1 Kings 4

Ilonggo (Maayong Balita nga Biblia (2012))

← Chapter 3 Jump to: Chapter 5 →

1Si Haring Solomon amo ang hari sang bug-os nga Israel,

2kag amo ini ang iya mataas nga mga opisyales: Ang pari: si Azarias nga anak ni Sadoc

3Ang mga sekretaryo sa korte: si Elioref kag si Ahias nga mga anak ni Sisa Ang manugsulat sing maragtas: si Josafat nga anak ni Ahilud

4Ang pangulo sang hangaway: si Benaya nga anak ni Joiada Ang mga pari: si Sadoc kag si Abiatar

5Ang pangulo sang mga manugdumala sang mga distrito: si Azarias nga anak ni Natan Ang palamangkutan sang hari: ang pari nga si Zabud nga anak ni Natan

6Ang manugdumala sang mga suloguon sa palasyo: Si Ahisar Ang manugdumala sang pilitaryo nga pag-obra: si Adoniram nga anak ni Abda

7Si Solomon nagpili sing dose ka mga tawo subong mga gobernador sang mga distrito sa Israel. Sila ang magahatag sing kalan-on sa hari kag sa iya panimalay halin sa ila mga distrito, kag ang tagsa ka gobernador amo ang magahatag sing kalan-on sa bilog nga bulan sa kada tuig.

8Ang masunod amo ang mga ngalan sini nga mga opisyales kag ang mga distrito nga ila ginadumalahan: si Benhur: sa kabakuloran ni Efraim

9si Bendequer: sa mga siudad sang Macaz, Saalbim, Bet-semes, Elon, kag Bet-hanan

10si Benhesed: sa mga siudad sang Arubot kag Soco, kag ang bug-os nga kadutaan sang Hefer

11si Benabinadab nga nakapangasawa sa kay Tapat nga bata ni Solomon: sa bug-os nga duta sang Dor

12si Baana nga anak ni Ahilud: sa mga siudad sang Taanak, sang Megido, kag sa tanan nga kadutaan malapit sa Bet-san, malapit sa banwa sang Saretan, sa bagatnan sang banwa sang Jezreel tubtob sa siudad sang Abel-Mehola kag sa siudad sang Jocmeam

13si Bengeber: sa siudad sang Ramot sa Galaad, kag sa mga barangay sa Galaad, nga iya sang mga panimalay ni Jair nga kaliwat ni Manases, kag sa duta sang Argob sa Basan, sesenta ka dalagku nga mga banwa tanan, nga napamakuran sing mga pader kag bronsi nga mga pintal sa mga pwerta,

14si Ahinadab nga anak ni Iddo: sa distrito sang Mahanaim

15si Ahimaaz nga nagpangasawa kay Basemat nga bata ni Solomon: sa kadutaan ni Neftali

16si Baana nga anak ni Husai: sa duta ni Aser kag ang banwa ni Bealot

17si Josafat nga anak ni Parua: sa kadutaan ni Isacar

18si Simei nga anak ni Ela: sa kadutaan ni Benjamin

19Si Geber nga anak ni Uri: sa duta sang Galaad nga gingamhan ni Sihon nga hari sang mga Amornon kag ni Og nga hari sang Basan Wala labot sining dose, may isa ka gobernador sa bug-os nga duta sang Juda.

20Ang mga tawo sang Juda kag sang Israel pareho kadamo sang balas sa baybayon; nagkaon sila kag nag-inom kag malipayon.

21Ang ginharian ni Solomon nagsakop sang tanan nga mga pungsod halin sa Suba sang Eufrates tubtob sa kadutaan ang mga Filistinhon sa dulonan sang Ehipto. Nagbayad sila sa iya sing buhis kag gingamhan niya sila sa bug-os sang iya pagkabuhi.

22Ang kalan-on nga kinahanglanon ni Solomon kada adlaw setentay singko ka sako nga pinili nga harina kag 150 ka sako nga ginaling nga trigo;

23napulo ka binukot nga baka, baynte ka luyaw nga mga baka, 100 ka karnero, wala labot sang usa, gasela, mga usa nga lalaki kag mga manok.

24Si Solomon naggahom sa bug-os nga duta sa nakatundan sang Suba sang Eufrates, halin sa Tifsa sa Eufrates, tubtob sa nakatundan sa siudad sang Gaza. Ang tanan nga mga hari sa katundan sang Eufrates nasakop sa iya, kag may kalinong sia sa tanan niya nga kaingod nga mga pungsod.

25Samtang nagakabuhi pa si Solomon, ang mga tawo sa bug-os nga Juda kag Israel, halin sa Dan tubtob sa Beerseba nag-estar nga hilway kag ang tagsa ka panimalay may ila nga kaugalingon nga talamnan sing ubas kag mga katamnan sang mga olivo.

26Si Solomon may 40,000 ka mga kabayo sa iya kwadra para sa karwahi, kag 12,000 ka mga soldado nga nagasakay sa kabayo.

27Ang dose ka mga gobernador sa mga distrito may katungdanan sa paghatag sing isa ka bulan nga kunsomo para kay Haring Solomon kag sa tanan nga nagakaon sa iya palasyo. Wala gid sila magpalta sa ila paghatag.

28Ang tagsa ka gobernador nagtuman sang iya katungdanan sa paghatag man sing sebada kag kumpay sa diin ginakinahanglan ini para sa mga kabayo nga nagaguyod sang karwahi kag sa mga hayop nga ginapaobra.

29Ang Dios naghatag kay Solomon sing labaw nga kaalam kag paghangop, kag ihibalo nga indi matungkad.

30Si Solomon mas maalam pa sang sa mga mangin-alamon sang Sidlangan, ukon sa mga mangin-alamon sang Ehipto.

31Sia ang labing maalam sa tanan nga mga tawo: mas maalam pa sia kay Etan nga Ezranhon; kay Heman, kay Calcol, kag kay Dorda, ang mga anak nga lalaki ni Mahol. Ginbantog sia sa tanan nga mga pungsod sa palibot.

32Naghimo sia sing 3,000 ka mga hulobaton kag 1,005 ka mga kalantahon.

33Naghambal sia nahanungod sang mga kahoy kag mga tanom, halin sa mga sedro sang Libano tubtob sa isopo nga nagatubo sa mga dingding. Naghambal man sia nahanungod sang mga sapat, mga pispis, mga sapat nga nagasaog, kag mga isda.

34Ang mga hari sa bug-os nga kalibutan nakabati sang iya kaalam, kag nagpadala sila sing mga tawo sa pagpamati sa iya.

← Chapter 3 Jump to: Chapter 5 →