1 Chronicles 19

Ilonggo (Maayong Balita nga Biblia (2012))

← Chapter 18 Jump to: Chapter 20 →

1Sang ulihi si Nahas nga hari sang Amon napatay kag ang iya anak nga si Hanun amo ang nanginhari.

2Si David nagsiling, “Dapat gid ako magpakita sing kaayo kay Hanun subong sang ginhimo sang iya amay nga si Nahas sa akon.” Gani si David nagpadala sing mga mensahero sa pagpabutyag sang iya pagbuylog sa iya kasubo. Sang pag-abot nila sa duta sang Amon sa pagpakigkita kay Haring Hanun,

3ang mga pangulo sang mga Amonhon nagsiling sa hari, “Indi ka maghunahuna nga si David nagpadala sini nga mga tawo sa pagpasidungog sa imo amay kag sa pagbuylog sa imo kasubo. Ginpadala niya sila subong mga espiya sa pag-usisa sang duta, agod ila ini maagaw!”

4Ginpadakop ni Hanun ang mga mensahero ni David, ginbarbasan ang ila mga bungot, gin-utod ang ila mga bayu tubtob sa balikawang, kag ginpalakat sila.

5Nahuya gid sila magbalik pauli. Sang pagkabati ni David sang nahanabo, gintugonan niya sila sa pagpabilin sa Jerico kag indi magbalik tubtob maglaba liwat ang ila mga bungot.

6Natalupangdan ni Haring Hanun kag sang mga Amonhon nga tungod sang ila ginhimo nanginkaaway nila si David, gani nagbayad sila sing mga kwarenta ka tonelada nga pilak agod isuhol sa mga karwahi kag sa mga hangaway halin sa Naibabaw nga bahin sang Mesopotamia, kag halin sa Maaca kag Soba nga sakop sang Siria.

7Ang 32,000 ka mga karwahi nga ila ginsuholan kag ang mga hangaway sang hari sang Maaca nag-abot kag naghimo sing kampo malapit sa Medeba. Ang mga Amonhon naggwa man sa ila mga siudad kag naghanda sa pagpakig-away.

8Sang pagkahibalo ni David sang nagakahanabo, ginpadala niya si Joab kag ang bug-os nga hangaway.

9Ang mga Amonhon naggwa kag nagpahamtang sang ila mga hangaway sa alagyan pakadto sa Raba, nga amo ang kapital nga siudad, kag ang mga hari nga nag-abot sa pagbulig nagpahamtang sang ila mga hangaway sa latagon.

10Nakita ni Joab nga ang mga kaaway magasalakay sa ila sa atubangan kag sa likod, gani ginpili niya ang labing maayo nga mga soldado sang Israel kag ginpaatubang sila sa mga Sirianhon.

11Gintugyan niya ang iban sang iya mga hangaway sa pagmando sang iya utod nga si Abisai, nga nagpahamtang sa ila sa pag-atubang sa mga Amonhon.

12Ginsingganan sia ni Joab, “Kon makita ninyo nga ginalutos ako sang mga Sirianhon, magpalapit kamo kag buligi ako, kag kon ginalutos kamo sang mga Amonhon, makadto ako sa pagbulig sa inyo.

13Magpakabakod kag magpakaisog kamo! Magpakig-away kita sing tudotudo para sa aton mga tawo kag para sa mga siudad sang aton Dios. Kag kabay nga matuman ang kabubot-on sang Ginoo.”

14Si Joab kag ang iya mga tinawo nagsalakay, kag ang mga Sirianhon nagpalalagyo.

15Sang makita sang mga Amonhon nga nagpalagyo ang mga Sirianhon, nagpalalagyo man sila gikan kay Abisai kag nag-isol pakadto sa siudad. Dayon si Joab nagbalik sa Jerusalem.

16Natalupangdan sang mga Sirianhon nga nalutos sila sang mga Israelinhon, gani nagdala sila sing mga hangaway halin sa mga probinsya sang Siria sa nasidlangan sang Suba sang Eufrates kag gintugyan sila sa pagmando ni Sofac, ang pangulo sang mga hangaway ni Haring Hadadezer sang Soba.

17Sang pagkahibalo sini ni David, gintipon niya ang mga hangaway sang Israel, nagtabok sila sa Suba sang Jordan, kag ginpahamtang niya sila sa pag-atubang sa mga Sirianhon. Nagsugod ang inaway,

18kag ginpanglagas sang mga Israelinhon ang mga hangaway sang Siria. Ginpamatay ni David kag sang iya mga hangaway ang 7,000 ka mga Siriahanon nga mga soldado nga nagasakay sa karwahi, kag 40,000 ka mga soldado nga nagalakat lang. Ila man ginpatay si Sofac, ang pangulo sang mga hangaway sang Siria.

19Sang matalupangdan sang mga hari nga sakop ni Hadadezer nga nalutos sila sang Israel, nagpakighidait sila kay David kag nagpaidalom sila sa iya paggahom.

20Sugod sadto indi na gid magbulig ang mga Sirianhon sa mga Amonhon.

← Chapter 18 Jump to: Chapter 20 →