1 Chronicles 15

Ilonggo (Maayong Balita nga Biblia (2012))

← Chapter 14 Jump to: Chapter 16 →

1Si David nagpatindog sing mga balay sa Siudad ni David nga iya pagagamiton. Naghanda man sia sing lugar para sa Kaban sang Kasugtanan sang Dios, kag nagpatindog sia sing tolda para sa sini.

2Dayon nagsiling sia, “Ang mga Levita lamang amo ang dapat magpas-an sang Kaban sang Kasugtanan, tungod kay sila amo ang ginpili sang Ginoo sa pagpas-an sini kag sa pag-alagad sa iya sa walay katapusan.”

3Gani gintipon ni David ang tanan nga mga tawo sang Israel sa Jerusalem agod sa pagdala sang Kaban sang Kasugtanan pakadto sa lugar nga iya gin-aman para sa sini.

4Dayon ginpatawag niya ang mga kaliwat ni Aaron kag ang mga Levita.

5Halin sa kabarangayan ni Kohat nag-abot si Uriel, nga pangulo sang 120 ka mga katapo sang iya barangay.

6Halin sa kabarangayan ni Merari nag-abot si Asaya, nga pangulo sang 220.

7Halin sa kabarangayan ni Gersom nag-abot si Joel, nga pangulo sang 130.

8Halin sa kabarangayan ni Elisafan nag-abot si Semaya, nga pangulo sang 200.

9Halin sa kabarangayan ni Hebron nag-abot si Eliel, nga pangulo sang otsenta.

10Kag sa kabarangayan ni Uziel nag-abot si Aminadab, nga pangulo sang 112.

11Ginpatawag ni David ang mga pari nga amo sanday Sadoc kag Abiatar, kag ang mga Levita nga amo sanday Uriel, Asaya, Joel, Semaya, Eliel, kag Aminadab.

12Ginsingganan niya sila, “Kamo ang mga pangulo sang nga kabarangayan sang mga Levita. Pakabalaana ang inyo kaugalingon kag ang inyo kapareho nga mga Levita, agod takos kamo sa pagdala sang Kaban sang Kasugtanan sang Ginoo nga Dios sang Israel sa lugar nga akon gin-aman para sa sini.

13Tungod kay wala kamo didto sang nahauna nga tion sa pagpas-an sini, gani ginsilutan kita sang Ginoo nga aton Dios, kay wala kita magsimba sa iya suno sa dapat naton nga himuon.”

14Dayon ang mga pari kag mga Levita nagpakabalaan sang ila kaugalingon agod sa pagsaylo sang Kaban sang Kasugtanan sang Ginoo nga Dios sang Israel.

15Ginyayungan ini sang mga Levita, suno sa ginsugo sang Ginoo kay Moises nga pagahimuon.

16Ginsugo ni Moises ang mga pangulo sang mga Levita sa pagpili sing mga Levita sa pagkanta kag sa pagtukar sang masadya nga mga musika paagi sa mga arpa kag mga platilyos.

17Halin sa mga kabarangayan sang mga manug-amba, ginpili nila ang masunod nga mga lalaki sa pagtukar sang mga Platilyos. Sila amo sanday Heman nga anak ni Joel, ang iya pariente nga si Asaf nga anak ni Berequias, kag si Etan nga anak ni Kusaias, sa kabarangayan ni Merari. Ginpili nila ang masunod nga mga Levita agod sa pagbulig sa ila sa pagtukar sang mataas sing bagay nga mga arpa. Sila amo sanday Zacarias, Jaazal, Semiramot, Jehiel, Uni, Eliab, Maasias kag Benaya. Sa pagtukar sang mga arpa nga may manubo sing bagay ginpili nila ang mga Levita nga amo sanday Matitias, Elifelehu, Micnias, kag Azazias, kag ang duha nga nagagwardya sa Templo nga si Obed-edom kag si Jeiel.

22Si Kenanias ginpili nga magadumala sang mga musikero nga Levita tungod sang iya pagkasampaton sa musika.

23Si Berequias kag si Elkana kaupod nanday Obed-edom kag Jehias amo ang ginpili nga mangingwardya sang Kaban sang Kasugtanan. Ang mga pari nga sanday Sebanias, Josafat, Natanael, Amasai, Zacarias, Benaya, kag Eliezer ginpili sa pagtukar sang mga trumpeta sa atubangan sang Kaban sang Kasugtanan.

25Gani si Haring David, ang mga pangulo sang Israel, kag ang mga pangulo sang mga hangaway nagkadto sa balay ni Obed-edom sa pagkuha sang Kaban sang Kasugtanan nga may daku nga pagkinasadya.

26Naghalad sila sing pito ka toro nga mga baka kag pito ka mga karnero, tungod kay ang Dios nagbulig sa mga Levita nga nagadala sang Kaban sang Kasugtanan.

27Si David nagasuksok sang malaba nga bayu nga lino nga malahalon, kag amo man ang mga musikero, si Kenanias nga ila pangulo, kag ang mga Levita nga nagdala sang Kaban sang Kasugtanan. Si David nagasuksok man sang bestidora nga lino.

28Gani, ang tanan nga mga Israelinhon nagdala sang Kaban sang Kasugtanan pakadto sa Jerusalem nga may paghinugyaw, tunog sang mga trumpeta, mga budyong, mga platilyos kag tinukar sang mga arpa.

29Samtang ginadala ang Kaban sang Kasugtanan pasulod sa siudad, si Mikal, ang anak nga babayi ni Saul, naggawa sa bintana kag nakita niya si Haring David nga nagasaot kag nagatumbotumbo sa kalipay, kag nainit gid sia sa iya.

← Chapter 14 Jump to: Chapter 16 →