْدَ عَكَ ثَنْجَ مَاسُ غَادِ؞ سَيْ سُكَ بُوسَ ڧَهُواْنِ، سُكَ كُمَ ڢَرْڢَسَ تُلُنَنْ دَسُكٜىٰ أَ حَنُّوَنْسُ؞

20ڧُنْ‌غِيُواْيِ عُكُ طِنَّنْ سُكَ بُوسَ ڧَهُواْنِنْسُ، سُكَ ڢَرْڢَشٜىٰ تُلُنَنْ دَسُكٜىٰ رِڧٜىٰ دَسُو، سُكَ رِڧٜىٰ سَنْدُنَنْ مَاسُ وُتَا طِنْ أَ حَنُّوَنْسُ نَهَغُ، ڧَهُواْنِنْ كُمَ سُكَ رِڧٜىٰسُ أَ حَنُّوَنْسُ نَدَمَ؞ سَيْ سُكَيِ إِيهُ، سُكَثٜىٰ «تَكُواْبِنْ يَهْوٜىٰهْ دَ جِدْعَوْنَ!»

21كُواْوَنٜىٰ مُتُمْ يَڟَيَ أَ عِنْدَ يَكٜىٰ كٜىٰوَيٜىٰ دَ سَنْسَنِنْ؞ سَيْ دُكَنْ أَبُواْكَنْ غَابَنْسُ سُكَ غُدُ سُنَ إِيهُ؞

22سَعَدَّ مُتَنٜىٰنْ جِدْعَوْنَ سُكَ بُوسَ ڧَهُواْنِ طَرِے عُكُنَّنْ، سَيْ يَهْوٜىٰهْ يَرِكِتَرْدَ سُواْجُواْجِنْ مَدْيَنَ سُكَيِ تَسَسَّارٜىٰ جُونَنْسُ دَ تَكُبَ؞ سُكَ غُدُ ذُوَا بٜىٰتْ شِتَّ تَوَجٜىٰنْ ظَرٜىٰتَنْ، حَرْ كُمَ ذُوَا غَرِنْ أَبٜىٰلْ مٜىٰهُواْلَ، كُسَدَ تَبَّتْ؞

23سَيْ عَكَ كِرَا مُتَنٜىٰنْ إِسْرَٰٓءِيلَ دَغَ ذُرِيَرْ نَڢْتَلِ دَ ذُرِيَرْ أَشٜىٰرْ دَ كُمَ ذُرِيَرْ مَنَسّٜىٰ، سُكَ كُوَ ڢِتُواْ سُكَبِے مِدِيَنَاوَا؞

24جِدْعَوْنَ كُوَ يَتُورَ یَنْ عَيْكَ أَدُكَنْ ڧَسَرْ تُدَّيْ نَ إِڢْرَيِمْ يَثٜىٰ «كُغَنْ‌غَرُواْ، كُيَاڧِ مِدِيَنَاوَا، كُيِ غَادِنْ وُرَارٜىٰنْ ڧٜىٰتَرٜىٰ كُواْغِنْ يُواْدَنْ دَ نَرَاڢُڢُّكَ حَرْ ذُوَا بٜىٰتْبَرَ دُواْمِنْ كَدَ سُڧٜىٰتَرٜىٰ؞»

25سُكَيِ تَكُواْرَرْ مِدِيَنَاوَا؞ سُكَ كَامَ شُوغَبَنِّنْ سُواْجُواْجِنْ مِدِيَنَاوَا بِيُ، عُواْرٜىٰبْ دَ ظٜىٰيٜىٰبْ؞ سُكَ كَشٜىٰ عُواْرٜىٰبْ أَ دُوڟٜىٰنْ عُواْرٜىٰبْ، سُكَ كُمَ كَشٜىٰ ظٜىٰيٜىٰبْ أَوُرِنْ مَڟٜىٰوَرْ یَیَنْ إِنَبِے أَ ظٜىٰيٜىٰبْ؞ بَايَنْ حَكَ، سُكَ كَٰوُاْوَ جِدْعَوْنَ كَوُنَنْ عُواْرٜىٰبْ دَ ظٜىٰيٜىٰبْ أَ عِنْدَ يَكٜىٰ عَڧٜىٰتَرٜىٰنْ كُواْغِنْ يُواْدَنْ؞

← Chapter 6 Jump to: Chapter 8 →