1 Chronicles 16

Ilonggo (Maayong Balita nga Biblia (2012))

← Chapter 15 Jump to: Chapter 17 →

1Gindala nila ang Kaban sang Kasugtanan pakadto sa tolda nga gin-aman ni David para sa sini kag ginbutang ini sa sulod. Dayon nagdulot sila sa Dios sing mga halad nga sinunog kag mga halad sa paghiambit.

2Sang makatapos si David sa pagdulot sing mga halad nga sinunog, ginbendisyunan niya ang mga tawo sa ngalan sang Ginoo,

3kag ginhatagan sila tanan sing pagkaon. Ginhatagan niya ang tagsa ka lalaki kag babayi sa Israel sing isa ka bilog nga tinapay, isa ka gulot sang inasal nga karne, kag mga pasas.

4Si David nagpili sing mga Levita sa pagdumala sang pagsimba sa Ginoo, ang Dios sang Israel, sa atubangan sang Kaban sang Kasugtanan, paagi sa pagkanta kag pagdayaw sa iya.

5Si Asaf ginpili nga pangulo kag ang iya kabulig amo si Zacarias. Sanday Jeiel, Semiramot, Jehiel, Matitias, Eliab, Benaya, Obed-edom, kag Jeiel amo ang magatukar sang mga arpa. Si Asaf amo ang magapatunog sang mga platilyos,

6kag ang duha ka mga pari nga si Benaya kag si Jahaziel amo pirme ang magatukar sang mga trumpeta sa atubangan sang Kaban sang Kasugtanan.

7Amo yadto ang nahauna nga paghatag ni David sa kay Asaf kag sa iya kapareho nga mga Levita sang katungdanan sa pagkanta sang mga pagdayaw sa Ginoo.

8Magpasalamat sa Ginoo, iwali ang iya pagkagamhanan, sugiri ang mga katawhan sang iya mga hinimuan.

9Mag-amba sing pagdayaw sa Ginoo, isugid ang makatilingala nga mga butang nga iya ginhimo.

10Magkalipay tungod kay iya kita, ang tanan nga nagasimba sa iya magkalipay!

11Magdangop sa Ginoo sa pagpangayo sing bulig, kag magsimba sa iya sa gihapon.

12Kamo nga mga kaliwat ni Jacob, ang alagad sang Dios, mga kaliwat ni Israel, nga pinili sang Dios, dumdoma ang mga milagro nga iya ginhimo kag ang mga paghukom nga iya ginhatag.

14Ang Ginoo amo ang aton Dios, ang iya mga sugo para sa bug-os nga kalibutan.

15Indi gid pagkalimti ang kasugtanan sang Dios, nga iya ginhimo para sa tanan nga mga kaliwatan,

16ang kasugtanan nga iya ginhimo kay Abraham, ang saad nga iya ginhimo kay Isaac.

17Ang Ginoo naghimo sing kasugtanan kay Jacob, nga magapadayon sa walay katubtoban.

18Nagsiling sia, “Ihatag ko sa imo ang duta sang Canaan, mangin-imo ini pagapanag-iyahan.”

19Ang mga tawo sang Dios diutay lang, mga dumoluong sa duta sang Canaan.

20Nagdalangdalang sila halin sa isa ka pungsod pakadto sa isa ka pungsod, halin sa isa ka ginharian pakadto sa isa.

21Pero ang Dios wala magtugot nga may isa nga magpigos sa ila, sa pag-apin sa ila ginpaandaman niya ang mga hari:

22“Indi paghaliti ang akon pinili nga mga alagad, indi pag-anha ang akon mga propeta.”

23Mag-amba sa Ginoo, bug-os nga kalibutan! Adlaw-adlaw ipahibalo ang maayong balita nga sia nagluwas sa aton.

24Isugid ang iya pagkahalangdon sa mga kapungsoran, ang iya gamhanan nga mga binuhatan sa tanan nga mga katawhan.

25Ang Ginoo gamhanan, kag dapat naton sia dayawon, dapat naton sia tahuron labaw pa sang sa tanan nga mga dios.

26Ang mga dios sang iban nga mga kapungsoran mga diosdios lamang, pero ang Ginoo amo ang nagtuga sang mga kalangitan.

27Ang kadungganan kag pagkahalangdon nagalikop sa iya, ang gahom kag kalipay nagapuno sang iya Templo.

28Dayawa ang Ginoo, tanan nga mga katawhan sang duta, dayawa ang iya pagkahalangdon kag gahom.

29Dayawa ang dungganon nga ngalan sang Ginoo, magdala sing dulot kag magsulod sa iya Templo. Magyaub sa presensya sang Ginoo kon magpahayag sia,

30Magkurog sa iya atubang, bug-os nga duta! Ang duta napahamtang sing malig-on sa iya lugar kag indi mahalin.

31Magkalipay, langit kag duta! Sugiri ang mga kapungsoran nga ang Ginoo amo ang hari.

32Magdaguhob, kadagatan, kag ang tanan nga tinuga nga yara sa imo, magkalipay, mga kaumhan, kag ang tagsa ka butang nga yara sa imo.

33Ang mga kakahuyan sa mga kagulangan magakanta sa kalipay kon ang Ginoo mag-abot sa paggahom sa duta.

34Magpasalamat sa Ginoo, tungod kay maayo sia, ang iya paghigugma wala sing katapusan!

35Singgana sia, “Luwasa kami, O Dios nga amon Manluluwas tipuna kami sing tingob. Luwasa kami sa mga kapungsoran, agod magpasalamat kami kag magdayaw sa imo balaan nga ngalan.”

36Dayawa ang Ginoo, ang Dios sang Israel! Dayawa sia karon kag sa walay katubtoban! Dayon ang tanan nga mga tawo nagsiling, “Kabay pa!” kag nagdayaw sila sa Ginoo.

37Ginhimo ni David si Asaf kag ang iya kapareho nga mga Levita nga manginpermanente nga manugdumala sang pagsimba nga ginhiwat sa lugar sa diin nabutang ang Kaban sang Kasugtanan. Dapat nila tumanon ang ila mga katungdanan didto adlaw-adlaw.

38Si Obed-edom, anak ni Jeduton kag ang sesentay-otso ka mga lalaki sa iya kabarangayan amo ang magabulig sa ila. Si Hosa kag si Obed-edom amo ang gintugyanan sa pagbantay sang mga pwerta.

39Pero si Sadoc nga pari kag ang iya kapareho nga mga pari amo ang nagdumala sang pagsimba sa Ginoo sa altar sa Gabaon.

40Sa tagsa ka aga kag gab-i dapat sila magdulot sing mga halad nga sinunog sa altar suno sa nasulat sa Kasugoan nga ginhatag sang Ginoo sa Israel.

41Didto upod sa ila amo sanday Heman kag Jeduton kag ang iban pa nga pinasahi nga ginpili sa pagkanta sing mga pagdayaw sa Ginoo tungod sang iya walay katapusan nga gugma.

42Si Heman kag si Jeduton amo man ang gintugyanan sa pagtukar sang mga trumpeta kag mga platilyos kag sang iban pa nga mga instrumento sa musika kon ginakanta ang mga ambahanon sa pagdayaw. Ang mga katapo sang kabarangayan ni Jeduton amo ang gintugyanan sa pagbantay sang mga pwerta.

43Dayon ang tagsatagsa nagpauli, kag si David nagpauli sa pagpakighiupod sa iya panimalay.

← Chapter 15 Jump to: Chapter 17 →