1 Chronicles 11

Ilonggo (Maayong Balita nga Biblia (2012))

← Chapter 10 Jump to: Chapter 12 →

1Ang tanan nga mga tawo sang Israel nagkadto kay David sa Hebron kag nagsiling sa iya, “Kadugo mo kami.

2Sang una, sang si Saul pa ang aton hari, ginpangulohan mo ang mga tawo sang Israel sa inaway, kag ang Ginoo nga imo Dios nagsaad sa imo nga ikaw magapangulo sang iya mga tawo kag ikaw mangin-ila hari.”

3Gani ang tanan nga mga pangulo sang Israel nagkadto kay Haring David sa Hebron. Naghimo sia sing balaan nga kasugtanan sa ila, kag ginhaplasan nila sia subong hari sang Israel, suno sa ginsaad sang Ginoo paagi kay Samuel.

4Si Haring David kag ang tanan nga mga Israelinhon naglakat kag nagsalakay sang siudad sang Jerusalem. Amo ini ang Jebus sang una, kag ang mga Jebusnon nga amo ang nahauna nga mga pumoluyo sang duta nagaestar pa didto.

5Ginsingganan sang mga Jebusnon si David nga indi gid sia makasulod sa siudad, pero naagaw ni David ang ila pamakod sa Sion, kag gintawag ini nga “Siudad ni David.”

6Si David nagsiling nga ang bisan sin-o nga una makapatay sang Jebusnon manginpangulo sang hangaway! Si Joab nga ang iya iloy amo si Seruya nag-una sa pagsalakay kag nanginpangulo sia.

7Tungod kay si David nag-estar sa sini nga pamakod, gintawag ini nga “Siudad ni David.”

8Ginpatindog niya liwat ang siudad sa palibot sini, sugod sa lugar nga gintampukan sa nasidlangan nga bahin sang bakulod. Ginkaayo ni Joab ang nabilin nga bahin sang siudad.

9Si David naggamhanan nga naggamhanan, tungod kay ang Ginoo sang mga hangaway nag-upod sa iya.

10Amo ini ang lista sang isganan nga mga soldado ni David. Upod sa nabilin nga mga tawo sang Israel, ginbuligan sini nga mga soldado si David nga manginhari, kag ginhimo nila ang ila masarangan agod manginmabakod ang iya ginharian suno sa ginsaad sang Ginoo.

11Ang nahauna amo si Jasobeam, gikan sa kabarangayan ni Hacmon, ang pangulo sang ginatawag “Ang Tatlo.” Nagpakig-away sia batok sa 300 ka mga tawo kag ginpatay niya sila tanan sang iya bangkaw sa isa lang ka tion.

12Ang madason nga isganan sa ginatawag “Ang Tatlo” amo si Eleazar nga anak ni Dodo, gikan sa kabarangayan ni Aho.

13Upod kay David nagpakig-away sia batok sa mga Filistinhon didto sa Pas-damin. Didto sia sa talamnan sang sebada sang magpalagyo ang mga Israelinhon,

14gani sia kag ang iya mga tinawo wala maghalin sa tunga sang talamnan kag nagpakig-away sa mga Filistinhon. Ang Ginoo naghatag sa ila sang daku nga pagdaog.

15Isa ka adlaw ang tatlo sang traynta ka pangulo nga mga soldado nagkadto sa isa ka igang sa diin si David nagpabilin malapit sa Kweba sang Adulam, samtang ang isa ka grupo sang mga Filistinhon naghimo sing Kampo sa Kapatagan sang Refaim.

16Sadto nga tion, si David yara sa napamakuran nga bakulod, kag ang isa ka grupo sang mga Filistinhon nag-agaw sang Betlehem.

17Ginhidlaw gid si David kag nagsiling sia, “Kon may yara kuntani nga makadala sa akon sing tubig nga ilimnon halin sa bubon nga yara sa pwerta sang Betlehem!”

18Ang tatlo ka isganan nga mga soldado nagsulod sa kampo sang mga Filistinhon, nagtimba sing tubig sa bubon kag gindala ini kay David. Pero indi sia mag-inom sini, kundi gin-ula niya ini subong isa ka halad sa Ginoo,

19kag nagsiling sia, “Indi gid ako mag-inom sini! Pareho lang ini sang nagainom ako sang dugo sini nga mga tawo nga nagtaya sang ila mga kabuhi!” Gani, wala sia mag-inom sini. Amo ini ang mga binuhatan sining tatlo ka isganan nga mga soldado.

20Ang utod ni Joab nga si Abisai amo ang pangulo sang “Isganan nga Katluan.” Nagpakig-away sia sa 300 ka mga tawo kag ginpamatay niya sila sang iya bangkaw, kag nanginbantog sia “Sa Katluan.”

21Sia amo ang labing bantog sang “Sa Katluan,” kag nanginpangulo nila sia, pero indi gid sia pareho ka bantog sang sa ginatawag “Ang Tatlo.”

22Si Benaya, anak ni Joiada, nga taga-Kabzeel, isa ka isganan nga soldado. Madamo ang iya nahimo nga nagapamatuod sang iya kaisog. Lakip sini, amo ang iya pagpatay sang duha ka bantog nga mga hangaway nga Moabnon. Isa sadto ka adlaw nga nagaulan sang yelo, nagpanaog sia sa buho kag ginpatay ang isa ka leon.

23Ginpatay man niya ang isa ka Ehiptohanon, isa ka daku nga tawo nga nagataas sing pito kag tunga ka tapak, nga may daku kaayo nga bangkaw. Ginsalakay sia ni Benaya sang baston, gin-agaw niya ang bangkaw sa kamot sang Ehiptohanon, kag gingamit niya ini sa pagpatay sa iya.

24Amo ini ang maisog nga mga hinimuan ni Benaya, nga isa sang “Katluan.”

25Sia amo ang labing maayo sa “Katluan,” pero indi sia pareho ka bantog sang sa ginatawag, “Ang Tatlo.” Ginhimo sia ni David nga pangulo sang iya mga gwardya.

← Chapter 10 Jump to: Chapter 12 →