1 Kings 15

Ilonggo (Maayong Balita nga Biblia (2012))

← Chapter 14 Jump to: Chapter 16 →

1Karon sa ika-18 nga tuig sang paghari sa Israel ni Haring Jeroboam, anak nga lalaki ni Nebat, si Abias naghari sa Juda,

2kag naggahom sia sing tatlo ka tuig sa Jerusalem. Ang iya iloy amo si Maaca nga anak ni Absalom.

3Naghimo sia sing mga sala pareho sang nahimo sang iya amay kag indi bug-os ang iya katutom sa Ginoo nga iya Dios subong sang katutom sadto sang iya lolo nga si David.

4Pero tungod kay David, ang Ginoo nga iya Dios naghatag kay Abias sing anak nga lalaki nga magatal-os sa iya paggahom sa Jerusalem, kag sa pagpapag-on sa Jerusalem batok sa mga kaaway.

5Ginhimo ini sang Ginoo tungod kay si David naghimo sang naluyagan sang Ginoo kag wala gid sia maglapas sang iya mga sugo, luas lamang sa natabo kay Urias nga Hethanon.

6Ang inaway nga ginsugoran ni Rehoboam kag ni Jeroboam nagpadayon tubtob sa bug-os nga kabuhi ni Abias.

7Kag ang tanan nga ginhimo ni Abias nasulat sa Maragtas sang mga Hari sang Juda.

8Si Abias napatay kag ginlubong sa Siudad ni David kag ang iya anak nga si Asa nagbulos sa iya subong hari.

9Sa ika-20 nga tuig sang paggahom ni Haring Jeroboam sa Israel, si Asa nanginhari sang Juda,

10kag naggahom sia sing kwarentay uno ka tuig sa Jerusalem. Ang iya lola amo si Maaca, ang anak ni Absalom.

11Si Asa naghimo sang matarong sa panulok sang Ginoo, subong sang ginhimo sang iya lolo nga si David.

12Gintabog niya halin sa pungsod ang tanan nga mga lalaki kag mga babayi nga nagabaligya sang ila dungog nga nagaalagad sa mga lugar sa diin ginasimba ang mga diosdios, kag ginpangguba niya ang tanan nga mga diosdios nga ginhimo sadtong mga una sa iya.

13Ginkuha niya ang pagkarayna sang iya lola nga si Maaca tungod kay ini sia naghimo sing makangilil-ad nga diosdios nga amo ang imahen ni Asera, ang diosa nga nagapabata sang baw-as. Ginpulod ni Asa ang diosdios kag ginsunog ini sa Kapatagan sang Kidron.

14Bisan ang mga altar para sa mga diosdios wala mapangguba tanan, si Asa nagpadayon nga matutom sa Ginoo sa bug-os niya nga kabuhi.

15Ginbutang niya sa Templo ang tanan nga mga butang nga ginhalad sa Dios sang iya amay, lakip ang mga galamiton nga bulawan kag pilak nga iya mismo ginhalad sa Dios.

16Si Haring Asa sang Juda kag si Haring Baasa sang Israel pirme lang nagainaway samtang yara sila sa gahom.

17Gingubat ni Baasa ang Juda kag ginpamakuran ang Rama agod wala sing may makagwa ukon makasulod sa Juda.

18Gani si Haring Asa nagkuha sang tanan nga pilak kag bulawan nga nabilin sa Templo kag palasyo, kag ginpadala ini paagi sa iya mga opisyales pakadto sa Damasco sa kay Haring Benhadad sang Siria, nga anak ni Tabrimon kag apo ni Hesion, kag nagtugon sini:

19“Magdampiganay kita, subong sang aton mga ginikanan. Ini nga pilak kag bulawan regalo ko sa imo. Karon indi ka na magdampig kay Haring Baasa sang Israel agod nga kuhaon niya ang iya hangaway sa akon duta.”

20Si Haring Benhadad nagsugot sa pangabay ni Haring Asa, kag ginpadala niya ang mga hangaway kag ang ila mga opisyales kag ang mga hangaway sa pagsalakay sang mga siudad sang Israel. Gin-agaw nila ang Ijon, Dan, Abel-Bet-Maaca, ang Cinerat, kag ang bug-os nga duta sang Neftali.

21Sang pagkabati ni Haring Baasa sang natabo, nag-untat sia sa pagbutang sing mga pamakod sa Rama kag nagkadto sia sa Tirsa.

22Dayon si Haring Asa nagpadala sing mando sa bug-os nga Juda nga ang tanan, wala gid pinilian, magbulig sa pagdala halin sa Rama sang mga bato kag mga tablon nga gingamit ni Baasa sa pagpamakod sang Rama. Si Asa naggamit sini nga mga galamiton sa pagpamakod sang Mispa kag dayon sang Geba, ang siudad sa duta ni Benjamin.

23Ang tanan nga ginhimo ni Haring Asa, ang iya maisog nga mga binuhatan kag ang mga banwa nga iya ginpamakuran, nasulat tanan sa Maragtas sang mga Hari sang Juda. Pero sang tigulang na sia nalupog sia tungod sang balatian sa iya tiil.

24Si Asa napatay kag ginlubong sa harianon nga mga lulobngan sa Siudad ni David kag ang iya anak nga si Josafat nagbulos sa iya subong hari.

25Sa ikaduha nga tuig sang paghari ni Haring Asa sang Juda, ang anak ni Haring Jeroboam nga si Nadab nanginhari sang Israel, kag naggahom sia sa sulod sang duha ka tuig.

26Subong sang iya amay nga una sa iya nagpakasala sia batok sa Ginoo kag nagdala sa Israel sa pagpakasala.

27Si Baasa nga anak ni Ahias sang tribo ni Isacar nagplano batok kay Nadab kag ginpatay sia samtang si Nadab kag ang iya hangaway nagakibon sang siudad sang Gibeton sa Filistia.

28Natabo ini sang ikatlo nga tuig sang paghari ni Haring Asa sang Juda. Gani si Baasa nagbulos kay Nadab nga hari sang Israel.

29Sa gilayon nagsugod sia sa pagpamatay sang tanan nga mga katapo sang panimalay ni Jeroboam. Kag suno sa ginsiling sang Ginoo paagi sa iya alagad, si Ahias nga propeta nga taga-Silo, ang tanan nga mga katapo sang panimalay ni Jeroboam ginpamatay kag wala gid sing isa nga nabilin.

30Natabo ini tungod kay ginpaakig ni Jeroboam ang Ginoo, ang Dios sang Israel, sa iya pagpakasala kag gindala niya ang Israel sa pagpakasala.

31Ang tanan nga ginhimo ni Nadab nasulat sa Maragtas sang mga Hari sang Israel.

32Si Haring Asa sang Juda kag si Haring Baasa sang Israel masunson nga nagaaway samtang yara sila sa gahom.

33Sa ikatlo nga tuig sang paggahom ni Haring Asa sang Juda, si Baasa nga anak ni Ahias nanginhari sang bug-os nga Israel, kag naggahom sia sa Tirsa sa sulod sang baynte kwatro ka tuig.

34Nagpakasala sia batok sa Ginoo kag gindala niya ang Israel sa pagpakasala pareho kay Haring Jeroboam nga una sa iya.

← Chapter 14 Jump to: Chapter 16 →