1 Chronicles 12

Ilonggo (Maayong Balita nga Biblia (2012))

← Chapter 11 Jump to: Chapter 13 →

1Madamo nga mga tawo ang nag-upod kay David sang nagaestar sia sa Ziklag, sa iya pagpanago gikan kay Haring Saul nga anak ni Kis. Sila tanan mga batid kag masaligan nga mga soldado,

2mga katapo sang tribo ni Benjamin, nga amo man ang tribo ni Saul. Sarang sila makapana ukon makalabyog sing bato sang ila tuo ukon wala nga kamot.

3Ang ila mga pangulo amo sanday Ahiezer kag Joas, mga anak ni Semaa, nga taga-Gebeat. Amo ini ang mga soldado: Jeziel kag Pelet, mga anak ni Azmavet Beraca kag Jehu, nga taga-Anatot Ismaias, nga taga-Gabaon, isa ka isganan nga soldado kag isa sang mga pangulo sang “Katluan” Jeremias, Jahaziel, Johanan, kag Jozabad, nga mga taga-Gedera Eluzai, Jerimot, Bealias, Semarias, kag Sefatias, nga mga taga-Haruf Elkana, Isias, Azarel, Joezer, kag Jasobeam, gikan sa kabarangayan ni Core Joela kag Zebadias, mga anak ni Jeroham nga taga-Gedor.

8Amo ini ang mga ngalan sang isganan kag batid nga mga soldado halin sa tribo ni Gad nga nag-upod sa grupo ni David sang didto sia sa pamakod sa desierto. Mga sampaton sila sa pag-uyat sing taming kag bangkaw, subong sila kaisog sang mga leon, kag subong kadasig sang usa sa kabukiran.

9Suno sa ila rangko amo ini ang masunod halin sa ibabaw paidalom: Ezer, Obadias, Eliab, Mismana, Jeremias, Atai, Eliel, Johanan, Elzabad, Jeremias, kag Macbanai.

14Ang iban sini nga mga tawo nga halin sa tribo ni Gad mataas nga mga opisyal nga may 1,000 ka mga tinawo, kag ang iban mga kabulig nga mga opisyales nga may 100 ka mga tinawo.

15Sa nahauna nga bulan sang tuig sang pag-awas sang Suba sang Jordan, nagtabok sila, kag ginpaaplaag nila ang mga tawo nga nag-estar sa mga kapatagan sa nasidlangan kag nakatundan sang suba.

16Isa ka tion may grupo sang mga tawo gikan sa mga tribo nanday Benjamin kag Juda nga nagkadto sa pamakod sa diin nagatener si David.

17Ginsugata sila ni David kag ginsingganan, “Kon nagapalapit kamo subong mga abyan sa pagbulig sa akon, ginaabiabi ko kamo. Mag-upod kamo sa amon! Pero kon ang inyo tuyo amo ang pagtugyan sa akon sa akon mga kaaway, bisan wala ako magtinguha sa pagsakit sa inyo, ang Dios sang aton mga katigulangan makahibalo sina kag magasilot gid sa inyo.”

18Ang isa sa ila, si Amasai, nga sang ulihi nanginpangulo sang “Katluan,” gingamhan sang Espiritu halin sa Dios, kag nagsinggit sia, “O David nga anak ni Jesse, imo kami! Kabay nga magmadinalag-on ka kag ang mga nagaupod sa imo! Kay ang Dios nagaupod sa imo!” Gin-abiabi sila ni David kag ginhimo nga mga opisyales sang iya mga hangaway.

19Ang iban nga mga hangaway gikan sa tribo ni Manases nagbuylog sa guban ni David sang paglakat niya upod sa mga Filistinhon sa pagpakig-away batok sa kay Haring Saul. Ang matuod nga wala gid man sia magbulig sa mga Filistinhon, tungod kay ang ila mga hari nagpapauli sa iya sa kahadlok nga basi itugyan niya sila sa iya anay agalon nga si Saul.

20Ang masunod amo ang mga hangaway gikan sa tribo ni Manases nga nag-upod kay David sang pagkadto niya sa Ziklag: Adna, Jozabad, Jediael, Micael, Jozabad, Eliu, kag Zilletai. Sa Manases kada-isa sa ila nagpangulo sang 1,000 ka mga tinawo.

21Nag-alagad sila kay David subong mga pangulo sang iya mga hangaway, tungod kay sila tanan mga bantog nga mga hangaway. Sang ulihi nangin-opisyales sila sang mga hangaway sang Israel.

22Halos adlaw-adlaw may bag-o nga mga tawo nga nagadugang sa mga hangaway ni David, sa bagay nga nagdamo na gid ang iya mga soldado.

23Madamo nga batid nga mga soldado ang nag-upod sa hangaway ni David sa Hebron sa pagbulig sa iya nga manginhari sa pagbulos kay Saul suno sa ginsaad sang Ginoo. Amo ini ang ila kadamuon: Juda: 6,800 ka mga tawo nga nahanas sing maayo sa hinganiban nga may mga taming kag mga bangkaw; Simeon: 7,100 ka batid nga mga hangaway; Levi: 4,600 ka mga tawo; Ang mga sumolunod ni Joiada nga kaliwat ni Aaron: 3,700 ka mga tawo; Ang mga pariente ni Sadoc nga isa ka pamatan-on kag isganan nga soldado: baynte-dos ka mga pangulo; Benjamin, ang tribo ni Saul: 3,000 ka mga tawo, ang kalabanan sang mga tinawo sang tribo ni Benjamin nag-unong kay Saul; Efraim: 20,800 ka mga hangaway nga bantog sa ila kaugalingon nga kabarangayan; Manases sa Nakatundan: 18,000 ka mga tawo nga ginpili sa paglakat kag sa paghimo kay David nga hari; Isacar: 200 ka mga pangulo, upod sa ila mga tinawo sa idalom sang ila pagmando. Amo ini nga mga pangulo ang nakahibalo kon ano ang dapat himuon sang Israel kag kon ano ang labing maayo nga tion sa paghimo sini; Zabulon: 50,000 ka mga tawo nga mainunongon kag masaligan nga handa sa pagpakig-away, nga nahanas sa paggamit sang tanan nga sahi sang hinganiban. Neftali: 1,000 ka mga pangulo upod sang 37,000 ka tawo nga may mga taming kag mga bangkaw; Dan: 28,600 ka nahanas nga mga hangaway; Aser: 40,000 ka mga tawo nga handa sa pagpakig-away; Mga tribo sa sidlangan sang Jordan—Ruben, Gad, kag ang tribo ni Manases sa Sidlangan: 120,000 ka mga tawo nga nahanas sa paggamit sang tanan nga sahi sang hinganiban.

24Ini tanan nga mga hangaway nga handa sa pagpakig-away nagkadto sa Hebron, nga nagpamat-od sa paghimo kay David nga hari sa bug-os nga Israel. Ang tanan nga mga tawo sang Israel nag-ugyon sa amo nga tinutuyo.

25Nagpabilin sila didto sing tatlo ka adlaw upod kay David, nga nagakinasadya sa pagkinaon kag pag-ininom sang ginhanda sang ila mga kasimanwa para sa ila.

26Halin sa pinakamalayo nga naaminhan nga mga tribo nanday Isacar, Zabulon, kag Neftali, may mga tawo nga nag-abot nga nagadala sing mga asno, mga kamelyo, mga mula, kag mga baka nga nakargahan sing mga kalan-on—harina, mga pasas, mga higos, bino, kag lana sang olivo. Nagdala man sila sang mga baka kag mga karnero nga ilihawon agod kaunon. Ini tanan nagpakita sang pagkinasadya nga nabatyagan sa bug-os nga pungsod.

← Chapter 11 Jump to: Chapter 13 →