1 Kings 19

Ilonggo (Maayong Balita nga Biblia (2012))

← Chapter 18 Jump to: Chapter 20 →

1Si Haring Acab nagsugid sa iya asawa nga si Jezebel sang tanan nga ginhimo ni Elias, kag kon paano ginpamatay ni Elias ang tanan nga mga propeta ni Baal.

2Si Jezebel nagpadala sini nga mensahe kay Elias: “Kabay nga ang mga dios magpatay sa akon kon sa mga amo sini nga tion buas indi ko mahimo sa imo ang ginhimo nimo sa mga propeta.”

3Si Elias hinadlukan kag nagpalagyo sia agod indi mapatay. Gindala niya ang iya suloguon kag nagkadto sa Beerseba sa Juda. Ginbilin niya didto ang iya suloguon

4kag naglakat sia sa desierto sa bug-os nga adlaw. Nagdulog sia kag nagpungko sa landong sang isa ka kahoy kag naghandom sia nga mapatay na lang. Nagpangamuyo sia, “Indi na ako makaagwanta, Ginoo. Kuhaa na lang ang akon kabuhi. Maayo pa nga mapatay na lang ako!”

5Naghigda sia sa idalom sang kahoy kag natulogan. Sa hinali ang anghel nagtandog sa iya kag nagsiling, “Bangon ka kag magkaon.”

6Nagpanghulonghulong sia kag sa iya ulohan may nakita sia nga bibingka kag isa ka tibod nga tubig. Nagkaon sia kag nag-inom kag naghigda liwat.

7Ang anghel sang Ginoo nagbalik kag ginpukaw sia liwat nga nagasiling, “Bangon ka kag magkaon, kay ang lalakton tama pa kalawig para sa imo.”

8Si Elias nagbangon, nagkaon kag nag-inom, kag ang pagkaon naghatag sa iya sing tuman nga kusog sa paglakat sing kwarenta ka adlaw pakadto sa Sinai, ang balaan nga bukid.

9Didto nagsulod sia sa kweba sa pagpaligad sang gab-i. Sa hinali ang Ginoo naghambal sa iya, “Elias, nagaano ka diri?”

10Nagsabat sia, “ Ginoong Dios nga Makagagahom, nag-alagad ako sa imo, sa imo lamang, sa wala sing untat. Pero ang mga tawo sang Israel naglapas sang ila kasugtanan sa imo, ginpangguba nila ang imo mga altar, kag ginpamatay ang tanan mo nga mga propeta. Ako lamang ang nabilin, kag nagatinguha pa sila sa pagpatay sa akon!”

11Ang Ginoo nagsiling sa iya, “Gwa ka kag magtindog sa atubang ko sa ibabaw sang bukid.” Dayon ang Ginoo nag-agi kag nagpadala sing mabaskog nga hangin nga nagtay-og sang mga bakulod kag nagpugday sang dalagku nga mga bato, pero ang Ginoo wala sa hangin. Ang hangin nag-untat sa paghuyop, kag dayon naglinog, pero ang Ginoo wala sa linog.

12Sa tapos ang linog may kalayo, pero ang Ginoo wala sa kalayo. Kag sa tapos ang kalayo may mahinay nga tingog nga nagahutik.

13Sang pagkabati ni Elias sini, gintabunan niya ang iya guya sang iya kunop, naggwa kag nagtindog sia sa pwertahan sang kweba. Ang tingog nagasiling sa iya, “Elias, nagaano ka diri?”

14Nagsabat sia, “ Ginoong Dios nga Makagagahom, nag-alagad ako sa imo, sa imo lamang, sa wala sing untat. Pero ang mga tawo sang Israel naglapas sang ila kasugtanan sa imo, ginpangguba nila ang imo mga altar, kag ginpamatay ang tanan mo nga mga propeta. Ako lamang ang nabilin, kag nagatinguha pa sila sa pagpatay sa akon.”

15Ang Ginoo nagsiling, “Balik ka sa desierto malapit sa Damasco. Sulod ka sa siudad kag haplason si Hazael nga manginhari sang Siria,

16kag ang anak ni Nimsi nga si Jehu nga manginhari sang Israel. Haplasa man si Eliseo nga anak ni Safat halin sa Abel-Mehola sa pagbulos sa imo subong propeta.

17Ang bisan sin-o nga makapalagyo sa pagpamatay ni Hazael pagapatyon ni Jehu, kag ang bisan sin-o nga makapalagyo kay Jehu pagapatyon ni Eliseo.

18Pero magabilin ako sa Israel sing 7,000 ka mga tawo nga buhi sa tanan nga nag-unong sa akon kag wala magluhod ukon maghalok kay Baal.”

19Si Elias naglakat kag nakita niya si Eliseo nga nagaarado sang dose ka pares nga mga baka. May onse ka pares sa una niya kag nagaarado sia sang katapusan nga pares. Gin-uba ni Elias ang iya kunop kag gintaklap kay Eliseo.

20Dayon ginbayaan ni Eliseo ang iya mga baka, kag naglagas kay Elias kag nagsiling, “Mahalok anay ako sa akon amay kag iloy sa pagpaalam sa ila, kag dayon magaupod ako sa imo.” Si Elias nagsabat, “Sigi, balik ka. Wala ako nagapugong sa imo!”

21Dayon si Eliseo nagbalik sa iya mga baka, gin-ihaw niya ini kag gingamit niya ang mga gota nga gatong sa pagluto sang karne. Ginhatag niya ang linuto sa mga tawo kag ginkaon nila ini. Dayon naglakat sia kag nagsunod kay Elias subong iya kabulig.

← Chapter 18 Jump to: Chapter 20 →