1 Kings 10

Ilonggo (Maayong Balita nga Biblia (2012))

← Chapter 9 Jump to: Chapter 11 →

1Karon ang rayna sang Seba nakabati sang kabantugan ni Solomon, gani nagkadto sia sa Jerusalem sa pagtilaw sa iya sang mabudlay nga mga pamangkot.

2Nag-abot sia nga ginaupdan sang madamo nga mga suloguon, kag may mga kamelyo sia nga kargado sang mga pahamot, mga alahas kag madamo nga mga bulawan. Sang pagkitaay nila ginpamangkot niya si Solomon sang tanan lang nga mga pamangkot nga iya madumdoman.

3Ginsabat ni Solomon ang tanan niya nga mga pamangkot kag wala sing bisan ano nga butang nga indi niya masaysay sa iya.

4Ang rayna sang Seba nakabati sang kaalam ni Solomon, kag nakita niya ang palasyo nga iya ginpatindog,

5ang pagkaon nga iya ginbutang sa lamisa, ang mga opisyales sa iya korte, ang pagdumala kag matahom nga panapton sang iya mga alagad, ang iya manugtagay sang bino kag ang mga halad nga iya gindulot sa Templo. Ang katahom sini tanan nagpahalawhaw sa iya.

6Nagsiling sia kay Haring Solomon, “Matuod gid ang nabatian ko sa akon pungsod nahanungod sa imo kag sa imo kaalam.

7Pero indi ako makapati sini tubtob nag-abot ako kag nakita ko gid ini tanan. Pero wala gani sing katunga ang akon nabatian. Ang imo kaalam kag manggad labaw katama sang sa ginsugid sa akon.

8Daw ano ka malipayon sang imo mga asawa! Kag daw ano ka malipayon sang imo mga opisyales nga yara pirme sa imo atubang kag nagapamati sang imo mga ginahambal nga may kaalam!

9Dayawon ang Ginoo nga imo Dios! Ginpakita niya nga nahamuot gid sia sa imo sa iya paghimo sa imo nga hari sang Israel. Tungod kay ang iya gugma sa Israel mapinadayunon, ginhimo niya ikaw nga hari, agod sa paggahom sing matarong kag wala sing pinasulabi.”

10Dayon ang rayna sang Seba naghatag kay Haring Solomon sing malapit sa lima ka tonelada nga bulawan, kag madamo gid nga pahamot kag mga alahas. Ang kadamuon sang pahamot nga ginhatag sang rayna sa iya amo ang labing madamo nga iya nabaton halin sang una.

11Dugang pa sini tanan, ang mga sakayan ni Hiram nga nagdala sing bulawan halin sa Ofir, nagdala man halin didto sang madamo nga kahoy nga sandalo kag mga alahas.

12Si Solomon naggamit sini nga kahoy sa paghimo sing mga hambuyan sa Templo kag sa palasyo, kag sa paghimo man sing mga arpa kag mga salterio para sa mga musikero. Ang pinakamaayo nga mga sandalo nga kahoy amo ang gindala sa Israel. Wala na gid sing kaangay sini nga kahoy nga makita liwat tubtob sini nga adlaw.

13Si Haring Solomon naghatag sa rayna sang Seba sang tanan nga ginpangayo niya, wala labot sang kinaandan nga mga regalo nga ginhatag niya sing bugana sa iya. Dayon nagpauli sia upod sa iya mga opisyales sa duta sang Seba.

14Kada tuig si Haring Solomon nagbaton sing sobra sa baynte singko ka tonelada nga bulawan.

15Wala labot ini sang iya ginbaton nga mga buhis halin sa mga negosyante, sa mga ganansya sa negosyo, kag sang buhis nga ginbayad sang mga hari sang Arabia kag sang mga gobernador sa mga distrito sang Israel.

16Si Solomon naghimo sing 200 ka dalagku nga mga taming kag ang tagsa ka taming ginpahaklapan niya sing malapit sa kinse ka libra nga bulawan.

17Naghimo man sia sing 300 ka magamay nga mga taming, kag ang tagsa ka taming ginpahaklapan niya sing malapit sa apat ka libra nga bulawan. Ginpabutang niya ini tanan sa Tilipunan sang Kagulangan sang Libano.

18Nagpahimo man sia sing daku nga trono nga tiposo kag nahaklapan ini sang puraw nga bulawan.

19May anom ka mga halintang pasaka sa trono kag sa tagsa ka punta sang halintang may estatwa sang leon, gani may dose tanan ka mga leon. Sa likod sang trono may estatwa sang ulo sang baka nga toro, kag sa tupad sang tagsa ka halambuyan may estatwa sang leon. Wala gid sing ginharian nga may trono kaangay sini.

21Ang tanan nga mga ilimnan ni Solomon bulawan, kag ang tanan nga galamiton sa Tilipunan sang Kagulangan sang Libano nahimo sa puraw nga bulawan. Wala sing pilak nga gingamit, kay wala ini ginkabig nga malahalon sa tion ni Solomon.

22May madamo sia nga dalagku nga mga sakayan sa dagat nga nagabiyahe upod sa mga sakayan ni Hiram. Kada tatlo ka tuig ang iya mga bapor nagapauli nga nagadala sing bulawan, pilak, tiposo, kag dalagku kag magamay nga mga amo.

23Si Haring Solomon labing manggaranon kag labing maalam sa bisan kay sin-o nga hari,

24kag ang tanan nga mga tawo sa kalibutan luyag magkadto sa pagpamati sang kaalam nga ginhatag sang Dios sa iya.

25Ang tagsatagsa nga nagkadto sa iya nagdala sing regalo—mga butang nga nahimo sa bulawan kag pilak, mga panapton, mga hinganiban, mga pahamot, mga kabayo, kag mga mula. Kag nagpadayon ini tuigtuig.

26Si Solomon nagtipon sing mga hangaway nga may 1,400 ka mga karwahi kag 12,000 ka mga kabayo. Ang iban sini ginbutang niya sa Jerusalem kag ang iban sa nagkalainlain nga mga siudad.

27Sa panahon sang iya paggahom, ang pilak sa Jerusalem daw pareho lang ka ordinaryo sang bato, kag ang kahoy nga sedro subong ka bugana sang kahoy nga sikomoro sa mga kunsaran sang Juda.

28Ang iya mga kabayo nagikan sa Ehipto kag Cilicia. Ang iya mga tinawo nagbakal sini sa pat-od nga bili.

29Ang isa ka karwahi gikan sa Ehipto nagabili sing 600 ka bilog nga pilak, kag ang kabayo, 150 ka bilog nga pilak. Kag ang mga tinawo ni Solomon nagbaligya sini sa Hethanon kag Siriahanon nga mga hari.

← Chapter 9 Jump to: Chapter 11 →