Luke 12

Hausa Arabic 2020 (أَتَّوْرَتْ دَ أَنَّبَاوَا)

1أَنَانً سَيْ دُبَّنْ مُتَنٜىٰ سُكَ تَتَّارُ حَرْ سُنَ تَتَّاكَ جُونَ، سَيْ عِيسَىٰ يَيِ وَ أَلْمَجِرَنْسَ مَغَنَ دَ ڢَرْكُواْ يَثٜىٰ «كُيِ حَنْكَلِ دَ يِسْتِنْ ڢَرِسِيَاوَا، وَتُواْ مُنَاڢُنْثِنْسُ؞

2بَا أَبِنْدَ يَكٜىٰ أَ رُڢٜىٰ دَ بَذَاعَ بَيَّنَبَ، كُمَ بَا أَبِنْدَ يَكٜىٰ عَٻُواْيٜىٰ وَنْدَ بَذَاعَ سَنِبَ؞

3سَبُواْدَ حَكَ، دُكْ أَبِنْدَ كُكَ ڢَطَا عَٻُواْيٜىٰ، ذَاعَ جِيشِ أَڢِيلِ؞ أَبِنْ دَ كُكَ كُمَ ڢَطَا أَعَسِرْثٜىٰ، كُواْ عَثِكِنْ طَاكِنْ دَ كُكَ رُڢٜىٰ ڧُواْڢُواْڢِنْسَ مَا، ذَاعَيِ شٜىٰلَرْسَ عَكَنْ رُڢِنْ طَكُنَ؞

4«كُو أَبُواْكَيْنَ، إِنَ غَيَ مُكُ، كَدَ كُجِڟُواْرُوانْ مَاسُ كِسَنْ جِكِے عَمَّا بَايَنْدَ سُكَ كَشٜىٰشِ بَا أَبِنْدَ ذَاسُ عِيَيِ كُمَ؞

5ذَنْ ڢَطَا مُكُ وَنْدَ ذَاكُجِڟُواْرُوانْسَ؞ كُجِڟُواْرُوانْ اللَّهْ ، وَنْدَ بَايَنْدَ يَكَشٜىٰ، يَنَدَ إِيكُواْ يَجٜىٰڢَ عَثِكِنْ غِدَنْ وُتَا كُمَ؞ حَڧِيڧَ إِنَ غَيَ مُكُ، شِينٜىٰ وَنْدَ ذَاكُجِڟُواْرُوانْسَ!

6«بَ عَكَنْ سَيَرْ دَ یَنْ ڟُنْڟُ بِيَرْ كُواْبُواْ بِيُبَ؟ دُكْدَهَكَ اللَّهْ بَيْ مَنْتَادَ كُواْ طَيَنْسُبَ؞

7كَيْ! حَرْ غَاشِنْ كَنْكُ مَا أَنْڧِرْغَسُ دُكَ؞ سَبُواْدَ حَكَ، كَدَ مَا كُجِڟُواْرُواْ، دُوانْ كُنْڢِے طَنْ ڟُنْڟُ دَرَجَ سَوْ بَرْكَتَيْ!»

8«إِنَ كُمَ ڢَطَا مُكُ، دُكْ وَنْدَ يَشَيْدَ أَغَبَنْ مُتَنٜىٰ ثٜىٰوَ يَيَرْدَ دَنِے، طَنْ مُتُمْ مَا ذَيْ شَيْدَ يَيَرْدَ دَشِ أَغَبَنْ مَلاَىِٕكُنْ اللَّهْ ؞

9وَنْدَ كُمَ يَيِ مُسُونْ سَنِنَ أَغَبَنْ مُتَنٜىٰ، نِے مَا ذَنْيِ مُسُونْ سَنِنْسَ أَغَبَنْ مَلاَىِٕكُنْ اللَّهْ ؞

10«دُكْ وَنْدَ يَيِ مَغَنَرْ صَاٻُواْ غَمٜىٰدَ طَنْ مُتُمْ، ذَاعَ يَاڢٜىٰمَسَ، عَمَّا دُكْ وَنْدَ يَيِ مَغَنَرْ صَاٻُواْ غَمٜىٰدَ رُوحُ مَيْ ڟَرْكِے ، بَذَاعَ يَاڢٜىٰمَسَبَ؞

11«عِدَنْ كُمَ أَنْكَٰوُاْكُ أَغَبَنْ مَجَمِعُ، كُواْ غَبَنْ مَاسُ حُكُنْثِ، كُواْ كُمَ غَبَنْ شُوغَبَنِّ، كَدَ كُدَامُ دَ يَدَّ ذَاكُ كَارٜىٰ كَنْكُ، كُواْ كُمَ أَبِنْدَ ذَاكُثٜىٰ،

12دُواْمِنْ رُوحُ مَيْ ڟَرْكِے ذَيْ كُواْيَ مُكُ أَبِنْدَ يَكَمَاتَ كُڢَطَا أَ لُواْكَثِنْ؞»

13سَيْ وَنِ مُتُمْ دَغَ ثِكِنْ جَمَعَ يَثٜىٰ وَ عِيسَىٰ «مَلَمْ، كَثٜىٰ وَطَنْعُوَنَ يَبَانِ رَبُواْنَ نَغَادُوانْ دَ بَابَنْمُ يَمُتُ يَبَرْ مَنَ؞»

14عِيسَىٰ يَأَمْسَ مَسَ يَثٜىٰ «كَيْ! وَيَمَيْ دَنِے أَلْڧَلِ كُواْ إِنْذَمَ مَيْ رَبَ مُكُ كَايَنْ دَ بَابَنْكُ يَمُتُ يَبَرْ مُكُ؟»

15يَثِيغَبَدَيِ وَمُتَنٜىٰ مَغَنَ يَثٜىٰمُسُ «كُلُورَ ڢَا، كُيِنٜىٰسَ دَ كُواْوَنٜىٰ إِرِنْ ݣُوطَيِ، دُوانْ يَوَنْ كَايَ بَشِينٜىٰ سَامُنْ رَيْبَ؞»

16سَيْ يَبَاسُ وَنِ مِصَالِ يَثٜىٰ «أَنْ تَٻَيِنْ وَنِ مَيْ أَرْزِڧِ وَنْدَ غُواْنَرْسَ تَيِ أَمْڢَانِ سُواْسَيْ؞

17يَڢَارَ تُنَانِ أَ رَنْسَ يَثٜىٰ، ‹بَانِ دَ عِنْدَ ذَنْسَا أَمْڢَانِنْ غُواْنَتَ دُكَ؞ مٜىٰ ذَنْيِ كٜىٰنَنْ؟›

18«يَثٜىٰ وَكَنْسَ، ‹يَوَّ! نَسَنْ أَبِنْدَ ذَنْيِ؞ ذَنْ رُشٜىٰ وَطَنَّنْ ضُمْبُنَنَ، إِنْ‌غِنَ وَطَنْسُ مَنْيَ، إِنْظُبَ دُكَنْ أَمْڢَانِنْ غُواْنَتَ دَ كَايَانَ عَثِكِ؞

19ذَنْ كُمَ ثٜىٰوَ رَيْنَ «حَبَ! كَنَدَ كَايَ مَاسُيَوَ وَنْدَ ذَاكَ مُواْرَ أَ شٜىٰكَرُ مَاسُيَوَ؞ بَرِ كَهُوتَ، كَيِ تَثِ، كَيِ تَشَا، كَنَ جِنْ دَاطِنْكَ؞» ›

20عَمَّا اللَّهْ يَثٜىٰمَسَ، ‹كَيْ وَاوَا! أَوَنَّنْ دَرٜىٰ ذَاكَ مُتُ؞ سَعَنً إِنْ‌غَا كُواْ وَنٜىٰنٜىٰ ذَيْثِ دُكْ كَايَنَّنْدَ كَتَارَ وَكَنْكَ؞› »

21عِيسَىٰ يَغَمَ مَغَنَرْ نَنْ دَ ثٜىٰوَ «حَكَ ذَيْ ذَمَ غَ دُكْ وَنْدَ يَتَارَ وَكَنْسَ كَايَ، عَمَّا أَغَبَنْ اللَّهْ بَاشِ دَ أَرْزِڧِ؞»

22سَيْ عِيسَىٰ يَثٜىٰ وَ أَلْمَجِرَنْسَ «دُواْمِنْ حَكَ إِنَغَيَ مُكُ، كَدَ كُدَامُ دَ يَدَّ ذَاكُ رَايُ، كُواْ كُمَ يَدَّ ذَاكُ سَامِ رِيغُنَ دُوانْ جِكِنْكُ؞

23دُواْمِنْ رَيْ يَڢِ عَبِنْثِ، جِكِے كُمَ يَڢِ رِيغُنَ؞

24كُدُوبِے ڟُنْڟَيٜىٰ مَنَ! أَيْ، بَاسَ شُوكَ، بَاسَ غِرْبِے، بَاسُ دَ طَكُنَنْ أَجِيَرْ عَبِنْثِ كُواْ ضُمْبُنَ، عَمَّا دُكْدَهَكَ اللَّهْ يَنَ بَاسُ عَبِنْثِ؞ دَرَجَرْكُ كُوَ تَڢِے تَڟُنْڟَيٜىٰ سَوْ بَرْكَتَيْ!

25وَنٜىٰنٜىٰ عَثِكِنْكُ تَوُرِنْ دَامُوَرْسَ، ذَيْ عِيَ ڧَارَ كُواْ أَوَ طَيَ غَ ݣُونَكِنْ رَايُوَرْسَ؟

26تُواْ، عِدَنْ بَذَاكُ عِيَيِنْ ڧَنْڧَنِنْ أَبُ إِرِنْ وَنَّنْبَ، دُوانْمٜىٰ كُكٜىٰ دَامُوَ عَكَنْ سَوْرَنْ؟

27كُدُوبِے يَدَّ سُو ڢُلَوَ سُكٜىٰ غِرْمَ مَنَ؞ بَاسَ عَيْكِ، بَاسَ سَاڧَرْ كُواْمٜىٰ، بَاسَيِ وَكَنْسُ رِيغُنَ، دُكْدَهَكَ إِنَ غَيَ مُكُ كُواْ سَرْكِے سُلَيْمَٰنُ دَ دُكَنْ غِرْمَنْسَ بَيْتَٻَيِنْ أَدُواْ كَمَرْ طَيَ دَغَ ثِكِنْسُبَ؞

28تُواْ، عِدَنْ حَرْ اللَّهْ ذَيْ يِوَثِيَوَرْ دَاجِ أَدُواْ حَكَ، ثِيَوَ وَطَنْدَ سُكٜىٰنَنْ يَوْ، غُواْبٜىٰ كُوَ عَڧُواْنٜىٰسُ، بَلّٜىٰ كُو؟ يَا كُو مَاسُ ڧَنْڧَنْتَرْ بَنْ‌غَسْكِيَ!

29«كَدَ كُدِنْ‌غَ تُنَانِ عَكَنْ أَبِنْدَ ذَاكُثِ، كُواْ أَبِنْدَ ذَاكُشَا، كَدَ مَا كُدَامُ؞

30أَيْ، مُتَنٜىٰنْ دُونِيَا وَطَنْدَ بَسُ سَنْ اللَّهْ بَ سُنَ تَنٜىٰمَنْ دُكْ إِرِنْ وَطَنَّنْ أَبُبُوَ؞ كُو كُوَ، عُبَنْكُ يَسَنْ كُنَ بُڧَاتَرْسُ؞

31كُو دَيْ كُسَا رَنْكُ غَ مُلْكٍ اللَّهْ ، ذَاعَ بَاكُ دُكَنْ وَطَنَّنْ أَبُبُوَ كُمَ؞

32«يَا كُو ڧَرَمِنْ غَرْكٜىٰنَ، كَدَ كُجِڟُواْرُواْ، غَمَا عُبَنْكُ يَنَ جِنْ دَاطِے يَبَاكُ مُلْكِنْسَ؞

33كُسَيَرْ دَ دُكَنْ أَبِنْدَ كُكٜىٰ دَشِ، كُبَا تَلَكَاوَا سَدَكَ؞ كُيِ وَكَنْكُ أَجِيَرْ دَ بَذَاتَ ڟُوڢَبَ، وَتُواْ دُوكِيَرْ دَ بَذَاتَ لَلَثٜىٰبَ كٜىٰنَنْ أَسَمَ، عِنْدَ بَا ٻَرَوُانْ دَ ذَيْ سَاثٜىٰسُ، بَا كُمَ غَضَرْ دَ ذَاتَ لَلَتَرْدَسُو؞

34غَمَا عِنْدَ دُوكِيَرْ مُتُمْ تَكٜىٰ، أَنَنْ نٜىٰ ذُوثِيَارْسَ مَا تَكٜىٰ؞

35«كُذَوْنَ أَشِرْيٜىٰ، ڢِتِلُنْكُ عَكُنّٜىٰ؞

36كُذَمَ كَمَرْ بَايِنْ دَسُكٜىٰ جِضَانْ مَيْغِدَنْسُ يَدَاوُاْ دَغَ بِكٍ عَوْرٜىٰ؞ دَ يَدَاوُاْ يَڨُونْڨُوسَ ڧُواْڢَ، نَنْ دَنَنْ سَيْ سُبُوطٜىٰ مَسَ؞

37ذَيْ ذَمَ أَبِنْ ڢَضٍ ثِكِ غَ بَايِنَّنْ إِنْ حَرْ مَيْغِدَنْ يَدَاوُاْ يَسَامٜىٰسُ بَسُيِ بَرْثِبَ؞ حَڧِيڧَ إِنَ غَيَ مُكُ، ذَيْثِرٜىٰ بَبَّرْ رِغَرْدَ يَسَا، يَثٜىٰ مُسُ سُظَظْذَوْنَ، سُثِ عَبِنْثِ، سَعَنً يَبِے كَنْ كُواْوَنٜىٰ طَيَنْسُ يَكَٰوُاْ مَسَ عَبِنْثِ؞

38بَايِنَّنْ مَاسُ أَلْبَرْكَنٜىٰ إِنْ يَدَاوُاْ كُواْ دَ ڟَكَرْ دَرٜىٰ، كُواْ كُمَ دَ سَسَّڢٜىٰ، يَسَامٜىٰسُ أَشِرْيٜىٰ؞

39كُدَيْ سَنِ ثٜىٰوَ إِنْ مَيْغِدَا يَسَنْ لُواْكَثِنْ دَ ٻَرَوُاْ ذَيْذُواْ مَسَ، بَذَيْ بَرْ شِ يَشِغَ يَيِ مَسَ ٻَرْنَ أَغِدَا بَ؞

40سَيْ كُذَوْنَ دَ شِرِ، دُواْمِنْ طَنْ مُتُمْ ذَيْذُواْ أَلُواْكَثِنْ دَ بَكُيِ ڟَمَّنِ ذَيْذُوابَ؞»

41بِتْرُسْ يَثٜىٰ « عُبَنْ‌غِجِ ، وَنَّنْ مِصَالِ عَكَنْمُ عَكَيِ كُواْ كُوَ يَشَاڢِ كُواْوَ؟»

42عُبَنْ‌غِجِ يَأَمْسَ مَسَ يَثٜىٰ «وَنٜىٰنٜىٰ بَاوَنَّنْ مَيْ أَمِنْثِ مَيْ حِكِمَ كُمَ، وَنْدَ مَيْغِدَنْسَ ذَيْسَا شِ يَلُورَ دَ غِدَنْسَ، يَكُمَ بَا سَوْرَنْ بَايِ عَبِنْثِ أَدَيْدَيْ لُواْكَثِ؟

43مَيْ أَلْبَرْكَ نٜىٰ بَاوَنْ دَ مَيْغِدَنْسَ ذَيْذُواْ يَسَامٜىٰشِ يَنَيِنْ عَيْكِنْسَ؞

44حَڧِيڧَ إِنَ غَيَ مُكُ، ذَيْسَا وَنَّنْ بَاوَ يَلُورَ مَسَ دَ كَايَنْسَ دُكَ؞

45عَمَّا عِدَنْ بَاوَنَّنْ يَثٜىٰ أَ رَنْسَ، ‹أَيْ، مَيْغِدَانَ يَيِ لَتِّنْ ذُوَا،› سَعَنً يَڢَارَ دُوكَنْ سَوْرَنْ بَايِنْ، مَظَا دَ مَاتَا، يَكُمَ شِغَ ثِ دَ شَا، حَرْ يَنَ بُغُوَ،

46مَيْغِدَنْ وَنَّنْ بَاوَ ذَيْ دَاوُاْ أَ رَانَرْ دَ بَاوَنْ بَيْيِ ڟَمَّنِبَ، كُمَ أَ لُواْكَثِنْ دَ بَيْسَنِبَ؞ مَيْغِدَنَّنْ ذَيْ يِمَسَ مُوغُنْ دُوكَ يَكُمَ حُكُنْتَ شِ تَرٜىٰدَ مَرَسَ أَمِنْثِ؞

47«بَاوَنْدَ يَسَنْ أَبِنْدَ مَيْغِدَنْسَ يَكٜىٰسُواْ يَيِ، عَمَّا بَيْيِ شِرِبَ، بَيْ كُمَيِ أَبِنْدَ عَكٜىٰسُواْ يَيِبَ، ذَاعَيِ مَسَ بُلَلَ سُواْسَيْ؞

48وَنْدَ كُوَ بَيْسَنْ أَبِنْدَ مَيْغِدَنْسَ يَكٜىٰسُواْ يَيِبَ، يَكُمَيِ أَبِنْدَ يَ إِسَ أَدُوكٜىٰشِ، ذَاعَ دُوكٜىٰشِ كَطَنْ؞ دُكْ وَنْدَ عَكَ بَاشِ أَبُ مَيْ يَوَ، ذَاعَ نٜىٰمِ أَبُ مَيْ يَوَ دَغَ غَرٜىٰشِ؞ وَنْدَ كُمَ عَكَ بَاشِ أَبُ مَيْ يَوَ سُواْسَيْ، ذَاعَ نٜىٰمِ أَبُ مَيْ يَوَ سُواْسَيْ دَغَ غَرٜىٰشِ؞

49«وُتَا ثٜىٰ نَاذُواْ إِنْسَا وَدُونِيَا؞ دَ سُواْنَ نٜىٰ دَ أَنْكُنَّتَ كُواْ!

50إِنَدَ بَڢْتِسْمَرْ دَ ذَاعَيِ مِنِ، نَا كُوَ مَڟُ أَ ذُوثِيَا سُواْسَيْ حَرْ سَيْ أَنْيِ مِنِ عِتَ!

51كُنَ ڟَمَّنِ ذَمَنْ لَاڢِيَ نٜىٰ نَكَٰوُاْوَ دُونِيَا؟ عَ إِنَا! إِنَغَيَ مُكُ، رَبُوَثٜىٰ نَكَٰوُاْ؞

52دَغَ يَنْذُ، أَغِدَا طَيَ، مُتُمْ بِيَرْ ذَاسُ رَبُ كَشِ بِيُ، عُكُ سُنَ غَابَادَ بِيُ، بِيُ كُمَ سُنَ غَابَادَ عُكُ؞

53بَابَ ذَيْ يِغَابَادَ طَنْسَ، طَنْ كُمَ يَيِ غَابَادَ بَابَنْسَ؞ مَامَا ذَاتَيِ غَابَادَ یَرْتَ، یَرْ كُمَ تَيِ غَابَادَ مَامَرْتَ؞ مَامَرْ مِجِ ذَاتَيِ غَابَادَ مَاتَرْ طَنْتَ، مَاتَرْ طَنْ كُمَ تَيِ غَابَادَ مَامَرْ مِجِنْتَ؞»

54عِيسَىٰ يَكُمَثٜىٰ وَمُتَنٜىٰ «إِنْ كُنْ‌غَ هَدَرِ يَتَاسُواْ دَغَ يَمَّ، كُكَنْثٜىٰ أَيْ، ذَاعَيِ ضُوً سَمَ، سَيْ كُوَ عَيِ؞

55عِدَنْ كُمَ كُنْجِ إِسْكَ تَنَ هُورَاوَ دَغَ كُدُ، سَيْكُثٜىٰ ذَاعَيِ ذَاڢِ، سَيْ كُمَ عَيِ؞

56مُنَاڢُكَيْ! كُنْعِيَ غَانٜىٰ يَنَيِنْ ڧَسَا دَ نَسَرَرِنْ سَمَ، عَمَّا غَانٜىٰوَرْ عَلَمُنْ زَامَانِنَّنْ يَغَغَرٜىٰكُ؞

57«مٜىٰيَسَا كُو كَنْكُ بَكُ عِيَ تُنَانِ كُغَانٜىٰ أَبِنْدَ يَڢِݣَوْ كُيِ؟

58عِدَنْ وَنِ يَكَيْ ڧَارَرْكَ عَكُواْتُ، كَيِ ڧُواْڧَرِ كُشِرْيَ تُنْ كُنَ عَكَنْ حَنْيَ؞ إِنْ كَڧِ، ذَيْكَيْكَ غَبَنْ أَلْڧَلِ؞ أَلْڧَلِ كُمَ يَمِيڧَكَ غَ طَنْ دُواْكَا؞ طَنْ دُواْكَا كُمَ يَسَاكَ عَكُرْكُكُ؞

59إِنَغَيَ مَكَ، بَذَاكَ ڢِتَ أَوُرِنْبَ سَيْ كَبِيَ دُكَنْ أَبِنْدَ عَكَ يَنْكَ مَكَ، بَا كُواْ سَوْرَنْ كُواْبُواْ؞»

← Chapter 11 Jump to: Chapter 13 →