1 Chronicles 28

Ilonggo (Maayong Balita nga Biblia (2012))

← Chapter 27 Jump to: Chapter 29 →

1Ginmanduan ni Haring David ang tanan nga mga opisyales sang Israel sa pagtipon sa Jerusalem. Gani ang tanan nga mga opisyales sang mga tribo, ang tanan nga mga opisyales nga nagadumala sang mga bulohaton sang ginharian, ang mga pangulo sang mga kabarangayan, ang mga nagadumala sang mga pagkabutang kag mga kasapatan sang hari kag sang iya mga anak nga lalaki, ang tanan nga mga opisyales sa palasyo, ang mga pangulo sang mga hangaway, kag ang mga isganan nga mga tawo nagtipon sa Jerusalem.

2Si Haring David nagtindog sa atubang nila kag naghambal sa ila: “Mga kasimanwa ko, pamatii ninyo ako. Luyag ako magpatindog sing balay nga permanente para sa Kaban sang Kasugtanan, ang trono sang Ginoo nga aton Dios. Nakahanda na ako sa pagpatindog sang isa ka templo sa pagpasidungog sa Dios,

3pero wala sia magtugot sa akon, tungod kay ako isa ka soldado kag madamo nga dugo ang akon ginpaagay.

4Ang Ginoo, ang Dios sang Israel, nagpili sa akon kag sang akon mga kaliwat sa paggahom sa Israel sa walay katapusan. Ginpili niya ang tribo ni Juda nga pagagikanan sang pangulo, kag gikan sa tribo ni Juda ginpili niya ang panimalay sang akon amay. Gikan sa sinang panimalay ginkalipay niya ang pagpili sa akon nga manginhari sa bug-os nga Israel.

5Ginhatagan niya ako sing madamo nga mga anak nga lalaki, kag gikan sa ila tanan ginpili niya si Solomon sa paggahom sa Israel, ang ginharian sang Ginoo.

6“Ang Ginoo nagsiling sa akon, ‘Ang imo anak nga si Solomon amo ang magapatindog sang akon Templo. Ginpili ko sia nga mangin-akon anak, kag ako mangin-iya amay.

7Himuon ko ang iya ginharian nga wala sing katapusan, kon padayunon niya ang pagtuman sang akon tanan nga mga kasugoan kag mga mando subong sang iya ginahimo karon.’

8“Gani karon, mga tawo ko, sa presensya sang aton Dios kag sining katilingban sang bug-os nga Israel, ang mga tawo sang Ginoo, ginalaygayan ko kamo sa pagtuman sang tanan nga ginasugo sang Ginoo nga aton Dios sa aton, agod magapadayon kamo sa pagpanag-iya sining maayo nga duta, kag inyo mabilin ini nga panublion sa masunod nga mga kaliwatan sa walay katubtoban.

9“Kag ikaw, Solomon nga anak ko, ginalaygayan ko ikaw sa pagkilala sang Dios sang imo amay kag sa pag-alagad sa iya sa bug-os mo nga tagipusoon kag may handa nga hunahuna. Nahibaluan niya ang tanan naton nga mga panghunahuna kag mga handom. Kon magdangop ka sa iya, sia magabaton sa imo; pero kon ikaw magbiya sa iya, sia magabiya sa imo sa walay katapusan.

10Dapat mo kilalahon nga ang Ginoo nagpili sa imo sa pagpatindog sang iya balaan nga Templo. Karon himua ini, kag magpakaisog ka.”

11Ginhatag ni David kay Solomon ang mga plano sang tanan nga bahin sang Templo, sang mga kwarto nga talaguan, kag sang iban pa nga mga kwarto, kag sang Labing Balaan nga Duog, sa diin ang mga sala ginapatawad.

12Ginhatag man niya kay Solomon ang mga plano sang tanan nga iya ginapanghunahuna para sa mga pasiyuhan kag mga kwarto sa palibot sini, kag para sa mga kwarto nga talaguan sang mga galamiton sa Templo kag sang mga dulot nga ginhalad sa Ginoo.

13Ginhatag man ni David sa iya ang mga plano sa pagrupo sang mga pari kag mga Levita sa paghimo sang ila mga katungdanan, sa paghimo sang ila bulohaton sa Templo, kag sa pagtatap sang tanan nga mga galamiton sa Templo.

14Nagsiling sia kon daw ano kadamo nga pilak kag bulawan ang gamiton sa paghimo sang mga gamit,

15para sa tagsa ka suga kag kandelirohan,

16para sa mga lamisa nga pilak, kag para sa tagsa ka lamisa nga bulawan nga ginabutangan sang mga tinapay nga ginhalad sa Dios.

17Nagsiling man sia kon daw ano kadamo nga puraw nga bulawan ang gamiton sa paghimo sing mga tinidor, mga yahong, kag mga pitsil, daw ano kadamo nga pilak kag bulawan ang gamiton sa paghimo sing mga pinggan,

18kag daw ano kadamo nga puraw nga bulawan ang gamiton sa paghimo sang altar nga ginasunogan sang insyenso, kag sang karwahi para sa mga kerubin nga nagahumlad sang ila mga pakpak sa ibabaw sang Kaban sang Kasugtanan sang Ginoo.

19Si Haring David nagsiling, “Ini tanan yara sa plano nga ginsulat suno sa sugo sang Ginoo nga iya ginhatag sa akon nga himuon.”

20Si Haring David nagsiling kay Solomon nga iya anak, “Magpakabakod kag magpakaisog. Sugori ang pagpaobra kag indi mag-untat bisan ano ang matabo. Ang Ginoo nga Dios nga akon ginaalagad, magaupod sa imo. Indi sia magbiya sa imo, kundi magaupod sia sa imo tubtob matapos mo ang pagpaobra sang Templo.

21Ang mga pari kag ang mga Levita ginhatagan sing mga katungdanan nga ila himuon sa Templo. Ang sampaton nga mga tawo sa bisan ano nga bulohaton handa sa pagbulig sa imo, kag ang tanan nga mga tawo kag ang ila mga pangulo yara sa idalom sang imo pagmando.”

← Chapter 27 Jump to: Chapter 29 →