1 Kings 9

Ilonggo (Maayong Balita nga Biblia (2012))

← Chapter 8 Jump to: Chapter 10 →

1Sa tapos mapatindog ni Haring Solomon ang Templo kag ang palasyo, kag ang tanan nga luyag niya patindugon,

2ang Ginoo nagpakita liwat sa iya, subong sang iya pagpakita sa Gabaon.

3Ang Ginoo nagsiling sa iya, “Nabatian ko ang imo pangamuyo. Ginapakabalaan ko ini nga Templo nga imo ginpatindog subong nga lugar sa diin ako pagasimbahon sa walay katubtoban. Pagabantayan kag apinan ko ini sa tanan nga tion.

4Kag kon ikaw mag-alagad sa akon sing matarong kag maminatud-on subong sang pag-alagad sang imo amay nga si David, kag kon ikaw magtuman sang tanan nga ginsugo ko sa imo, kag nagatuman sang akon mga kasugoan,

5himuon ko ang akon ginsaad sa imo amay nga si David sang ginsingganan ko sia nga ang isa sang iya mga kaliwat magagahom sa gihapon sa bug-os nga Israel.

6Pero kon ikaw ukon ang imo mga kaliwat mag-untat sa pagsunod sa akon, kag maglapas sang mga kasugoan kag mga sugo nga ginhatag ko sa inyo, kag mag-alagad kag magsimba sa iban nga mga dios,

7dayon tabugon ko ang akon mga tawo nga Israelinhon halin sa duta nga akon ginhatag sa ila. Patumbayaan ko man ini nga Templo nga akon ginpakabalaan tungod kay diri ako simbahon, kag ang mga tawo bisan diin magayaguta kag magapasipala sa Israel.

8Ini nga Templo mangintinumpokan sang mga ginub-an, kag ang tagsatagsa nga maglabay makibot kag matingala kag magapamangkot sila, ‘Ngaa ang Ginoo naghimo sini sa sini nga duta kag sa sini nga Templo?’

9Kag ang iban magasabat, ‘Tungod kay ang mga tawo nagbiya sa Ginoo nga ila Dios, nga nagdala sang ila mga katigulangan pa gwa sa duta sang Ehipto. Nagdangop sila sa iban nga mga dios, kag ginsimba nila kag gin-alagad ini nga mga dios. Gani ang Ginoo nagdala sini nga kalalat-an sa ila.’”

10Si Solomon nagpatindog sang Templo kag sang iya palasyo sa sulod sang baynte ka tuig.

11Si Haring Hiram sang Tiro naghatag sa iya sang tanan nga kahoy nga sedro kag pino, kag sang tanan nga bulawan suno sa iya luyag para sa sini nga hilikuton. Sang matapos ini, si Haring Solomon naghatag kay Hiram sing baynte ka mga banwa sa sakop sang Galilea.

12Ginkadtuan kag gintan-aw ini ni Hiram, pero wala sia maluyag sini.

13Gani nagsiling sia kay Solomon, “Utod ko, ano bala nga sahi sang mga banwa ining ginhatag mo sa akon?” Tungod sini, ini nga lugar ginatawag pa gihapon Kabul.

14Ang nahatag ni Hiram nga bulawan kay Solomon malapit sa lima ka tonelada.

15Si Haring Solomon naggamit sang mga tawo nga iya ginpilit sa pag-obra sa pagpatindog sang Templo kag palasyo, sa pagtampok sang duta sa nasidlangan nga bahin sang siudad, kag sa pagpatindog sang mga pader sang siudad. Gingamit man niya ang mga tawo nga iya ginpilit sa pag-obra agod sa pagpatindog liwat sang mga siudad sang Hasor, Megido, kag Gezer.

16Sadto anay ang hari sang Ehipto nagsalakay sang Gezer kag gin-agaw ini. Ginpamatay niya ang mga pumoluyo sini, kag ginsunog ang siudad. Dayon ginhatag niya ini subong nga regalo sa kasal sang iya bata nga babayi sang pagpamana niya kay Solomon,

17kag ginpatindog ini liwat ni Solomon. Paagi man sa pilit nga pagpaobra, ginpatindog liwat ni Solomon ang Naubos nga Bet-horon,

18ang Baalat, ang Tamar sa desierto sang Juda,

19ang mga siudad sa diin ginabutang ang iya mga bodega, ang mga siudad para sa iya mga kabayo kag mga karwahi, kag ang tanan nga luyag niya patindugon sa Jerusalem, sa Libano, kag bisan diin sa iya ginharian.

20Sa sining pilit nga pagpaobra si Solomon naggamit sang mga kaliwat sang mga pumoluyo sang Canaan nga wala ginpamatay sang mga Israelinhon sang pag-agaw nila sang ila duta. Ini nagalakip sang mga Amornon, mga Hethanon, mga Peresnon, mga Hevhanon, kag mga Jebusnon, nga ang ila mga kaliwat nagapadayon nga mga ulipon tubtob karon nga panahon.

22Si Solomon wala mag-ulipon sa mga Israelinhon, kundi ginhimo niya sila nga iya mga soldado, mga opisyales, pangulo nga mga soldado, mga kapitan sa karwahi, kag mga manugsakay sa kabayo.

23May 550 ka mga opisyales nga manugdumala sang pilit nga pagpaobra sa nagkalainlain nga mga bulohaton ni Solomon.

24Si Solomon nagpatampok sang duta sa nasidlangan nga bahin sang siudad, sa tapos ang iya asawa nga anak sang hari sang Ehipto nagsaylo halin sa Siudad ni David pakadto sa palasyo nga ginpatindog ni Solomon para sa iya.

25Tatlo ka beses kada tuig si Solomon nagadulot sing mga halad nga sinunog kag mga halad sa paghiambit sa altar nga iya ginpatindog para sa Ginoo. Nagsunog man sia sing insyenso sa Ginoo. Gani natapos niya ang pagpatindog sang Templo.

26Si Haring Solomon naghimo man sing madamo nga mga sakayan sa Eziongeber nga yara sa tupad sang Elat sa baybayon sang Dagat nga Mapula sa duta sang Edom.

27Si Haring Hiram nagpadala sing batid nga mga sakayanon halin sa iya mga sakayan sa pag-alagad upod sa mga tinawo ni Solomon.

28Nagbiyahe sila sa duta sang Ofir kag sa ila pagbalik kay Solomon nagdala sila sing malapit sa desi-sais ka tonelada nga bulawan.

← Chapter 8 Jump to: Chapter 10 →