1 Kings 14

Ilonggo (Maayong Balita nga Biblia (2012))

← Chapter 13 Jump to: Chapter 15 →

1Sa sadto nga tion si Abias nga anak nga lalaki ni Haring Jeroboam nagmasakit.

2Si Jeroboam nagsiling sa iya asawa, “Magpakunokuno ka agod wala sing may makakilala sa imo. Dayon kadto ka sa Silo, sa diin nagaestar si Ahias, ang propeta, nga nagsiling nga manginhari ako sang Israel.

3Dalhi sia sing napulo ka barita nga tinapay, mga kalan-unon, kag isa ka tibod nga dugos. Pamangkuta sia kon ano ang matabo sa aton anak kag sia magasugid sa imo.”

4Gani nagkadto sia sa balay ni Ahias sa Silo. Indi na makakita si Ahias kay tigulang na sia.

5Ang Ginoo nagsiling sa iya nga ang asawa ni Jeroboam magaabot sa pagpamangkot sa iya nahanungod sang ila anak nga nagamasakit. Kag ang Ginoo nagsiling kay Ahias kon ano ang iya isiling. Sang pag-abot sang asawa ni Jeroboam, nagpakunokuno sia nga iban sia nga babayi.

6Pero sang pagkabati ni Ahias nga nagapalapit sia sa pwertahan, nagsiling sia, “Sulod. Nakahibalo ako nga asawa ikaw ni Jeroboam. Ngaa nagapakunokuno ka nga ikaw iban nga babayi? May malain ako nga balita para sa imo.

7Lakat kag singgana si Jeroboam nga amo ini ang ginasiling sa iya sang Ginoo, ang Dios sang Israel, ‘Ginpili ko ikaw gikan sa mga tawo kag ginhimo ko ikaw nga pangulo sang akon mga tawo nga Israelinhon.

8Ginkuha ko ang ginharian sa mga kaliwat ni David kag ginhatag ini sa imo. Pero indi ka kaangay sang akon alagad nga si David, nga mainunongon sing bug-os sa akon, nagtuman sang akon mga sugo, kag naghimo sang luyag ko lamang.

9Naghimo ka sing mas dalagku pa nga mga sala sang sa mga naggahom sing una sa imo. Ginsikway mo ako, kag ginpaakig mo ako sa imo paghimo sing mga diosdios kag mga imahen nga metal agod pagasimbahon.

10Tungod sini magadala ako sing kalaglagan sa imo panimalay, kag pamatyon ko ang tanan mo nga mga kaliwat nga lalaki, pamatan-on kag tigulang. Dulaon ko ang imo panimalay, pagasilhigon sila kaangay sang ipot.

11Ang bisan sin-o nga katapo sang imo panimalay nga mapatay sa siudad pagakaunon sang mga ido, kag ang mapatay sa wayang pagakaunon sang mga uwak. Ako, ang Ginoo, ang naghambal sini.’”

12Kag si Ahias nagsiling pa gid sa asawa ni Jeroboam, “Karon magpauli ka. Sa pagsulod mo sa banwa, ang imo anak mapatay.

13Ang tanan nga mga tawo sang Israel magalalaw sa iya kag ilubong nila sia. Sia lamang ang katapo sang panimalay ni Jeroboam nga pagailubong sing nagakaigo, tungod kay sia lamang ang nahamut-an sang Ginoo nga Dios sang Israel.

14Ang Ginoo magabutang sing hari sa Israel nga magatapos sang paggahom sang panimalay ni Jeroboam!

15Ang Ginoo magasilot sa Israel kag magakurog sia kaangay sang pagkurog sang tabun-ak sa kasulgan sang tubig. Pahalinon niya ang mga tawo sang Israel halin sa sining maayo nga duta nga iya ginhatag sa ila mga katigulangan, kag iya sila palaptahon sa unhan sang Suba sang Eufrates tungod kay ginpaakig nila sia sa ila paghimo sing mga imahen sang diosa nga si Asera.

16Patumbayaan sang Ginoo ang Israel tungod kay si Jeroboam nagpakasala kag nagdala sang mga tawo sang Israel sa pagpakasala.”

17Ang asawa ni Jeroboam naglakat kag nagbalik sa Tirsa. Sang nagapasulod sia sa ila balay ang bata napatay.

18Ang mga tawo sang Israel naglalaw kag naglubong sa iya, suno sa ginsiling sang Ginoo paagi sa iya alagad nga propeta nga si Ahias.

19Ang tanan nga ginhimo ni Haring Jeroboam, ang mga inaway nga iya ginpakig-awayan kag ang iya paggahom nasulat tanan sa Maragtas sang mga Hari sang Israel.

20Si Jeroboam naggahom subong hari sa sulod sang baynte dos ka tuig. Napatay sia kag ginlubong, kag ang iya anak nga si Nadab nagbulos sa iya subong hari.

21Si Rehoboam nga anak nga lalaki ni Solomon nagaedad sing kwarentay uno ka tuig sang paghari niya sa Juda, kag naggahom sia sing desi-siete ka tuig sa Jerusalem, ang siudad nga ginpili sang Ginoo gikan sa tanan nga mga kadutaan sang Israel subong lugar sa diin sia pagasimbahon. Ang iloy ni Rehoboam amo si Naama nga taga-Amon.

22Ang mga tawo sang Juda nagpakasala sa Ginoo: Tungod sini naakig ang Ginoo sa ila kay naghimo sila sing sobra pa sang sa ginhimo sang ila tanan nga mga katigulangan.

23Nagpatindog sila sing mga lugar nga pagasimbahan para sa indi matuod nga mga dios, kag nagpatindog sing mga haligi nga bato kag sang mga simbulo ni Asera nga ila pagasimbahon sa mga bakulod kag sa idalom sang madabong nga mga kahoy.

24Ang pinakamalain pa gid sa tanan kay may mga lalaki kag mga babayi nga nagabaligya sang ila dungog sa sini nga mga altar sang mga diosdios nga ila ginsimbahan. Ang mga tawo sang Juda naghimo sang tanan nga makahuloya nga mga butang nga ginhimo anay sang mga pumoluyo sa duta nga gintabog sang Ginoo pa gwa, samtang ang mga Israelinhon nagapasulod sa duta.

25Sa ikalima nga tuig sang paggahom ni Rehoboam, si Sisac nga hari sang Ehipto nagsalakay sang Jerusalem.

26Ginkuha niya kag gindala ang tanan nga mga manggad sa Templo kag sa palasyo, lakip ang bulawan nga mga taming nga ginhimo ni Solomon.

27Sa pag-ilis sini, si Haring Rehoboam nagpahimo sing mga taming nga bronsi kag ginhatag niya ini sa mga opisyales nga nagadumala sang mga gwardya nga nagabantay sa mga pwerta sang palasyo.

28Sa tagsa ka tion nga ang hari magkadto sa Templo, ang mga gwardya nagadala sang mga taming kag dayon ginauli ini sa kwarto sang mga bantay.

29Ang tanan nga hinimuan ni Haring Rehoboam nasulat sa Maragtas sang mga Hari sang Juda.

30Sa bug-os sadto nga panahon si Rehoboam kag si Jeroboam masunson nga nagaaway.

31Si Rehoboam napatay kag ginlubong sia sa harianon nga mga lulobngan sa Siudad ni David, kag ang iya anak nga lalaki nga si Abias nagbulos sa iya subong hari.

← Chapter 13 Jump to: Chapter 15 →