1 Chronicles 22

Ilonggo (Maayong Balita nga Biblia (2012))

← Chapter 21 Jump to: Chapter 23 →

1Gani si David nagsiling, “Amo ini ang lugar nga patindugan sang Templo sang Ginoo nga Dios. Amo ini ang altar sa diin ang mga tawo sang Israel magadulot sang mga halad nga sinunog.”

2Nagmando si Haring David nga magtipon ang tanan nga mga dumoluong nga nagaestar sa Israel, kag ginpaobra niya sila. Ang iban sa ila nagbasbas sing mga bato nga gamiton sa pagpatindog sang Templo.

3Ginhatagan niya sila sing madamo nga mga salsalon nga himuon nga mga lansang kag mga bisagra para sa mga sira sang mga pwerta nga kahoy, kag madamo nga bronsi nga indi na sarang matimbang.

4Ginpadala niya sing madamo nga mga kahoy nga sedro ang mga tawo sang Tiro kag Sidon.

5Si David nagsiling sa iya kaugalingon, “Kinahanglan nga ang Templo nga pagapatindugon sang akon anak nga si Solomon manginmatahom kag manginbantog sa bug-os nga kalibutan. Pero bata pa sia kag payaon, gani kinahanglan mag-aman ako para sa sini.” Gani si David nag-aman sing madamo nga mga gamit sa wala pa sia mapatay.

6Ginpatawag niya ang iya anak nga si Solomon kag ginmanduan sa pagpatindog sing isa ka templo para sa Ginoo, ang Dios sang Israel.

7Ginsingganan sia ni David, “Noy, luyag ako magpatindog sing isa ka templo sa pagpasidungog sa Ginoo nga akon Dios.

8Pero ginsingganan ako sang Ginoo nga madamo nga mga tawo ang akon napamatay kag madamo nga mga inaway ang akon inagihan. Indi niya ako pagtugotan sa pagpatindog sing templo para sa iya, tungod sang madamo nga dugo nga akon ginpaagay.

9Pero nagsaad sia sa akon nga nagasiling, ‘May anak ikaw nga magahari nga may kalinong, tungod kay hatagan ko sia sing kalinong gikan sa tanan niya nga mga kaaway. Ang iya ngalan amo si Solomon, tungod kay sa panahon sang iya paghari, hatagan ko ang Israel sing kalinong kag kahilwayan sa katalagman.

10Magapatindog sia sing templo para sa akon. Mangin-anak ko sia kag ako mangin-iya amay. Ang iya ginharian magagahom sa Israel sa walay katubtoban.’”

11Nagpadayon si David sa pagsiling, “Karon, kabay ang Ginoo nga imo Dios magaupod sa imo, kag magtuman sang iya saad sa imo agod magamadinalag-on ka sa pagpatindog sang isa ka templo para sa iya.

12Kabay nga ang Ginoo nga imo Dios maghatag sa imo sing paghangop kag kaalam, agod nga ang imo paggahom sa Israel manginsuno sa iya Kasugoan.

13Kon tumanon mo ang tanan nga mga kasugoan nga ginhatag sang Ginoo kay Moises para sa Israel, magamadinalag-on ka. Magpakabakod ka kag magpakaisog, kag indi ka magkahadlok sa bisan ano nga butang.

14Bisan sa akon mga pagtinguha, nakatipon ako sing mga 4,000 ka tonelada nga bulawan kag malapit sa 40,000 ka tonelada nga pilak para sa pagpatindog sang Templo sang Ginoo. Wala labot sini, madamo kaayo nga bronsi kag salsalon. May nahanda man ako nga mga kahoy kag mga bato, pero kinahanglan dugangan mo ini.

15May madamo ikaw nga manug-obra. May mga manugbasbas sang bato, may mga kantero kag mga panday, subong nga may madamo nga mga tawo nga may abilidad sa paghimo sang bisan ano nga obra

16sa bulawan, pilak, bronsi, kag salsalon. Karon sugori ang pagpaobra, kag kabay nga ang Ginoo magaupod sa imo.”

17Ginmanduan ni David ang tanan nga mga pangulo sang Israel sa pagbulig kay Solomon.

18Nagsiling sia, “Ang Ginoo nga imo Dios nagaupod sa imo kag naghatag sa imo sing kalinong sa bug-os mo nga palibot. Ginpalutos niya sa akon ang tanan nga mga tawo nga nag-estar anay sa sini nga duta, kag karon yara na sila sa idalom sang imo paggahom kag sang Ginoo.

19Karon alagad ka sa Ginoo nga imo Dios sa bug-os mo nga tagipusoon kag kalag. Sugori ang pagpatindog sang Templo agod mabutang mo sa sini ang Kaban sang Kasugtanan sang Ginoo kag ang tanan nga balaan nga mga butang nga ginagamit sa pagsimba sa iya.”

← Chapter 21 Jump to: Chapter 23 →