1 Chronicles 26

Ilonggo (Maayong Balita nga Biblia (2012))

← Chapter 25 Jump to: Chapter 27 →

1Amo ini ang mga bulohaton nga ginhatag sa mga Levita nga nag-alagad subong mga gwardya sang Templo. Halin sa kabarangayan ni Core, si Meselemias nga anak ni Core, halin sa panimalay ni Asaf.

2May pito sia ka mga anak halin sa kamagulangan nga amo sanday Zacarias, Jediael, Zebadias, Jatniel,

3Elam, Jehohanan, kag Elioenai.

4Yara man si Obed-edom, nga ginbendisyunan sang Dios sing walo ka mga anak nga napasunod halin sa kamagulangan nga amo sanday Semaya, Jozabad, Joa, Sacar, Netanael,

5Amiel, Isacar, kag Peulletai.

6Ang kamagulangan nga anak ni Obed-edom nga si Semaya, may mga anak nga mga pangulo sa ila kabarangayan tungod sang ila daku nga kinaadman.

7Sila amo sanday Otni, Rafael, Obed, Elzabad, Eliu, kag Samaquias. Ang duha nga naulihi amo ang may labing daku nga kinaadman.

8Gikan sa panimalay ni Obed-edom may sesentay dos ka labing sampaton nga mga tawo para sa sini nga bulohaton.

9Gikan sa panimalay ni Meselemias may desi-otso ka sampaton nga mga tawo.

10Gikan sa panimalay ni Merari yara si Hosa, nga may apat ka mga anak nga amo sanday Simri (ang iya amay naghimo sa iya nga pangulo, bisan indi sia amo ang kamagulangan nga anak),

11Helkias, Tebalias, kag Zacarias. May trese tanan ka mga katapo sang panimalay ni Hosa nga mga gwardya sang Templo.

12Ang mga gwardya sang Templo ginpartida sa mga grupo, suno sa mga panimalay, kag ginhatagan sila sing mga katungdanan sa Templo pareho sang iban nga mga Levita.

13Ang tagsa ka panimalay, wala sapayan sang ila kadakuon, nagpagabutgabot sa paghibalo kon diin nga pwerta ang ila pagabantayan.

14Ang nagabutan ni Selemias amo ang nasidlangan nga pwerta, kag ang iya anak nga si Zacarias, isa ka maalam nga manuglaygay, amo ang nakagabot sang naaminhan nga pwerta.

15Si Obed-edom gintugyanan sa pagbantay sang nabagatnan nga pwerta, kag ang iya mga anak gintugyanan sa pagbantay sang mga bodega.

16Si Supim kag si Hosa gintugyanan sang nakatundan nga pwerta kag sang Pwerta sang Sallequet, sa kalsada nga nagapaibabaw. Ang pagbantay suno sa ginhatag nga oras kag bulosbulos.

17Sa sidlangan may anom ka mga gwardya sa tagsa ka adlaw, sa aminhan, apat, kag sa bagatnan, apat. May apat ka mga gwardya nga ginbutang sa mga bodega adlaw-adlaw: duha sa tagsa ka bodega.

18Malapit sa daku nga balay sa nakatundan, may apat ka mga gwardya sa alagyan kag duha sa balay mismo.

19Amo ini ang katungdanan sang mga panimalay ni Core kag ni Merari sa pagbantay.

20Ang iban sang ila kapareho nga mga Levita gintugyanan sang mga talaguan sang manggad sang Templo kag sang talaguan sang mga dulot nga nahalad sa Dios.

21Si Ladan, isa sang mga anak ni Gerson, amo ang ginhalinan sang pila ka grupo sang mga panimalay, lakip ang panimalay sang iya anak nga si Jehiel.

22Ang duha pa gid ka mga anak ni Ladan nga amo sanday Zetam kag Joel, amo ang gintugyanan sang manggad sang Templo kag sang mga talaguan sang mga dulot.

23May mga bulohaton man nga gintugyan sa mga kaliwat nanday Amram, Izar, Hebron, kag Uziel.

24Si Sebuel, gikan sa kabarangayan ni Gersom nga anak ni Moises, amo ang pangulo nga opisyal nga gintugyanan sang talaguan sang manggad sang Templo.

25Paagi sa utod ni Gersom nga si Eliezer, may kaangtanan sia kay Selomot. Si Eliezer amo ang amay ni Rehabias, si Rehabias amay ni Jeseya, si Jeseya amay ni Joram, si Joram amay ni Sicri, si Sicri amay ni Selomot.

26Si Selomot kag ang mga katapo sang iya panimalay amo ang gintugyanan sang tanan nga dulot nga ginhalad sa Dios ni Haring David, sang mga pangulo sang mga panimalay, sang mga pangulo sang mga kabarangayan, kag sang mga opisyales sang mga hangaway.

27Ginkuha nila ang iban nga ila naagaw sa inaway kag ginhalad nila ini para gamiton sa Templo.

28Si Selomot kag ang iya panimalay amo ang gintugyanan sang tagsa ka butang nga ginhalad agod gamiton sa Templo, lakip ang mga dulot nga gindala ni Samuel nga propeta, ni Haring Saul, ni Abner nga anak ni Ner, kag ni Joab nga ang iya iloy amo si Seruya.

29Sa mga kaliwat ni Izar, si Kenanias kag ang iya mga anak nga lalaki amo ang gintugyanan sang mga bulohaton sa pagdumala nga amo ang masunod: pagtago sang mga papeles kag sa paghukom sang mga kaawayon sang mga tawo sang Israel.

30Sa mga kaliwat ni Hebron, si Hasabias kag ang iya 1,700 ka mga pariente nga mga isganan nga mga lalaki, amo ang gintugyanan sang tanan nga mga bulohaton nahanungod sa Dios kag sa gubyerno sa Israel sa nakatundan sang Suba sang Jordan.

31Si Jerias amo ang pangulo sang mga kaliwat ni Hebron. Sa ika-40 nga tuig sang paghari ni David, may pag-usisa nga ginhimo nahanungod sang mga kaliwat sang panimalay ni Hebron, kag nasapwan nga ang mga isganan nga mga soldado nga katapo sini nga panimalay nagaestar sa Jazer sa kadutaan sang Galaad.

32Si Haring David nagpili sing 2,700 ka isganan nga mga pangulo sang mga panimalay gikan sa mga pariente ni Jerias kag gintugyan sa ila ang pagdumala sang tanan nga mga bulohaton nahanungod sa Dios kag sa gubyerno sa Israel sa nasidlangan nga bahin sang Suba sang Jordan sa kadutaan nanday Ruben, Gad, kag ni Manases sa Sidlangan.

← Chapter 25 Jump to: Chapter 27 →