1 Kings 18 — Ilonggo (Maayong Balita nga Biblia (2012))

1Nagligad ang malawig nga tion, kag sa ikatlo nga tuig sang tingadlaw, ang Ginoo nagsiling kay Elias, “Lakat kag magpakita ka kay Haring Acab, kag ako magapadala sing ulan.”

2Gani naglakat si Elias. Karon ang tiggulotom tama gid sa Samaria,

3gani ginpatawag ni Acab si Abdias nga nagadumala sang palasyo. (Si Abdias matutom nga manugsimba sa Ginoo,

4kag sang ginpamatay ni Jezebel ang mga propeta sang Ginoo gintago ni Abdias ang 100 ka propeta sa kweba sa tag-singkwenta ang tagsa ka grupo kag ginhatagan niya sila sing pagkaon kag tubig.)

5Si Acab nagsiling kay Abdias, “Malakat kita kag tan-awon ta ang tagsa ka tuboran kag ang tagsa ka sapa sa duta kon makakita kita sing tuman nga hilamon agod indi mapatay ang aton mga kabayo kag mga mula. Basi pa lang nga indi kinahanglan nga patyon naton ang bisan isa sang aton mga kasapatan.”

6Nagkasugot sila kon diin nga bahin sang duta ang pagakadtuan sang tagsa sa ila, kag nagbulagay sila kag naglakat sa ila kaladtuan.

7Sang nagalakat si Abdias, sa hinali nasugata niya si Elias. Nakilala niya sia, gani nagsaludo sia sa iya atubang kag nagpamangkot, “Halangdon nga Elias, ikaw gid bala ini?”

8Nagsabat sia, “Huo, si Elias ako. Lakat ka kag singgana ang imo agalon nga hari nga yari ako diri!”

9Si Abdias nagsabat, “Ano bala ang nahimo ko nga luyag mo ang akon kabuhi ibutang sa katalagman paagi sa pagpapatay sa akon kay Haring Acab?

10Sa ngalan sang buhi nga Ginoo nga imo Dios, nagasumpa ako nga ang hari nagpapangita sa imo sa tagsa ka pungsod sa kalibutan. Kon sugiran gani sia sang pangulo sang pungsod nga wala ikaw didto ginapasumpa niya ang pangulo sina nga pungsod nga wala ikaw didto.

11Kag karon gusto mo magkadto ako sa iya kag sugiran sia nga yari ikaw diri?

12Ti, abi kon sa paghalin ko lang diri ang Espiritu sang Ginoo magdala sa imo sa lugar nga wala mahibal-i? Dayon kon singganan ko si Acab nga yari ikaw diri, kag indi niya ikaw makita, pagapatyon niya ako. Dumdoma nga matutom ako nga manugsimba sa Ginoo halin sang bata pa ako.

13Wala bala ikaw makabati nga sang si Jezebel nagpamatay sang mga propeta sang Ginoo gintago ko ang 100 sa ila, sa mga kweba sa tag-singkwenta ang kada grupo kag ginhatagan ko sila sang pagkaon kag tubig?

14Kag karon ngaa ginasugo mo ako sa pagkadto kag sa pagsugid sa hari nga yari ikaw diri? Patyon niya ako!”

15Si Elias nagsabat, “Sa ngalan sang nagakabuhi nga Ginoo nga Makagagahom nga akon ginaalagad, nagasaad ako nga magapakita ako sa hari sa karon nga adlaw.”

16Gani si Abdias nagkadto kay Haring Acab kag ginsingganan sia, kag si Acab naglakat sa pagpakigkita kay Elias.

17Sang pagkakita ni Acab sa iya nagsiling sia, “Yari ka gali, ang manugpagamo sa Israel!”

18Si Elias nagsabat, “Indi ako manugpagamo, kundi ikaw kag ang imo amay. Wala ka magtuman sa mga sugo sang Ginoo kag ginasimba mo ang mga diosdios ni Baal.

19Karon mandui ang tanan nga mga tawo sang Israel sa pagpakigkita sa akon sa Bukid sang Carmel. Dalha ang 450 ka mga propeta ni Baal kag ang 400 ka mga propeta sang diosa nga si Asera, sila nga ginasagod ni Rayna Jezebel.”

20Gani si Acab nagpatawag sang tanan nga mga Israelinhon kag sang mga propeta ni Baal sa pagtilipon sa Bukid sang Carmel.

21Si Elias nagkadto sa mga tawo kag nagsiling, “San-o pa bala kamo magpamat-od sa inyo panghunahuna? Kon ang Ginoo Dios, simbaha ninyo sia, pero kon si Baal ang Dios, simbaha ninyo sia!” Pero ang mga tawo naghipos lamang.

22Dayon si Elias nagsiling, “Ako lamang ang propeta sang Ginoo nga nabilin, pero may yara nga 450 ka mga propeta ni Baal.

23Magdala kamo diri sing duha ka mga baka nga toro, ipakuha sa ila ang isa, ihawon ini kag lasaon, kag ibutang ini sa ibabaw sang gatong, pero indi ini pagdabukan. Himuon ko man ini sa isa ka baka nga toro.

24Dayon papangamuyoa ang mga propeta ni Baal sa ila dios, kag ako magapangamuyo sa Ginoo, kag ang magasabat paagi sa iya pagpadala sing kalayo amo ang Dios.” Ang mga tawo nagsinggit sa pagpasugot.

25Dayon si Elias nagsiling sa mga propeta ni Baal, “Tungod kay madamo kamo, kuhaa ninyo ang isa ka baka nga toro kag mag-una kamo sa paghanda sini. Pangamuyo kamo sa inyo dios, pero indi ninyo pagdabuki ang gatong.”

26Ginkuha nila ang baka nga toro nga gindala sa ila, ginhanda ini, kag nagpangamuyo kay Baal tubtob nag-udto. Nagsinggit sila, “Baal, sabta kami!” Kag nagpadayon sila sa pagsaot palibot sa altar nga ila ginpatindog. Pero wala gid sing may nagsabat.

27Sang udto na si Elias nagyaguta sa ila nga nagasiling: “Tunogtunoga ninyo nga pagpangamuyo! Isa sia ka dios! Ayhan nagadalamguhanon lang sia, ukon nagapahuwayhuway, ukon ayhan nagpanglakaton! Ukon ayhan nagakatulog sia kag kinahanglan pukawon ninyo sia!”

28Gani ang mga propeta nagpangamuyo sing tudo pa gid, kag ginpilas nila ang ila kaugalingon sang mga sundang kag mga daga, suno sa ila kinabatasan, tubtob ang dugo nag-agay.

29Nagpadayon sila sa pagpanawag kag pagsinggit tubtob sa kahapunanon, pero wala gid sing may nagsabat, wala gid sing tinimoktimok.

30Dayon si Elias nagsiling sa mga tawo, “Palapit kamo sa akon.” Tanan sila nagtipon sa palibot niya. Dayon ginkaayo niya ang altar sang Ginoo nga naguba.

31Nagkuha sia sing dose ka mga bato, isa para sa tagsa ka tribo sang mga kaliwat ni Jacob, ang tawo nga ginhingalanan sang Ginoo nga Israel.

32Gingamit niya ini nga mga bato sa pagpatindog liwat sang altar para sa pagsimba sa Ginoo. Nagkutkot sia sing kanal sa palibot sini, nga sarang masudlan sing malapit sa apat ka galon sang tubig.

33Dayon ginbutang niya ang gatong sa altar, ginhiwahiwa ang baka nga toro, kag gintungtong ini sa ibabaw sang gatong.

34Nagsiling sia, “Pun-a ninyo ang apat ka banga sing tubig kag ibubo ini sa halad kag sa gatong. Ginhimo nila ini kag nagsiling sia, “Himua ninyo liwat.” Kag ginhimo nila liwat. Dayon nagsiling pa gid sia, “Himua pa gid ninyo liwat.” Kag ginhimo pa gid nila liwat.

35Ang tubig nag-ilig sa palibot sang altar kag napuno ang kanal.

36Sa kahapunanon sa tion nga ginadulot ang halad, si Elias nga propeta nagpalapit sa altar kag nagpangamuyo, “O Ginoo, ang Dios ni Abraham, ni Isaac, kag ni Jacob, pamatud-i karon nga ikaw ang Dios sang Israel, kag ako imo alagad nga naghimo sini tanan suno sa imo sugo.

37Sabta ako, Ginoo, sabta ako, agod ini nga mga tawo magakilala nga ikaw, ang Ginoo, amo ang Dios kag ikaw nagadala sa ila pabalik sa imo kaugalingon.

38Ang Ginoo nagpadala sing kalayo nga nagsunog sang halad, sang kahoy, sang mga bato, kag sang duta, kag nagpahubas sang tubig sa kanal.

39Sang pagkakita sini sang mga tawo naghapa sila sa duta kag nagsiling, “Ang Ginoo amo ang Dios, ang Ginoo lamang amo ang Dios!”

40Si Elias nagmando, “Dakpa ninyo ang mga propeta ni Baal, indi pagpapalagyuha ang bisan isa sa ila!” Gindakop nila sila tanan, kag gindala sila ni Elias sa Sapa sang Kison kag ginpamatay sila.

41Dayon si Elias nagsiling kay Haring Acab, “Karon lakat ka kag magkaon kag mag-inom. Mabatian ko ang huganas sang ulan nga nagapalapit.”

42Samtang si Acab naglakat agod magkaon kag mag-inom, si Elias nagsaka sa putokputokan sang Bukid sang Carmel, sa diin nagluhod sia sa duta nga ang iya ulo yara sa gintung-an sang iya duha ka tuhod.

43Nagsiling sia sa iya suloguon, “Lakat ka kag maglantaw sa dagat.” Ang suloguon naglakat kag nagbalik nga nagasiling, “Wala ako sing may nakita bisan ano.” Kapito gid sia ginsingganan ni Elias nga maglakat kag maglantaw.

44Sa ikapito nga tion nagbalik sia kag nagsiling, “Nakita ko ang diutay nga gal-om nga daw kamumuo sang tawo kadako nga nagapaibabaw halin sa lawod.” Si Elias nagmando sa iya alagad, “Kadto ka kay Haring Acab kag singgana sia nga magsakay sia sa iya karwahi kag magpauli sa indi pa sia maabtan sang ulan.”

45Sa wala madugay ang langit nakulapan sang madulom nga gal-om, ang hangin nagsugod sa paghuyop, kag ang madamol nga ulan nagsugod sa pagtupa. Si Acab nagsakay sa iya karwahi kag nagbalik sa Jezreel.

46Ang gahom sang Ginoo nag-abot kay Elias, ginwagkusan niya sing hugot ang iya bayu sa palibot sa iya hawak kag nagdalagan sing una kay Acab pakadto sa Jezreel.