1 Chronicles 29

Ilonggo (Maayong Balita nga Biblia (2012))

← Chapter 28 Jump to:

1Dayon si Haring David nagpahibalo sa bug-os nga katilingban: “Ang akon anak nga si Solomon amo ang ginpili sang Dios, pero pamatan-on kag linghod pa sia. Ang bulohaton tama kadako, tungod kay ini indi palasyo para sa mga tawo, kundi isa ka templo para sa Ginoo nga Dios.

2Ginhimo ko ang akon masarangan sa pag-aman sing mga galamiton para sa Templo—bulawan, pilak, bronsi, salsalon, kahoy, malahalon nga mga bato kag mga perlas, mga bato nga may nanarisari nga kolor, kag madamo nga mga marmol.

3Wala labot sining akon mga ginhanda, naghatag pa ako sing pilak kag bulawan halin sa akon kaugalingon nga pagkabutang, tungod sang akon paghigugma para sa Templo sang Dios.

4Naghatag ako sing 115 ka tonelada nga puraw nga bulawan kag 265 ka tonelada sang puraw nga pilak nga ipuni sa mga dingding sang Templo

5kag para sa tanan nga mga gamit nga himuon sang mga platero. Karon sin-o pa ang luyag maghatag sing maalwan nga dulot sa Ginoo?”

6Dayon ang mga pangulo sang mga kabarangayan, ang mga opisyales sang mga tribo, ang mga pangulo sang mga hangaway, kag ang mga manugdumala sang mga pagkabutang sang hari naghatag sing kinabubot-on

7para sa pagpaobra sang Templo. Naghatag sila sing 190 ka tonelada nga bulawan, 380 ka tonelada nga pilak, 675 ka tonelada nga bronsi, kag 3,750 ka tonelada nga salsalon.

8Ang may malahalon nga mga bato naghatag sini sa talaguan sang manggad sang Templo, nga gintugyan kay Jehiel nga Levita sa kabarangayan ni Gerson.

9Ang mga tawo naghatag sing kinabubot-on sa Ginoo, kag nalipay gid sila nga madamo ang nahatag. Si Haring David nagkalipay man sing tama gid.

10Didto sa atubang sang bug-os nga katilingban gindayaw ni David ang Ginoo. Nagsiling sia, “O Ginoo nga Dios sang amon ginikanan nga si Jacob, kabay nga dayawon ka sa walay katubtoban!

11Daku ka kag gamhanan, dungganon, halangdon, kag dalayawon. Ang tagsa ka butang sa langit kag sa duta imo, kag ikaw hari, nga labi ka gamhanan sa tanan.

12Ang tanan nga kamanggaran kag kadungganan nagikan sa imo; ginagamhan mo ang tagsa ka butang paagi sa imo kusog kag gahom; kag mahimo mo ang bisan sin-o nga magmangingamhanan kag magmanginmakusog.

13Karon, O Dios namon, nagapasalamat kami kag nagadayaw sa imo dungganon nga ngalan.

14“Pero ang akon mga tinawo kag ako wala gid sing bisan ano nga mahatag sa imo, tungod kay ang tanan nga butang isa ka dulot nga nagikan sa imo kag ginabalik lamang namon sa imo ang imo na nga daan.

15Nakahibalo ikaw, O Ginoo, nga nagaagi kami sa sini nga kabuhi kaangay sang mga dumoluong kag mga manlulugayaw, subong sang amon mga katigulangan. Ang amon mga inadlaw kaangay sang landong nga umalagi, kag indi kami makalikaw sa kamatayon.

16O Ginoo, nga Dios namon, gintipon namon ini tanan nga manggad sa pagpatindog sang isa ka templo sa pagpasidungog sang imo balaan nga ngalan, pero ini tanan nagikan sa imo kag ang tanan imo.

17Nakahibalo ako nga ikaw nagatilaw sang tagsa ka tagipusoon, kag nalipay ikaw sa mga tawo nga sinsero. Sa maminatud-on nga tagipusoon ginahatag ko ini tanan sa imo sing kinabubot-on, kag nakita ko kon daw ano ang kalipay sang imo mga tawo nga nagtipon diri sa pagdala sa imo sini nga mga dulot.

18O Ginoo nga Dios sang amon mga katigulangan nga si Abraham, si Isaac, kag si Jacob, tipigi ini nga gugma nga mangin mapag-on sing dayon sa tagipusoon sang imo mga tawo, kag buligi sila nga magmatutom sa gihapon sa imo.

19Hatagan mo ang akon anak nga si Solomon sing handom sa bug-os niya nga tagipusoon sa pagtuman sang tagsa ka butang nga imo ginasugo, kag sa pagpatindog sang Templo nga gin-amanan ko sini nga mga galamiton.”

20Dayon si David nagmando sa mga tawo, “Dayawa ang Ginoo nga inyo Dios!” Kag ang bug-os nga katilingban nagdayaw sa Ginoo, ang Dios sang ila mga katigulangan, kag nagluhod sila sa pagpasidungog sa Ginoo kag sa hari man.

21Sang madason nga adlaw nag-ihaw sila sing mga sapat subong mga halad sa Ginoo kag nagdulot sing mga halad nga sinunog sa iya. Naghalad sila sing 1,000 ka baka nga torite, 1,000 ka karnero, kag 1,000 ka kordero, upod ang mga dulot nga bino kag sang madamo nga mga sapat nga halad agod kaunon sang mga tawo sang Israel.

22Gani sadto nga adlaw malipayon gid samtang nagakinaon sila kag nagaininom sa atubang sang Ginoo. Sa liwat ginpakilala nila si Solomon subong hari. Sa ngalan sang Ginoo ginhaplasan nila sia subong ila hari kag si Sadoc subong ila pari.

23Gani si Solomon nagbulos sa iya amay nga si David sa trono nga ginpalig-on sang Ginoo. Nagmadinalag-on sia nga hari, kag ang bug-os nga pungsod sang Israel nagtuman sa iya.

24Ang tanan nga mga opisyales kag mga soldado, kag bisan ang tanan nga mga anak nga lalaki ni David nagsaad sa pag-unong sa kay Solomon subong hari.

25Ginbuot sang Ginoo nga ang bug-os nga pungsod magtahod kay Solomon, kag ginhimo niya nga mahimayaon ang iya paghari labi pa sang sa bisan sin-o nga hari nga naggahom sa Israel.

26Si David nga anak ni Jesse naggahom sa bug-os nga Israel

27sa sulod sang kwarenta ka tuig. Naggahom sia sa Hebron sa sulod sang pito ka tuig kag sa Jerusalem sa sulod sang trayntay tres ka tuig.

28Napatay sia nga tigulang na gid kaayo, manggaranon kag ginatahod, kag ang iya anak nga si Solomon nagbulos sa iya subong hari.

29Ang maragtas ni Haring David halin sa ginsugoran tubtob sa katapusan nasulat sa mga libro s ang tatlo ka mga propeta nga amo sanday Samuel, Natan, kag Gad.

30Ang maragtas nagasugid kon daw ano ang iya paggahom, kon daw ano ang iya pagkagamhanan, kag ang tanan nga mga butang nga nahanabo sa iya, sa Israel, kag sa palibot nga mga ginharian.

← Chapter 28 Jump to: