Luke 19 — Hausa Arabic 2020 (أَتَّوْرَتْ دَ أَنَّبَاوَا)

8سَيْ زَكَّ يَتَاشِ أَڟَيٜىٰ يَثٜىٰ وَ عُبَنْ‌غِجِ «كَجِ نَنْ، مَيْغِرْمَ، ذَنْبَادَ رَبِنْ أَرْزِڧِنْ دَ نَكٜىٰ دَشِ وَتَلَكَوَ؞ دُكْ وَنْدَ كُمَ نَتَٻَ ثُوتَرْسَ، ذَنْ بِيَشِ سَوْ حُطُ أَبِنْدَ دَا نَكَرْٻَ؞»

9سَيْ عِيسَىٰ يَثٜىٰ مَسَ «يَوْ دَيْ، ثٜىٰتُواْ يَا ذُواْ غِدَنَّنْ، تُنْدَ شِے مَا طَنْ إِبْرَٰهِيمْ نٜىٰ؞

10غَمَا طَنْ مُتُمْ يَا ذُواْ نٜىٰ مُسَمَّنْ دُواْمِنْ نٜىٰمَنْ أَبِنْدَ يَٻَتَ، يَثٜىٰثٜىٰشِ كُمَ؞»

11تُنْ سُنَ جِنْ وَطَنَّنْ أَبُبُوَ، عِيسَىٰ يَثِيغَبَدَ غَيَ مُسُ وَنِ مِصَالِ، دُواْمِنْ يَيِكُسَدَ عُرُوشَلِيمَ، مُتَنٜىٰ كُمَ سُنَ ڟَمَّنِ مُلْكٍ اللَّهْ ذَيْ بَيَّنَنً دَنَنْ؞

12سَيْ يَثٜىٰمُسُ «أَنْتَٻَ يِنْ وَنِ بَبَّنْ مُتُمْ وَنْدَ ذَاشِ وَنِ غَرِ دَنِيسَ دُوانْ أَ نَطَشِ سَرْكِے، يَدَاوُاْ؞

13كَاڢِنْ يَتَڢِے، يَكِرَا بَايِنْسَ غُدَا غُواْمَ يَبَا كُواْوَنّٜىٰنْسُ يَوَنْ كُطِنْ دَ لٜىٰبُرَ ذَيْسَامُ ثِكِنْ وَتَا عُكُ، يَكُمَ ثٜىٰمُسُ، ‹كُيِ كَاسُوَنْثِ دَسُو سَيْ نَا دَاوُاْ؞›

14مُتَنٜىٰنْ غَرِنْسَ كُوَ بَاسَسُوانْسَ؞ سَبُواْدَ حَكَ، سَيْ سُكَ عَيْكَ دَ یَنْ عَيْكَ بَايَنْدَ يَتَڢِے سُثٜىٰ، ‹بَا مَا سُوانْ وَنَّنْ مُتُمْ يَذَمَ سَرْكِنْمُ؞›

15«أَنَانً بَايَنْدَ عَكَ نَطَ مُتُمِنَّنْ سَرْكِے، يَدَاوُاْ غِدَا؞ دَشِغَرْسَ سَيْ يَعَيْكَ عَكِرَا مَسَ دُكْ بَايِنْسَ، دُواْمِنْ يَسَنْ رِيبَ نَوَ سُكَ سَامُ عَكَنْ كُطِنْدَ يَبَرْ مُسُ؞

16نَا ڢَرِ يَذُواْ يَثٜىٰ، ‹مَيْغِرْمَ، نَثِ رِيبَ ڢَمْ غُواْمَ دَغَ ڢَمْ طَيَ دَ كَبَانِ؞›

17سَيْ مَيْغِدَنْ كُمَ يَثٜىٰ مَسَ، ‹مَادَلَّ، بَاوَنْ كِرْكِ! تُنْدَ كَيِ غَسْكِيَ عَكَنْ ڧَرَمِنْ أَبُ، ذَنْ سَاكَ كَيِمُلْكٍ غَرُرُوَ غُواْمَ؞›

18بَاوَ نَبِيُ يَذُواْ يَثٜىٰ، ‹مَيْغِرْمَ، نَثِ رِيبَ ڢَمْ بِيَرْ دَغَ ڢَمْ طَيَ دَ كَبَانِ؞›

19مَيْغِدَنْ يَثٜىٰ وَوَنَّنْ، ‹ذَاكَيِ مُلْكٍ غَرُرُوَ بِيَرْ؞›

20«وَنِ كُمَ يَذُواْ، يَثٜىٰ، ‹مَيْغِرْمَ، غَا ڢَمْ طَيَنْكَ؞ نَا طَوْرٜىٰشِ أَطَنْ ڟُمَّ، نَٻُواْيٜىٰ؞

21غَمَا إِنَ جِنْ ڟُواْرُوانْكَ، دُوانْ كَيْ وَنِ إِرِنْ مُتُمْ نٜىٰ مَيْ وُيَرْ شَعَنِ؞ غَا سُوانْ نَبَنْظَ أَوُرِنْكَ بَا دَامَ، كَكَنْيِ غِرْبِنْ أَبِنْدَ بَكَ شُوكَبَ؞›

22سَيْ يَثٜىٰمَسَ، ‹كَيْ وَنِ مُوغُنْ بَاوَنٜىٰ! ذَنْيِ مَكَ شَرِيعَ عَكَنْ أَبِنْدَ كَڢَطَا دَ بَاكِنْكَ؞ أَشٜىٰ، كَا سَنْ ثٜىٰوَ نِے مُتُمْ نٜىٰ مَيْ وُيَرْ شَعَنِ، مَيْسُواْ نَبَنْظَ، إِنَ كُمَ غِرْبَرْ أَبِنْدَ بَنْ شُوكَبَ؟

23تُواْ، إِنْ كَا سَنْ حَكَ، مٜىٰيَسَا بَكَسَا كُطِنَ عَبَنْكِبَ، دُوانْ إِنْ نَدَاوُاْ إِنْسَامِ رِيبَ عَكَيْ؟›

24«سَيْ يَثٜىٰ وَ وَطَنْدَ سُكٜىٰ ڟَيٜىٰ أَوَجٜىٰنْ، ‹كَرْٻِ ڢَمْ طَيَنْ دَغَ وُرِنْسَ عَبَا بَاوَنَّنْ مَيْ ڢَمْ غُواْمَ؞›

25عَمَّا سُكَ أَمْسَ مَسَ سُكَثٜىٰ، ‹مَيْغِرْمَ، أَيْ، يَنَدَ ڢَمْ غُواْمَ كُواْ؞›

26يَأَمْسَ يَثٜىٰ، ‹إِنَ غَيَ مُكُ، دُكْ وَنْدَ يَكٜىٰدَ أَبُ، ذَاعَ ڧَارَ مَسَ؞ وَنْدَ بَاشِ دَ أَبُ كُوَ، كُواْ طَنْ كَطَنْ دَ يَكٜىٰدَشِ مَا، ذَاعَ كَرْٻَ دَغَ غَرٜىٰشِ؞

27وَطَنَّنْ مَاسُ ڧِينَ كُمَ، وَطَنْدَ بَاسَسُواْ إِنْيِ مُلْكِ عَكَنْسُ، كُكَٰوُاْسُ نَنْ عَكَشٜىٰسُ أَغَبَنَ؞› »

28دَ عِيسَىٰ يَڢَطِ حَكَ، سَيْ يَيِغَبَ ذُوَا عُرُوشَلِيمَ؞

29دَيَكَيْ كُسَدَ وَطَنْسُ ڧَوْيُكَنْ دَ عَكٜىٰثٜىٰ دَسُو بٜىٰتَڢَجِ دَ بٜىٰتَنِ دَسُكٜىٰ غٜىٰڢٜىٰنْ تُدُنْ عِتَتُوَنْ ظَيْتُنْ، سَيْ يَعَيْكِ أَلْمَجِرَنْسَ غُدَا بِيُ،

30يَثٜىٰمُسُ «كُشِغَ ڧَوْيٜىٰنَّنْ نَغَبَنْكُ؞ دَ كُنْ كَيْ، ذَاكُغَ وَنِ طَنْ جَاكِنْ دَ بَعَتَٻَ هَوَبَ أَطَوْرٜىٰ؞ كُكُنْثٜىٰشِ كُكَٰوُاْ نَنْ؞

31عِدَنْ وَنِ يَثٜىٰ، ‹دُوانْمٜىٰ كُكٜىٰ كُنْثٜىٰ جَاكِنْ؟› كُثٜىٰ مَسَ، ‹مَيْغِرْمَ يَنَ بُڧَاتَرْسَ؞› »

32وَطَنْدَ عَكَ عَيْكَ سُكَ تَڢِے، سُكَ كُمَ سَامِ كُواْمٜىٰ كَمَرْ دَيْ يَدَّ عِيسَىٰ يَغَيَ مُسُ؞

33سُنَ ثِكِنْ كُنْثٜىٰوَ كٜىٰنَنْ، سَيْ مَاسُ جَاكِنْ سُكَثٜىٰ مُسُ «دُوانْمٜىٰ كُكٜىٰ كُنْثٜىٰشِ؟»

34سُكَثٜىٰ «أَيْ، مَيْغِرْمَ نٜىٰ يَكٜىٰ بُڧَاتَرْسَ؞»

35سُكَ كَيْشِ وُرِنْ عِيسَىٰ ؞ دَسُكَ شِمْڢِطَا رِيغُنَنْسُ عَكَنْ جَاكِنْ، سَيْ سُكَ طَوْكِ عِيسَىٰ سُكَسَاشِ عَكَيْ؞

36يَنَ ثِكِنْ تَڢِيَ، سَيْ مُتَنٜىٰ سُكَ دِنْ‌غَ شِمْڢِطَا رِيغُنَنْسُ عَكَنْ حَنْيَ؞

37دَيَيِ كُسَدَ عُرُوشَلِيمَ دَيْدَيْ وُرِنْ دَ حَنْيَرْ تَغَنْ‌غَرَ دَغَ كَنْ تُدُنْ عِتَتُوَنْ ظَيْتُنْ، سَيْ تَارُوانْ أَلْمَجِرَنْسَ دَيَوَ سُكَ ڢَارَ غُواْدٜىٰ وَ اللَّهْ ، سُنَ يَبُوانْسَ دَ مُرْيَ مَيْ ڧَرْڢِے عَكَنْ أَبُبُوَ مَاسُ بَنْ مَامَاكِنْ دَ سُكَ غَنِ؞

38سُنَ ثٜىٰوَ «أَلْبَرْكَ تَا تَبَّتَا غَ سَرْكِے وَنْدَ يَكٜىٰ ذُوَا عَثِكِنْ سُونَنْ عُبَنْ‌غِجِ! سَلَمَ تَا كَسَنْثٜىٰ أَ سَمَ، طَوْكَكَ كُمَ غَ اللَّهْ!»

39سَيْ وَطَنْسُ ڢَرِسِيَاوَنْ دَسُكٜىٰ ثِكِنْ جَمَعَرْ سُكَثٜىٰمَسَ «مَلَمْ، كَڟَاوَتَا وَ أَلْمَجِرَنْكَ سُيِ شِضُ!»

40يَأَمْسَ يَثٜىٰ «إِنَ غَيَ مُكُ، كُواْ وَطَنَّنْ سُنْيِ شِضُ، دُوَڟُو مَا دَكَنْسُ ذَاسُ ڢَارَ إِيهُ؞»

41دَ يَذُواْ كُرْكُسَ، يَغَ بِرْنِنْ عُرُوشَلِيمَ، سَيْ يَيِمَتَ كُوكَا؞

42يَثٜىٰ «دَمَا عَثٜىٰ يَوْ كُنْ سَنْ أَبِنْدَ عَكٜىٰ بُڧَاتَ دُواْمِنْ سَامُنْ سَلَمَ! عَمَّا غَاشِ بَذَاكُ عِيَ غَنِبَ؞

43لُواْكَثِ يَنَ ذُوَا دَ مَاسُ غَابَادَكُو ذَاسُ غِنَا بَنْ‌غُواْ كٜىٰوَيٜىٰ دَكُو سُيِيَاڧِ دَكُو؞ سُواْجُواْجِ ذَاسُ كٜىٰوَيٜىٰكُ تَكُواْوَنٜىٰ غٜىٰڢٜىٰ؞

44ذَاسُيِ كَثَ كَثَ دَكُو، سُكُمَ كَشٜىٰ مُتَنٜىٰنْكُ دُكَ؞ بَا كُواْ دُوڟٜىٰ طَيَ نَغِنٜىٰ غِنٜىٰنْكُ دَ ذَاعَ بَرِ عَكَنْ طَنْعُوَنْسَ؞ وَنَّنْ ذَيْ ڢَرُنٜىٰ سَبُواْدَ بَكُ يَرْدَ ثٜىٰوَ اللَّهْ يَا ذُواْ دُواْمِنْ يَثٜىٰثٜىٰكُبَ؞»

45سَيْ عِيسَىٰ يَشِغَ هَيْكَلِ يَڢَارَ كُواْرَرْ مَاسُ سَيَرْ دَ كَايَ،

46يَنَثٜىٰ مُسُ «أَيْ، أَرُبُوثٜىٰ يَكٜىٰ ثِكِنْ مَغَنَرْ اللَّهْ ثٜىٰوَ ‹غِدَانَ ذَيْ ذَمَ غِدَنْ أَدُّعَ؞› عَمَّا كُنْ مَيْدَشِ وُرِنْ ٻُيَنْ یَنْ ڢَشِ!»

47كُواْوَثٜىٰ رَانَ يَيِ تَكُواْيَرْوَا أَ هَيْكَلِ؞ عَمَّا مَنْيَنْ ڢِرِسْتُواْثِے دَ مَلَمً كُواْيَرْوَرْ مُوسَٰى دَ شُوغَبَنِّنْ جَمَعَ سُنْ نٜىٰمِ حَنْيَرْ دَ ذَاسُ كَشٜىٰشِ؞

48عَمَّا بَسُ سَامِ حَنْيَرْ دَ ذَاسُ كَشٜىٰشِيبَ دُواْمِنْ مَغَنَرْسَ تَطَوْكِ حَنْكَلِنْ كُواْوَ دَيَكٜىٰ أَوُرِنْ، كُمَ بَاسَسُواْ كُواْ كَلْمَ طَيَ تَوُثٜىٰ مُسُ؞