1 Kings 5

Ilonggo (Maayong Balita nga Biblia (2012))

← Chapter 4 Jump to: Chapter 6 →

1Si Hiram nga hari sang Tiro amigo ni David halin sang una. Sang pagkabati niya nga si Solomon nagbulos sa iya amay nga si David bilang hari, nagpadala sia sing mga embahador sa iya.

2Si Solomon nagbalos sing mensahe kay Hiram:

3“Nakahibalo ka nga ang akon amay nga si David indi makapatindog sang templo para simbahon ang Ginoo nga iya Dios, tungod sang iya pirme nga mga pagpakig-away batok sa mga kaaway nga mga pungsod sa palibot niya. Indi sia makapatindog sang templo tubtob ang Ginoo maghatag sa iya sing pagdaog batok sa tanan niya nga mga kaaway.

4Pero karon ang Ginoo nga akon Dios naghatag sa akon sing kalinong sa tanan ko nga mga dulonan. Wala na ako sing mga kaaway, kag wala ako nagakahadlok nga may magasalakay sa akon.

5Ang Ginoo nagsaad sa akon amay nga si David, ‘Ang imo anak akon pabuslon sa imo subong hari. Magapatindog sia sing templo para sa akon.’ Karon pat-od na ang akon plano sa pagpatindog sina nga templo para simbahon ang Ginoo nga akon Dios.

6Gani ipadala ang imo mga tinawo sa Libano sa pagpang-utod sing mga kahoy nga sedro para sa akon. Ang akon mga tinawo magaobra upod sa ila, kag suholan ko ang imo mga tinawo suno sa isiling mo. Ikaw gid nakahibalo nga ang akon mga tinawo indi makahibalo sa pagpang-utod sing mga kahoy pareho sang imo mga tinawo.”

7Si Hiram nalipay gid sang pagkabaton niya sang mensahe ni Solomon, kag nagsiling sia, “Dayawon ang Ginoo karon nga adlaw sa iya paghatag kay David sing maalam nga anak nga magabulos sa iya subong hari sa sinang daku nga pungsod!”

8Dayon si Hiram nagpadala kay Solomon sining masunod nga mensahe: “Nabaton ko ang imo mensahe, kag handa ako sa paghimo sang imo ginapangabay, kag sa paghatag sang mga kahoy nga sedro kag pino.

9Ang akon mga tinawo magapadulhog sang mga kahoy halin sa Libano tubtob sa dagat kag ila ini talabiron nga daw mga balsa agod ila ini mapalutaw sa baybayon pakadto sa lugar nga imo luyag. Didto pagabuloblagon ini sang akon mga tinawo kag ang imo mga tinawo amo na ang mahibalo sa pagkuha sini. Luyag ko nga ang imo bahin amo ang paghatag sang pagkaon para sa akon mga tinawo.”

10Gani si Hiram naghatag kay Solomon sang tanan nga kahoy nga sedro kag pino nga iya kinahanglanon.

11Kag si Solomon naghatag kay Hiram sing 50,000 ka sako nga trigo kag 110,000 ka galon nga lana sang olivo kada tuig para sa iya mga tinawo.

12Ang Ginoo nagtuman sang iya saad kag ginhatagan niya si Solomon sing kaalam. May kalinong sa tunga ni Hiram kag ni Solomon, kag naghimo sila sing kasugtanan sa pag-apinay.

13Si Haring Solomon nagtipon sa bug-os nga Israel sing 30,000 ka mga tawo nga ginpilit sa pag-obra,

14kag ginbutang niya si Adoniram sa pagdumala sa ila. Ginbahinbahin niya sila sa tatlo ka grupo nga ang tagsa ka grupo may tag-10,000 ka mga tawo, kag ang tagsa ka grupo nagtener sing isa ka bulan sa Libano kag duha ka bulan sa ila balay.

15Si Solomon may 80,000 man ka mga tawo sa kabakuloran nga nagabasbas sing mga bato, kag may 70,000 ka mga tawo sa pagdala sini,

16kag nagbutang sia sing 3,300 ka mga porman sa pagdumala sang ila mga hilikuton.

17Sa mando ni Haring Solomon nagbasbas sila sing dalagku kag maayo nga klase nga mga bato para sa sadsaran sang Templo.

18Ang mga tinawo ni Solomon kag ni Hiram, kag ang mga tawo halin sa Siudad sang Biblos, naghanda sang mga bato kag mga tablon sa pagpatindog sang Templo.

← Chapter 4 Jump to: Chapter 6 →