1 Kings 17

Ilonggo (Maayong Balita nga Biblia (2012))

← Chapter 16 Jump to: Chapter 18 →

1Ang isa ka propeta nga ginhingalanan kay Elias, halin sa Tisbe sa Galaad, nagsiling kay Haring Acab, “Sa nagakabuhi ang Ginoo ang Dios sang Israel, nga akon ginaalagad, ginasingganan ko ikaw nga wala sing tun-og ukon ulan sa madason nga duha ukon tatlo ka tuig tubtob magsiling ako.”

2Dayon ang Ginoo nagsiling kay Elias,

3“Halin ka sa sini nga lugar kag magkadto pa sidlangan kag magpanago ka malapit sa Sapa sang Kerit, sa sidlangan sang Jordan.

4Ang sapa magahatag sa imo sing tubig nga ilimnon, kag ginsugo ko ang mga uwak sa pagdala sa imo sing pagkaon didto.”

5Si Elias nagtuman sang sugo sang Ginoo, kag naglakat sia kag nagtener sa tupad sang Sapa sang Kerit.

6Nag-inom sia sa sapa, kag ang mga uwak nagdala sa iya sing kan-on kag sud-an kada aga kag kada gab-i.

7Sa wala madugay, tungod nga wala sing ulan, ang sapa nagmala.

8Dayon ang Ginoo nagsiling kay Elias,

9“Karon kadto ka sa banwa sang Sarepta nga malapit sa Sidon kag didto ka mag-estar. Ginsugo ko ang isa ka babayi nga balo nga nagaestar didto sa pagpakaon sa imo.”

10Gani si Elias nagkadto sa Sarepta, kag sang pag-abot niya sa pwerta sang banwa nakita niya ang isa ka babayi nga balo nga nagapangahoy. Nagsiling sia sa babayi, “Palihog paimna ako.”

11Sang paglakat sang babayi sa pagkuha sing tubig nagsiling pa gid sia, “Kag palihog dalhi man ako sing kalan-on.”

12Nagsabat sia, “Sa ngalan sang buhi nga Ginoo nga imo Dios, nagasumpa ako nga wala ako sing kalan-on. Ang nabilin ko nga harina isa na gid lang ka hakop sa yahong kag diutay nga lana sang olivo sa tibod. Nagkadto ako diri sa pagpangahoy agod sa akon pagpauli maluto ko ang diutay nga nabilin para sa akon kag sa akon anak nga lalaki. Amo na ini ang katapusan namon nga pagkaon kag dayon mapatay kami sa gutom.”

13Si Elias nagsiling sa iya, “Indi ka magpalibog. Lakat ka kag magluto sang inyo pagkaon. Pero lutoi anay ako sing diutay nga tinapay sa imo harina kag dalha diri sa akon, kag dayon lutoa ang nabilin para sa imo kag sa imo anak.

14Kay amo ini ang ginasiling sang Ginoo, ang Dios sang Israel, ‘Ang yahong indi maubosan sing harina kag ang tibod indi maubosan sing lana tubtob sa adlaw nga ako, ang Ginoo, magapadala sing ulan.’”

15Ang balo naglakat kag ginhimo niya ang ginsiling ni Elias, kag tanan sila wala mawad-i sing pagkaon sa sulod sang madamo nga mga inadlaw.

16Subong sang ginsaad sang Ginoo paagi kay Elias, ang yahong wala maubosi sing harina kag ang tibod wala maubosi sing lana.

17Sang ulihi, ang anak sang balo nagmasakit. Naglala kag naglala ang iya balatian, kag sang ulihi nabugto ang iya ginhawa.

18Nagsiling ang balo kay Elias, “Propeta sang Dios, ngaa ginhimo mo ini sa akon? Nag-abot ka bala sa pagpahanumdom sa Dios sang akon mga sala, kag nagdala sing kamatayon sa akon anak?”

19Si Elias nagsiling, “Ihatag ang bata sa akon. Ginkuha niya ang bata sa babayi, kag gindala niya ang bata sa kwarto sa ibabaw sa diin sia nagatener kag ginbutang niya sia sa higdaan.

20Dayon nagpangamuyo sia sing mabaskog, “O Ginoo nga akon Dios, ngaa ginhimo mo ining masubo nga butang sa sini nga balo? Nagmaluloy-on sia kag nag-atipan sa akon, kag karon ginpatay mo ang iya anak!”

21Dayon ginhap-an ni Elias ang bata sing makatlo kag nagpangamuyo, “O Ginoo nga akon Dios, buhia ini nga bata!”

22Ang Ginoo nagsabat sang pangamuyo ni Elias kag ang bata nagginhawa liwat kag nabuhi.

23Ang bata gindala ni Elias sa iya iloy sa idalom kag nagsiling sa iya, “Tan-awa, ang imo bata buhi!”

24Ang balo nagsabat, “Karon nahibal-an ko nga ikaw propeta sang Dios, kag matuod nga ang Ginoo nagahambal paagi sa imo!”

← Chapter 16 Jump to: Chapter 18 →