1 Kings 6

Ilonggo (Maayong Balita nga Biblia (2012))

← Chapter 5 Jump to: Chapter 7 →

1Sa tapos ang 480 ka tuig nga ang mga Israelinhon nakahalin sa Ehipto, sa ikap-at nga tuig sang paggahom ni Solomon sa Israel, sa ikaduha nga bulan nga amo ang bulan sang Ziv, si Solomon nagsugod sa pagpatindog sang Templo.

2Ang sulod sini, nobenta ka tapak ang kalabaon, traynta ka tapak ang kasangkaron, kag kwarentay singko ka tapak ang kataason.

3Ang alagyan nga kwarto kinse ka tapak ang kalabaon kag traynta ka tapak ang kasangkaron, pareho kasangkad sang santuaryo.

4Ang mga pader sang Templo may mga bintana nga ang sa gwa mas magamay sang sa sulod.

5Sa mga kilid kag sa likod sang Templo may ginpatindog kag gindugang nga mga balay nga tatlo ka andana, kag ang tagsa ka andana pito kag tunga ka tapak ang kataason.

6Ang tagsa ka kwarto sa pinakamanubo nga panalgan pito kag tunga ka tapak ang kasangkaron, sa natunga nga panalgan siyam ka tapak ang kasangkaron, kag ang naibabaw nga panalgan napulo kag tunga ka tapak ang kasangkaron. Ang dingding sang Templo sa tagsa ka panalgan paibabaw mas manipis sang sa idalom nga panalgan agod ang mga kwarto makatungtong sa dingding kag indi na kinahanglan nga butangan pa ini sing mga sintas.

7Ang mga bato nga gingamit sa pagpatindog sang Templo ginhanda na nga daan sa ginkuhaan sini, agod wala na sing ginahod sang mga martilyo, wasay, ukon bisan ano nga gamit nga salsalon samtang ginapatindog ang Templo.

8Ang alagyan pakadto sa pinakaidalom nga panalgan sa gindugang nga balay, yara sa bagatnan nga kilid sang Templo, nga may mga hagdan nga nagapasaka sa ikaduha kag ikatlo nga mga panalgan.

9Gani natapos ni Haring Solomon ang pagpatindog sang Templo. Ginbutangan niya ini sing kisame nga ang mga balayan kag mga tapi kahoy nga sedro.

10Ang tatlo ka andana nga gindugang nga balay, nga ang tagsa ka andana pito kag tunga ka tapak ang kataason, natapik sa nagwa nga mga dingding sang Templo, kag ginaangot ini sa mga balayan nga nahimo sa kahoy nga sedro.

11Ang Ginoo nagsiling kay Solomon,

12“Kon tumanon mo ang tanan ko nga mga kasugoan kag mga sugo, himuon ko sa imo ang ginsaad ko sa imo amay nga si David.

13Magaestar ako upod sa akon mga tawo nga Israelinhon sa sini nga Templo nga imo ginapatindog, kag indi ko gid sila pagpatumbayaan.”

14Gani natapos ni Solomon ang pagpatindog sang Templo.

15Ang nasulod nga mga dingding natabunan sing mga tapi nga sedro, halin sa salog tubtob sa kisame, kag ang salog nahimo sa kahoy nga pino.

16Ang nasulod nga kwarto nga ginatawag ang Labing Balaan nga Duog ginhimo sa likod nayon sang Templo. Ang kalabaon sini traynta ka tapak, kag ginhulot ini sang mga tapi nga sedro halin sa salog tubtob sa kisame.

17Ang kwarto sa atubangan sang Labing Balaan nga Duog sesenta ka tapak ang kalabaon.

18Ang sedro nga mga tapi napunihan sang mga gintigib nga mga balagon kag mga bulak; ang bug-os nga nasulod nga bahin ginhaklapan sang sedro nga mga tapi agod ang mga bato sang mga dingding indi makita.

19Sa likod nayon sang Templo ginhimo ang nasulod nga kwarto sa diin ginbutang ang Kaban sang Kasugtanan sang Ginoo.

20Ining nasulod nga kwarto traynta ka tapak ang kalabaon, traynta ka tapak ang kasangkaron, kag traynta ka tapak ang kataason, kag nahaklapan ini tanan sang puraw nga bulawan. Ang altar nahaklapan sang mga tapi nga sedro.

21Ang sulod nga bahin sang Templo nahaklapan sang bulawan, kag ang bulawan nga kadena nahigot pabalabag sa alagyan sang nasulod nga kwarto nga nahaklapan man sing bulawan.

22Ang bug-os nga nasulod sang Templo nahaklapan sang bulawan, subong man ang altar sa Labing Balaan nga Duog.

23May duha ka mga kerubin nga nahimo sa kahoy nga olivo kag ginbutang sa Labing Balaan nga Duog, ang tagsa sa ila may kataason nga kinse ka tapak.

24Sila nga duha pareho kadako kag pareho man ang korte. Ang tagsa sa ila may duha ka mga pakpak kag ang tagsa ka pakpak may kalabaon nga pito kag tunga ka tapak, agod ang antad halin sa punta sang isa ka pakpak tubtob sa isa ka punta kinse ka tapak.

27Ginbutang ini sa duha ka kilid sang Labing Balaan nga Duog, agod ang ila duha ka nahumlad nga pakpak nagaduotay sa tunga sang kwarto, kag ang ila duha pa gid ka mga pakpak nagaduot sa mga dingding.

28Ang duha ka mga kerubin nahaklapan sang bulawan.

29Ang mga dingding sang daku nga kwarto kag sang nasulod nga kwarto napunihan tanan sang gintigib nga mga larawan sang mga kerubin, sang mga kahoy nga palma, kag mga bulak.

30Bisan ang salog nahaklapan sang bulawan.

31Ang duha ka mga sira nga nahimo sa kahoy nga olivo nabutang sa pwertahan pasulod sa Labing Balaan nga Duog. Ang ibabaw sang pwertahan isa ka mataliwis nga arko.

32Ang mga pwertahan napunihan sang mga larawan sang mga kerubin, mga kahoy nga palma, kag mga bulak. Ang mga pwertahan, ang mga kerubin, kag ang mga kahoy nga palma, nahaklapan sang bulawan.

33Ang isa ka eskwalado nga hamba nga ginhimo sa kahoy nga olivo ginbutang sa pwertahan pakadto sa daku nga kwarto.

34May duha ka panid nga sira nga nahimo sa kahoy nga pino,

35kag napunihan sang mga larawan sang natigib nga mga kerubin, mga kahoy nga palma, kag mga bulak, nga nahaklapan sing maayo sang bulawan.

36Ang nasulod nga pasiyuhan ginhimo sa atubangan sang Templo. Nalibutan ini sang mga pader nga may isa ka sampaw sang mga tablon nga sedro sa tagsa ka tatlo ka sampaw nga bato.

37Ang sadsaran sang Templo ginpasad sang ikaduha nga bulan, ang bulan sang Ziv, sa ikap-at nga tuig sang paghari ni Solomon.

38Sa ikawalo nga bulan, ang bulan sang Bul, sa ika-11 nga tuig sang paggahom ni Solomon, ang Templo natapos sing bug-os, suno gid sa plano. Pito ka tuig ang kalawigon sang pagpatindog sini ni Solomon.

← Chapter 5 Jump to: Chapter 7 →