1 Kings 12

Ilonggo (Maayong Balita nga Biblia (2012))

← Chapter 11 Jump to: Chapter 13 →

1Si Rehoboam nagkadto sa Siquem sa diin ang tanan nga mga tawo sang naaminhan nga bahin sang Israel nagtipon sa paghimo sa iya nga hari.

2Ang balita nahanungod sini nakaabot kay Jeroboam nga anak ni Nebat. Didto pa sia sa Ehipto sa diin sia nagkadto sa pagpalagyo gikan kay Haring Solomon. Dayon si Jeroboam nagbalik halin sa Ehipto.

3Ang mga tawo sang naaminhan nga mga tribo nagpatawag sa iya, kag tanan sila nagkadto sing tingob kay Haring Rehoboam kag nagsiling sa iya,

4“Indi maayo ang pagtratar sa amon sang imo amay nga si Solomon kag mabug-at ang ginpapas-an niya sa amon. Kon ibanan mo ini nga mga palas-anon kag indi mo kami pagpabudlayan sa amon pagpangabuhi ti, magaalagad kami sing mainunongon sa imo.”

5Nagsabat sia, “Balik kamo sa tapos ang tatlo ka adlaw, kag hatagan ko kamo sang akon sabat.” Gani naglakat sila.

6Dayon si Rehoboam nagpakigsapol sa mga tigulang nga nag-alagad subong mga palamangkutan sang iya amay nga si Solomon. Ginpamangkot niya sila, “Ano ang maayo nga isabat ko sa sini nga mga tawo?”

7Nagsabat sila, “Kon luyag mo mag-alagad sa sini nga mga tawo sing maayo, ihatag ang ila ginapangabay, kag magaalagad sila sa imo sing matutom.”

8Pero si Rehoboam wala magsapak sang ila laygay. Sa baylo, nagkadto sia sa iya mga palamangkutan nga pamatan-on nga mga lalaki nga katubotubo niya.

9Ginpamangkot niya sila, “Sa inyo abi, ano ang himuon ko? Ano ang isiling ko sa sining mga tawo nga nagapangabay sa akon nga ibanan ang ila mga palas-anon?”

10Nagsabat sila, “Amo ini ang isiling mo sa ila: ‘Ang kamalingking ko mas daku pa sang sa hawak sang akon amay!

11Kon ang mga ginpapas-an sang akon amay sa inyo mabug-at, ang ipapas-an ko sa inyo mas mabug-at pa! Ginhanot niya kamo sang mga bilugon, pero ako magahanot sa inyo sing mga putik!’”

12Sang makaligad ang tatlo ka adlaw, si Jeroboam kag ang tanan nga mga Israelinhon nagbalik kay Haring Rehoboam, suno sa iya ginsiling sa ila,

13kag ginsabat niya sila sing matigdas. Wala niya pagsapaka ang laygay sang mga tigulang nga palamangkutan,

14kundi ginhambal niya sa mga tawo ang ginsiling sa iya sang iya mga pamatan-on nga palamangkutan, “Kon ang mga ginpapas-an sang akon amay sa inyo mabug-at, ang ipapas-an ko sa inyo mas mabug-at pa. Ginhanot niya kamo sang mga bilugon, pero ako magahanot sa inyo sing mga putik!”

15Ang iya indi pagpamati sa mga tawo pagpanghikot sang Ginoo, sa pagtuman sang iya ginsaad kay Jeroboam nga anak ni Nebat paagi kay Ahias nga propeta nga nagikan sa Silo.

16Sang matalupangdan sang mga tawo nga ang hari indi magpamati sa ila, nagsinggit sila, “Ibagsak si David kag ang iya panimalay! Ano ang nahimo nila sa aton! Mga tawo sang Israel, magpauli kita! Pabay-i dira si Rehoboam!” Gani ang mga tawo sang Israel nagrebelde,

17kag ginpabayaan nila si Rehoboam nga maggahom sa mga tawo lamang nga nag-estar sa duta sang Juda.

18Dayon si Haring Rehoboam nagpadala kay Adoniram sa mga Israelinhon. Sia amo ang nagdumala sang pilit nga pagpaobra, pero ginbato nila sia tubtob nga napatay. Dayon nagdalidali si Rehoboam sa pagsakay sa karwahi kag nagpalagyo pakadto sa Jerusalem.

19Sugod sadto nga tion, ang mga tawo sang naaminhan nga ginharian sang Israel nagapamatok sa panimalay ni David.

20Sang pagkabati sang mga tawo sang Israel nga si Jeroboam nakabalik halin sa Ehipto, gin-agda nila sia sa pagpakigkita sa mga tawo, kag ginhimo nila sia nga hari sang Israel. Ang tribo lamang ni Juda amo ang mainunongon sa mga kaliwat ni David.

21Sang pag-abot ni Rehoboam sa Jerusalem, gintawag niya sing tingob ang 180,000 ka pinili nga mga soldado halin sa mga tribo ni Juda kag ni Benjamin sa pagkadto sa pagpakig-away agod nga maggahom sia liwat sa naaminhan nga mga tribo sang Israel.

22Pero ang Dios nagsugo kay Semaya nga propeta

23sa pagkadto kay Haring Rehoboam sang Juda kag ipahibalo sa iya kag sa tanan nga mga katawhan sang mga tribo ni Juda kag Benjamin

24nga ang Ginoo nagsiling, “Indi kamo magpakig-away sa inyo kaugalingon nga mga utod nga mga katawhan sang Israel. Magpauli ang tagsatagsa sa inyo, kay ang natabo akon nga pahito.” Nagpati sila tanan sang sugo sang Ginoo kag nagpauli sila.

25Si Haring Jeroboam sang Israel nagbutang sing mga pamakod sa banwa sang Siquem sa kabakuloran sang Efraim kag nag-estar didto. Sang ulihi naghalin sia didto kag ginbutangan niya sing pamakod ang banwa sang Penuel.

26Nagsiling sia sa iya kaugalingon, “Sa sini nga kahimtangan, kon ang akon mga tawo magkadto sa Jerusalem kag magdulot sing mga halad sa Ginoo sa Templo didto, magasaylo ang ila pag-unong kay Haring Rehoboam sang Juda, kag patyon nila ako.”

28Sang mapanghunahunaan niya ini, naghimo sia sing duha ka toro nga mga baka nga bulawan, kag nagsiling sia sa iya mga tawo, “Madugay na ang inyo pagkadto sa Jerusalem agod sa pagsimba. Mga tawo sang Israel, yari ang inyo mga dios nga nagpagwa sa inyo sa Ehipto!”

29Ginbutang niya ang isa ka toro nga baka nga bulawan sa Betel kag ang isa sa Dan.

30Gani ang mga tawo nagpakasala sa ila pagkadto kag pagsimba sa Betel kag sa Dan.

31Si Jeroboam naghimo man sing mga lugar nga ginasimbahan sa ibabaw sang mga bakulod, kag nagpili sia sing mga pari halin sa mga panimalay nga indi sa tribo ni Levi.

32Si Jeroboam naghiwat man sing piesta sang ika-15 nga adlaw sang ikawalo nga bulan, kaangay sang piesta sa Juda. Nagdulot sia sing mga halad sa altar sa Betel sa toro nga baka nga bulawan nga iya ginhimo, kag ginbutang niya didto sa Betel ang mga pari nga nagaalagad sa mga lugar nga ginasimbahan nga iya ginhimo.

33Kag sa ika-15 nga adlaw sang ikawalo nga bulan, ang adlaw nga iya ginpili, nagkadto sia sa Betel kag nagdulot sia sing halad sa altar sa pagsaulog sang piesta nga iya gintangdo para sa mga tawo sang Israel.

← Chapter 11 Jump to: Chapter 13 →