1 Kings 21

Ilonggo (Maayong Balita nga Biblia (2012))

← Chapter 20 Jump to: Chapter 22 →

1Malapit sa palasyo ni Haring Acab sa Jezreel may isa ka talamnan sang ubas nga iya ni Nabot.

2Isa ka adlaw si Acab nagsiling kay Nabot, “Ang talamnan mo sang ubas malapit sa akon palasyo, kag luyag ko nga himuon ini nga talamnan sang utanon. Pabayluhi ini sa akon sing mas maayo pa nga talamnan sing ubas, kag kon gusto mo bayaran ko ikaw sing nagakaigo nga bili.”

3Si Nabot nagsabat, “Ginpanubli ko ini nga talamnan sang ubas sa akon mga katigulangan. Ang Ginoo indi gusto nga ihatag ko ini sa imo!”

4Si Acab nagpauli nga buringot kag naakig tungod sang ginsiling ni Nabot sa iya. Naghigda sia sa iya katre, nga nag-atubang sa dingding kag indi magkaon.

5Ang iya asawa nga si Jezebel nagkadto sa iya kag ginpamangkot sia, “Ngaa ka buringot sa imo? Ngaa indi ka magkaon?”

6Nagsabat sia, “Tungod sang ginsiling ni Nabot sa akon. Ginsingganan ko sia nga baklon ang iya talamnan sang ubas, kag kon gusto niya bayluhan ko lang, pero ginsingganan niya ako nga indi mahimo!”

7Si Jezebel nagsabat, “Indi bala ikaw ang hari? Bangon ka, magkasadya kag magkaon. Kuhaon ko para sa imo ang talamnan sang ubas ni Nabot!”

8Dayon naghimo sia sing mga sulat, ginpirmahan niya sang ngalan ni Acab, ginmarkahan niya sang marka sang hari, kag ginpadala niya ini sa mga opisyales kag mga pangulo nga pumoluyo sang Jezreel.

9Amo ini ang iya ginsulat: “Magproklamar kamo sing adlaw sang puasa, tipuna ninyo sing tingob ang mga tawo, kag pasidunggi ninyo si Nabot sa atubang sang mga tawo.

10Magkuha kamo sing duha ka mga tawo nga huroshuros nga magaatubang sa iya kag magasumbong sa iya nga ginpakamalaut niya ang Dios kag ang hari. Dayon kuhaa sia kag dalhon sa gwa sang siudad kag batuhon sia tubtob mapatay.”

11Ang mga opisyales kag mga pangulo nga pumoluyo sang Jezreel naghimo sang ginsiling ni Jezebel.

12Nagproklamar sila sing adlaw sang pagpuasa, gintipon ang mga tawo sing tingob, kag ginpasidunggan si Nabot sa atubang sang mga tawo.

13Ang duha ka huroshuros nga mga tawo nagsumbong sa iya sa atubang sang mga tawo nga ginpakamalaut niya ang Dios kag ang hari, gani gindala sia sa gwa sang siudad kag ginbato tubtob mapatay.

14Dayon ginpahibalo nila si Jezebel nga si Nabot patay na.

15Sang pagkahibalo sini ni Jezebel, nagsiling sia kay Acab, “Si Nabot patay na. Karon lakat ka kag kuhaa ang iya talamnan sing ubas nga indi niya pag-ibaligya sa imo.”

16Sa gilayon si Acab nagkadto sa talamnan sang ubas kag ginpanag-iyahan niya ini.

17Dayon ang Ginoo nagsiling kay Elias nga propeta halin sa Tisbe,

18“Kadto ka kay Haring Acab sang Samaria. Makita mo sia sa talamnan sang ubas ni Nabot nga magapanag-iya sini.

19Singgana sia nga ako, ang Ginoo, nagasiling sa iya, ‘Sa tapos mo mapatay ang tawo, karon kuhaon mo man bala ang iya pagkabutang?’ Singgana sia nga amo ini ang ginasiling ko, ‘Sa lugar nga gindilapan sang mga ido ang dugo ni Nabot dira man pagadilapan sang mga ido ang imo dugo!’”

20Sang pagkakita ni Acab kay Elias nagsiling sia, “Nakita mo bala ako, kaaway ko?” Si Elias nagsabat, “Huo, nakita ko ikaw. Wala ka sing iban nga ginhimo kundi ang malaut sa panulok sang Ginoo.

21Gani ang Ginoo nagasiling sa imo, ‘Padalhan ko ikaw sing kalalat-an. Pagasikwayon ko ikaw, kag dulaon ko ang tagsa ka lalaki sa imo panimalay, bata kag tigulang.

22Ang imo panimalay manginkaangay sang panimalay ni Haring Jeroboam nga anak ni Nebat kag ni Haring Baasa nga anak ni Ahias, tungod kay ginpaakig mo ako sang imo pagdala sa Israel sa pagpakasala.’

23Kag nahanungod kay Jezebel, ang Ginoo nagasiling nga ang mga ido magakaon sang iya lawas sa siudad sang Jezreel.

24Kag ang bisan sin-o sang imo mga pariente nga mapatay sa siudad pagakaunon sang mga ido, kag ang mapatay sa wayang pagakaunon sang mga uwak.” (

25Wala gid sing kaangay kay Acab nga naghatag sang bug-os niya nga kaugalingon sa paghimo sing kalautan sa panulok sang Ginoo —kag ini tanan sa pagsugyot sang iya asawa nga si Jezebel.

26Nakahimo sia sing labing makahuloya nga mga sala paagi sa iya pagsimba sa mga diosdios subong sang ginhimo sang mga Amornon nga gintabog sang Ginoo pa gwa sa duta samtang ang mga tawo sang Israel nagapasulod.)

27Sang pagkatapos ni Elias hambal, gingisi ni Acab ang iya mga bayu, gin-uba ini kag nagbayo sia sing sako. Indi sia magkaon, nagtulog sia nga nagabayo sing sako, kag nagluya ang iya lawas kag nagmasinulob-on.

28Ang Ginoo nagsiling sa propeta nga si Elias,

29“Nakita mo kon daw ano ang pagpaubos ni Acab sa akon atubang? Tungod sini, indi ko sia pagpadalhan sing kalaglagan samtang buhi pa sia; padalhan ko sing kalaglagan ang panimalay ni Acab sa panahon sang iya anak nga lalaki.”

← Chapter 20 Jump to: Chapter 22 →