1 Chronicles 20

Ilonggo (Maayong Balita nga Biblia (2012))

← Chapter 19 Jump to: Chapter 21 →

1Sang madason nga tuig, sa panahon nga ang mga hari nagakadto sa inaway, ginpangulohan ni Joab ang mga hangaway kag gingubat ang duta sang Amon. Ginkibon nila ang siudad sang Raba, pero si David nagpabilin sa Jerusalem. Ginsalakay ni Joab ang Raba kag ginlaglag ini.

2Ang diosdios sang mga Amonhon nga si Milcom may korona nga bulawan nga nagabug-at sing setentay singko ka libra. May tampok ini nga isa ka malahalon nga bato, nga ginkuha ni David kag ginbutang sa iya korona. Ginkuha man niya ang madamo nga mga pagkabutang nga inagaw sa siudad.

3Gindala niya ang mga tawo sang siudad kag ginpaobra sila nga nagagamit sing mga lagari, mga sadol, kag mga wasay. Amo man ini ang iya ginhimo sa mga tawo sa tanan nga mga banwa sang Amon. Dayon sia kag ang iya mga tinawo nagbalik sa Jerusalem.

4Sang ulihi, nagsugod liwat ang inaway batok sa mga Filistinhon sa Gezer. Natabo ini sang pagpatay ni Sibecai nga taga-Husa sang isa ka higante nga si Sipai, kag nalutos ang mga Filistinhon.

5May isa pa gid ka inaway batok sa mga Filistinhon, kag si Elhanan nga anak ni Jair nagpatay kay Lami, utod ni Goliat nga taga-Gat, nga ang kadakuon sang iya bangkaw pareho sang balayan sang tiral sang manughabol.

6May isa pa gid ka inaway sa Gat, sa diin may isa ka higante nga may anom ka mga tudlo sa tagsa ka kamot kag anom ka mga tudlo sa tagsa ka tiil. Kaliwat sia sang mga higante sang una.

7Sang ginhangkat niya ang mga Israelinhon, ginpatay sia ni Jonatan, anak sang utod ni David nga si Sama.

8Ining tatlo nga ginpamatay ni David kag sang iya mga tinawo, mga kaliwat sang mga higante sa Gat.

← Chapter 19 Jump to: Chapter 21 →