1 Chronicles 21

Ilonggo (Maayong Balita nga Biblia (2012))

← Chapter 20 Jump to: Chapter 22 →

1Luyag ni Satanas gamuhon ang mga tawo sang Israel, gani ginsudyot niya si David sa pag-isip sang mga tawo.

2Ginmanduan ni David si Joab kag ang iban nga mga pangulo, “Libuta ninyo ang bug-os nga Israel, halin sa Beerseba pakadto sa Dan kag isipa ang mga tawo. Luyag ko mahibaluan ang ila kadamuon.”

3Si Joab nagsabat, “Kabay nga padamuon sang Ginoo ang mga tawo sang Israel sing 100 ka pilo sang sa ila kadamuon karon! Mahal nga hari, sila tanan imo mga alagad. Ngaa nga himuon mo ini nga butang kag dalahigon mo ang bug-os nga pungsod sa pagpakasala?”

4Pero ginpatuman gid sang hari ini nga mando kay Joab. Naglakat si Joab, ginlibot niya ang bug-os nga pungsod sang Israel, kag dayon nagbalik sia sa Jerusalem.

5Ginsugid niya sa kay Haring David ang bug-os nga kadamuon sang mga tawo nga sarang makaentra sa pagkasoldado: 1,100,000 sa Israel, kag 470,000 sa Juda.

6Tungod kay wala maluyagi ni Joab ang mando sang hari, wala niya pag-isipa ang mga tribo ni Levi kag ni Benjamin.

7Ang Dios wala maluyag nga gin-isip ang mga tawo, gani ginsilutan niya ang Israel.

8Si David nagsiling sa Dios, “Daku gid ang akon pagpakasala tungod sang akon nahimo! Kon mahimo patawara ako, kay binuang ang akon ginhimo.”

9Dayon ginsingganan sang Ginoo si Gad, ang propeta ni David,

10“Lakat kag singgana si David nga papilion ko sia sining tatlo ka butang. Himuon ko ang bisan ano nga iya pilion.”

11Ginkadtuan ni Gad si David kag ginsugiran sang ginsiling sang Ginoo, kag ginpamangkot sia, “Diin ang imo pilion sa sining tatlo ka butang?

12Tatlo ka tuig nga gutom, ukon tatlo ka bulan nga pagpalagyo sa imo mga kaaway, ukon tatlo ka adlaw nga pagsalakay sang Ginoo sa inyo paagi sa iya espada kag magapadala sia sing pamalatian sa inyo duta, nga nagagamit sang iya anghel sa pagpamatay sa bug-os nga Israel? Ano ang imo sabat nga akon isugid sa Ginoo?”

13Si David nagsabat sa kay Gad, “Nabutang ako sa ital-ital! Pero indi ako gusto nga silutan ako sang mga tawo. Ang Ginoo mismo amo ang magsilot sa akon, tungod kay maluloy-on sia.”

14Gani ang Ginoo nagpadala sing pamalatian sa mga tawo sang Israel, kag 70,000 sa ila ang nagkalamatay.

15Dayon ang Dios nagpadala sing anghel sa paglaglag sang Jerusalem, pero nagbaylo ang iya hunahuna kag ginsingganan niya ang anghel, “Untati na! Husto na ina!” Ang anghel nagatindog sa tupad sang linasan ni Arauna nga isa ka Jebusnon.

16Nakita ni David ang anghel nga nagatindog sa hangin, nga nagauyat sang iya espada, nga handa sa paglaglag sang Jerusalem. Dayon si David kag ang mga pangulo sang mga tawo—sila tanan nga nagabayo sing sako—naghapa sa duta.

17Nagpangamuyo si David, “O Dios, ako ang nakasala. Ako ang nagmando sa pag-isip sang mga tawo. Ano ang nahimo sining makaluluoy nga mga tawo? O Ginoo nga akon Dios, ako kag ang akon panimalay amo ang siluti, kag indi ang imo mga tawo.”

18Ang anghel sang Ginoo nagsugo sa kay Gad sa pagmando kay David sa paglakat kag sa pagpatindog sang isa ka altar para sa Ginoo sa may linasan ni Arauna.

19Gintuman ni David ang mando sang Ginoo, kag naglakat sia suno sa ginsiling sa iya ni Gad.

20Si Arauna kag ang iya apat ka mga anak nagalinas sang trigo. Sang makita nila ang anghel, ang iya mga anak nagpalagyo kag nagpanago.

21Sang pagkakita ni Arauna nga nagapalapit si Haring David, naghalin sia sa linasan kag naghapa sa duta.

22Si David nagsiling sa iya, “Ibaligya sa akon ang lugar sa diin yara ang imo linasan, agod patindugan ko sing altar para sa Ginoo, sa pagpauntat sang pamalatian. Bayaran ko ikaw sang bug-os nga bili sini.”

23Si Arauna nagsiling, “Mahal nga hari, imo na lang ina, kag himua ang luyag mo. Yari ang mga baka nga imo ihalad subong mga halad nga sinunog sa altar, kag yari ang mga gamit sang linasan nga imo gamiton subong mga gatong, kag trigo nga imo idulot. Ginahatag ko ini tanan sa imo.”

24Pero ang hari nagsabat, “Indi mahimo, bayaran ko ikaw sang iya bug-os nga bili. Indi ako maghatag subong isa ka dulot sa Ginoo sang bisan ano nga imo kag sang butang nga wala ko mabayari.”

25Kag ginbayaran niya si Arauna sing 600 ka bilog nga bulawan para sa lugar sa diin yara ang linasan.

26Nagpatindog sia didto sing altar para sa Ginoo kag nagdulot sing mga halad nga sinunog kag mga halad sa paghiambit. Nagpangamuyo sia kag ang Ginoo nagsabat sa iya paagi sa pagpadala sing kalayo halin sa langit sa pagsunog sang mga halad sa altar.

27Ang Ginoo nagsugo sa anghel sa pagtagob sang iya espada, kag nagtuman ang anghel.

28Nakita ni David nga paagi sini, ang Ginoo nagsabat sang iya pangamuyo, gani nagdulot sia sing mga halad sa altar sa lugar sa diin yara ang linasan ni Arauna.

29Ang Tolda sang presensya sang Ginoo nga ginhimo ni Moises sa desierto, kag ang altar sa diin ang mga halad ginsunog yara pa sadto nga tion sa lugar nga ginasimbahan sa Gabaon.

30Pero si David wala makakadto didto sa pagsimba sa Dios, tungod kay hinadlukan sia sang espada sang anghel sang Ginoo.

← Chapter 20 Jump to: Chapter 22 →