Luke 7

Hausa Arabic 2020 (أَتَّوْرَتْ دَ أَنَّبَاوَا)

1دَ عِيسَىٰ يَغَمَ غَيَ وَمُتَنٜىٰ دُكَنْ وَطَنَّنْ أَبُبُوَ، سَيْ يَتَڢِے كَڢَرْنَهُمْ؞

2عَثَنْ طِنْ، أَݣَويْ وَنِ بَبَّنْ سُواْجَنْ رُواْمَ وَنْدَ بَاوَنْسَ يَنَ ثِيوُاْ سُواْسَيْ حَرْ يَنَ غَبْ دَ مُتُوَ؞ وَنَّنْ بَبَّنْ سُواْجَنْ رُواْمَ كُوَ يَنَ ڧَوْنَرْ بَاوَنَّنْ سُواْسَيْ؞

3دَ يَجِ لَابَرِنْ عِيسَىٰ ، سَيْ يَعَيْكِ وَطَنْسُ شُوغَبَنِّنْ يَهُودَاوَا دُواْمِنْ سُضُواْڧٜىٰشِ يَذُواْ يَوَرْكَرْدَ بَاوَنْسَ؞

4شُوغَبَنِّنْ سُكَجٜىٰ وُرِنْ عِيسَىٰ ، سُكَ ضُواْڧٜىٰشِ سُواْسَيْ، سُنَ ثٜىٰوَ «وَنَّنْ مُتُمْ أَيْ، يَثَنْثَنْثِ كَتَيْمَكٜىٰشِ،

5غَمَا يَنَ ڧَوْنَرْ مُتَنٜىٰنْمُ، حَرْ يَغِنَ مَنَ مَجَمِعَ؞»

6سَيْ عِيسَىٰ يَتَڢِے تَرٜىٰدَسُو؞ دَ يَيِكُسَدَ غِدَنْ، بَبَّنْ سُواْجَنْ رُواْمَنَّنْ يَعَيْكَ دَ وَطَنْسُ أَبُواْكَنْسَ سُغَيَوَ عِيسَىٰ «يَا مَيْغِرْمَ، كَدَ كَدَمٜىٰ كَنْكَ سَبُواْدَنِ! بَنْ مَا إِسَ حَرْ دَ ذَاكَ ذُواْ غِدَانَبَ؞

7شِيَسَا بَنْ مَا غَ نَا إِسَ إِنْ ذُواْ وُرِنْكَبَ، عَمَّا كَيِ مَغَنَ كَوَيْ، يَرُواْنَ كُوَ ذَيْ وَرْكٜىٰ؞

8غَمَا نِے مَا عَڧَرْڧَشِنْ إِيكُوانْ وَنِ نَكٜىٰ، كُمَ دَ سُواْجُواْجِ عَڧَرْڧَشِنَ، نَكَنْثٜىٰ وَوَنَّنْ، ‹جٜىٰكَ،› سَيْيَجٜىٰ؞ وَنِ كُوَ إِنْ ثٜىٰ مَسَ، ‹ذُواْ،› سَيْ يَذُواْ؞ إِنْ نَثٜىٰ وَبَاوَنَ، ‹يِ أَبُ كَاظَا،› سَيْ يَيِ؞»

9دَ عِيسَىٰ يَجِ حَكَ، سَيْ مَامَاكِ يَكَامَشِ؞ سَيْ يَجُويَ يَثٜىٰ وَمُتَنٜىٰنْ دَسُكٜىٰبِنْسَ «إِنَ غَيَ مُكُ، عَثِكِنْ إِسْرَٰٓءِيلَ بَنْ تَٻَ سَامُنْ مَيْ بَنْ‌غَسْكِيَ مَيْ ڧَرْڢِے كَمَرْ وَنَّنْبَ!»

10دَ وَطَنْدَ عَكَ عَيْكَ سُكَ كُواْمَ غِدَنْ بَبَّنْ سُواْجَنْ رُواْمَ، سَيْ سُكَ سَامِ بَاوَنْ يَوَرْكٜىٰ؞

11بَادَ دَطٜىٰوَبَ، سَيْ عِيسَىٰ يَتَڢِے وَنِ غَرِنْ دَ عَكٜىٰثٜىٰ دَشِ نَيِنْ، أَلْمَجِرَنْسَ دَ مُتَنٜىٰ دَيَوَ كُمَ سُكَ تَڢِے تَرٜىٰ دَشِ؞

12دَ سُكَيِ كُسَدَ ڧُواْڢَرْ شِغَ غَرِنْ، سَيْغَا وَطَنْسُ مُتَنٜىٰ سُنَ ڢِتُواْوَ دَ غَاوَرْ وَنِ سَوْرَيِ، وَنْدَ شِ كَطَيْ مَامَرْسَ تَحَيْڢَ، مِجِنْتَ كُمَ يَمُتُ؞ مُتَنٜىٰ دَيَوَ دَغَ غَرِنْ سُنَ مَتَ رَكِيَ؞

13دَ عُبَنْ‌غِجِ يَغَ مَاتَرْ، سَيْ يَجِ تَوْسَيِنْتَ، سَيْيَثٜىٰمَتَ «كَدَ كِيِ كُوكَا!»

14سَيْ يَجٜىٰ يَتَٻَ عَݣُوتِنْ غَاوَرْ، سَيْ مُتَنٜىٰنْ دَسُكٜىٰ رِڧٜىٰ دَشِ سُكَ ڟَيَ؞ عِيسَىٰ يَثٜىٰ «سَوْرَيِ، نَثٜىٰمَكَ كَتَاشِ!»

15سَيْ وَنَّنْ دَيَمُتُ يَتَاشِ يَذَوْنَ، يَڢَارَ مَغَنَ؞ عِيسَىٰ كُمَ يَمِيڧَشِ غَ مَامَرْسَ؞

16سَيْ ڟُواْرُواْ يَكَامَسُ دُكَ، سُكَ طَوْكَكَ اللَّهْ سُنَ ثٜىٰوَ «لَلَّيْ، وَنِ بَبَّنْ أَنَّبِے يَتَاشِ عَثِكِنْمُ! اللَّهْ يَا ذُواْ دُواْمِنْ يَثٜىٰثِ مُتَنٜىٰنْسَ!»

17لَابَرِنْ أَبِنَّنْ دَ عِيسَىٰ يَيِ، يَكَيْ كُواْعِنَ عَثِكِنْ يَنْكِنْ يَهُودِيَ دَ كٜىٰوَيٜىٰنْتَ؞

18دَ أَلْمَجِرَنْ يَحْيَى مَيْ بَڢْتِسْمَ سُكَ غَيَ مَسَ دُكَنْ أَبُبُوَنَّنْ، سَيْ يَكِرَا بِيُ دَغَ ثِكِنْسُ،

19يَعَيْكٜىٰسُ وُرِنْ عُبَنْ‌غِجِ ، سُتَمْبَيٜىٰشِ «كَيْنٜىٰ وَنْدَ ذَيْذُواْ، كُواْ مُسَا عِدُواْ غَ وَنِ؟»

20دَ سُكَ كَيْ وُرِنْ عِيسَىٰ ، سَيْ سُكَثٜىٰ «يَحْيَى مَيْ بَڢْتِسْمَ نٜىٰ يَعَيْكٜىٰمُ، مُتَمْبَيٜىٰكَ، ‹كُواْ كَيْنٜىٰ مَيْ ذُوَانَّنْ، كُواْ كُمَ مُسَا عِدُواْ غَ وَنِ؟› »

21أَ دَيْدَيْ لُواْكَثِنَّنْ كُوَ، عِيسَىٰ يَوَرْكَرْدَ مُتَنٜىٰ دَيَوَ دَغَ رَشِنْ لَاڢِيَرْسُ دَ ثُوتُتُّكَنْسُ دَ كُمَ دَغَ مُوغَيٜىٰنْ رُوحُواْحِ؞ مَكَڢِ دَيَوَ كُمَ يَبَاسُ غَنِنْ غَرِ؞

22سَيْ عِيسَىٰ يَأَمْسَ مُسُ يَثٜىٰ «كُكُواْمَ كُغَيَ وَ يَحْيَى أَبِنْدَ كُكَجِ، كُكَ كُمَ غَنِ، وَتُواْ مَكَڢِ سُنَ سَامُنْ غَنِ، غُرَغُ سُنَ تَڢِيَ، مَاسُ ثُوتَرْ ڢَتَرْ جِكِے سُنَ سَامُنْ وَرْكٜىٰوَ، كُرَمٜىٰ سُنَجِنْ مَغَنَ، أَنَتَادَ وَطَنْدَ سُكَ مُتُ، أَنَ كُمَيِ وَتَلَكَاوَا وَعَظِنْ لَابَرِ مَيْ دَاطِے؞

23اللَّهْ ذَيْ أَلْبَرْكَثِ كُواْوَ دَ بَيْيِ شَكَّرْ بَنْ‌غَسْكِيَرْ دَ يَكٜىٰدَ عِتَ عَكَيْنَبَ!»

24بَايَنْ وَطَنْدَ يَحْيَى يَعَيْكَ سُكَ تَڢِے، سَيْ عِيسَىٰ يَڢَارَيِ وَتَارُوانْ مُتَنٜىٰ مَغَنَ غَمٜىٰدَ يَحْيَى، يَنَ ثٜىٰوَ «مٜىٰكُكَجٜىٰ غَنِ أَدَاجِ؟ كُنْجٜىٰ غَنِنْ دُواْغُوَرْ ثِيَوَرْ دَ إِسْكَ تَكٜىٰ كَطَوَ نٜىٰ؟

25تُواْ، كَلُّوانْمٜىٰ يَكَيْكُ؟ وَنِ مَيْ ثِنْ أَدُواْ نٜىٰ؟ مَاسُسَا كَايَنْ ڟَادَ سُنَ كُمَ ذَمَنْ جِنْ دَاطِے، أَيْ، أَغِدَنْ سَرْكِے سُكٜىٰ؞

26تُواْ، وَيْ كَلُّوانْمٜىٰ كُكَجٜىٰيِ؟ أَنَّبِے؟ عِ، إِنَ غَيَ مُكُ، يَا مَا ڢِے أَنَّبِے؞

27غَمَا غَمٜىٰدَ يَحْيَى نٜىٰ رُبُوتَثِّيَرْ مَغَنَرْ اللَّهْ تَثٜىٰ، « ‹غَاشِ، نَا عَيْكُواْ مَنْذُوانَ يَرِغَاكَ غَبَ، وَنْدَ ذَيْ شِرْيَ مَكَ حَنْيَ كَاڢِنْ كَذُواْ؞›

28«إِنَ غَيَ مُكُ، عَثِكِنْ دُكَنْ وَطَنْدَ مَاتَا سُكَ حَيْڢَ، بَاوَنْدَ يَڢِ يَحْيَى غِرْمَ؞ عَمَّا دُكْدَهَكَ وَنْدَ يَڢِ ڧَنْڧَنِ دُكَ أَمُلْكٍ اللَّهْ يَڢِيشِ؞»

29دُكَ وَنْدَ يَجِ وَنَّنْ، حَرْ دَ مَاسُ كَرْٻَرْ هَرَاجِ، سُكَ تَبَّتَرْ ثٜىٰوَ حَنْيَرْ اللَّهْ عِتَثٜىٰ دَيْدَيْ، سَبُواْدَ سُونٜىٰ عَكَيِ مُسُ بَڢْتِسْمَ تَ يَحْيَى؞

30عَمَّا ڢَرِسِيَاوَا دَ مَلَمً كُواْيَرْوَرْ مُوسَٰى سُكَڧِ أَبِنْدَ اللَّهْ يَنُڢٜىٰسُ دَشِ، سُكَ كُمَڧِ يَحْيَى يَيِ مُسُ بَڢْتِسْمَ؞

31عِيسَىٰ يَثِيغَبَدَ ثٜىٰوَ «تُواْ دَمٜىٰ ذَنْ ݣُوتَنْتَا مُتَنٜىٰنْ زَامَانِنَّنْ؟ يَيَ سُكٜىٰ؟

32سُو كَمَرْ يَارَا نٜىٰ دَسُكٜىٰ ذَمَ عَكَاسُوَ، سُنَ كِرَنْ جُونَ سُنَ ثٜىٰوَ « ‹مُنْ هُورَ مُكُ سَرٜىٰوَ، كُنْڧِ كُيِ ضَوَ! مُنْ رٜىٰرَ وَاڧَرْ مُتُوَ، كُنْڧِ كُيِ كُوكَا!›

33«غَمَا يَحْيَى مَيْ بَڢْتِسْمَ يَاذُواْ، بَايَثِنْ عَبِنْثِ، بَايَشَنْ ضُوً إِنَبِے عَمَّا كُنَ ثٜىٰوَ ‹أَيْ، يَنَدَ أَلْجَنِ!›

34طَنْ مُتُمْ يَاذُواْ كُمَ يَنَثِ يَنَشَا، كُنَ ثٜىٰوَ ‹كُنْ غَنْشِ مَيْيَوَنْثِ دَشَا، أَبُواْكِنْ مَاسُ كَرْٻَرْ هَرَاجِ دَ مَاسُ ذُنُوبِ!›

35دُكْدَهَكَ وَطَنْدَ سُكَ يَرْدَ دَ حِكِمَرْ اللَّهْ ، سُنَ نُونَ ثٜىٰوَ تَنَدَ غَسْكِيَ؞»

36وَنِ بَڢَرِسِيٜىٰ يَغَيَّثِ عِيسَىٰ ثِنْ عَبِنْثِ أَغِدَنْسَ، سَيْ عِيسَىٰ يَجٜىٰ يَذَوْنَ دُوانْ ثِنْ عَبِنْثِ؞

37أَوَنَّنْ غَرِ أَݣَويْ وَتَ مَثٜىٰ مَيْ ذُنُوبِ؞ دَتَجِ ثٜىٰوَ عِيسَىٰ يَنَ ثِنْ عَبِنْثِ أَغِدَنْ بَڢَرِسِيٜىٰنْ، سَيْ تَكَٰوُاْ وَتَ یَرْ ݣُولَبَرْ دَ عَكَيِ دَ دُوڟٜىٰنْ عُواْنِسْ ثِكٜىٰ دَ مَنْ ڧَنْشِ مَيْ ڟَادَ سُواْسَيْ؞

38تَاذُواْ تَا ڟَيَ عَبَايَنْسَ، وَجٜىٰنْ ڧَڢَاڢُنْسَ تَنَ كُوكَا؞ دَ هَوَيٜىٰنْتَ يَڢَارَ ظُبَ عَڧَڢَاڢُنْسَ، سَيْ تَغُواْغٜىٰ ڧَڢَاڢُنْ دَ غَاشِنْتَ، تَيِتَيِنْ مُسُ سُمْبَ، سَعَنً تَشَاڢَ مُسُ مَنْ ڧَنْشِنَّنْ؞

39دَ بَڢَرِسِيٜىٰنَّنْ يَغَ أَبِنْدَ مَثٜىٰنَّنْ تَكٜىٰيِ، سَيْيَثٜىٰ أَ رَنْسَ «دَ مُتُمِنَّنْ أَنَّبِے نٜىٰ دَ يَسَنْ كُواْوَثٜىٰ ثٜىٰ مَثٜىٰنَّنْ دَتَكٜىٰ تَٻَشِ! كُمَ دَ يَسَنْ ثٜىٰوَ عِتَ مَيْ ذُنُوبِ ثٜىٰ؞»

40عِيسَىٰ يَثٜىٰ وَ بَڢَرِسِيٜىٰنَّنْ «سِيمَنْ، إِنَدَ أَبِنْدَ ذَنْ ڢَطَا مَكَ؞» شِ كُمَ يَثٜىٰ «ڢَطَا، مَلَمْ؞»

41عِيسَىٰ يَثٜىٰ «أَنْيِ وَنِ مُتُمِنْ دَ يَكٜىٰبِنْ وَطَنْسُ مُتَنٜىٰ بِيُ بَاشِ، طَيَ أَنَبِنْسَ يَوَنْ كُطِنْ دَ لٜىٰبُرَ ذَيْسَامُ ثِكِنْ شٜىٰكَرَا طَيَ دَ رَبِے، طَيَنْ كُمَ يَوَنْ كُطِنْ دَ لٜىٰبُرَ ذَيْسَامُ ثِكِنْ ݣُونَ حَمْسِنْ؞

42دَسُكَ غَغَرَ بِيَ، سَيْ يَيَاڢٜىٰ مُسُ دُكَنْسُ بِيُ؞ تُواْ، أَغَنِنْكَ وَ ذَيْڢِ ڧَوْنَرْسَ؟»

43سِيمَنْ يَثٜىٰ مَسَ «أَغَنِينَ، وَنْدَ عَكَ يَاڢٜىٰمَسَ مَيْ يَوَنْ نٜىٰ؞» سَيْ عِيسَىٰ يَثٜىٰ مَسَ «يَوَّ! كَا ڢَطَا دَيْدَيْ؞»

44سَيْ يَدُوبِے مَثٜىٰنْ، يَثٜىٰ وَ سِيمَنْ «كَغَا مَثٜىٰنَّنْ؟ نَا شِغُواْ غِدَنْكَ، بَكَ بَانِ ضُوَ إِنْ وَنْكٜىٰ ڧَڢَاڢُنَبَ، عَمَّا تَوَنْكٜىٰ ڧَڢَاڢُنَ دَ هَوَيٜىٰنْتَ، تَكُمَ غُواْغٜىٰسُ دَ غَاشِنْ كَنْتَ؞

45بَكَ سُمْبَثٜىٰنِ دَ نَشِغُواْ غِدَنْكَبَ، عَمَّا تُنْ شِغُواْوَتَ أَنَنْ مَثٜىٰنَّنْ بَتَ دَيْنَ سُمْبَرْ ڧَڢَاڢُنَبَ؞

46بَكَ شَاڢَ مَيْ عَكَيْنَبَ، عَمَّا عِتَ تَشَاڢَ مَنْ ڧَنْشِ عَڧَڢَاڢُنَ؞

47سَبُواْدَ حَكَ إِنَ غَيَ مَكَ، ذُنُبَنَّنْ نَاتَ مَاسُيَوَ أَنْيَاڢٜىٰمَتَ سُو، غَمَا تَايِ ڧَوْنَ مَيْ يَوَ؞ وَنْدَ عَكَ يَاڢٜىٰوَا كَطَنْ كُوَ، ڧَوْنَ كَطَنْ يَكٜىٰ نُونَاوَ؞»

48سَيْ يَثٜىٰ وَمَثٜىٰنْ «أَنْ غَاڢَرْتَا مِكِ ذُنُبَنْكِ؞»

49مُتَنٜىٰنْ دَسُكٜىٰ ثِنْ عَبِنْثِ تَرٜىٰدَشِ سُكَ ڢَارَثٜىٰ وَجُونَنْسُ «وَنٜىٰنٜىٰ وَنَّنْ، وَنْدَ حَرْ يَنَ يَاڢٜىٰ ذُنُبَيْ؟»

50سَيْ عِيسَىٰ يَثٜىٰ وَمَثٜىٰنْ «بَنْ‌غَسْكِيَرْكِ تَثٜىٰثٜىٰكِ، كِسَوْكَ لَاڢِيَ؞»

← Chapter 6 Jump to: Chapter 8 →