Nehemiah 1

Ilonggo (Maayong Balita nga Biblia (2012))

Jump to: Chapter 2 →

1Amo ini ang maragtas sang mga hinimuan ni Nehemias nga anak ni Hakalias. Sa bulan sang Kislev sa ika-20 nga tuig nga si Artajerjes amo ang hari sang Persia, ako, si Nehemias yadto didto sa Susa, ang kapital nga siudad.

2Si Hanani nga isa sang akon mga utod nag-abot didto halin sa Juda upod sa isa ka grupo sang mga tawo, kag ginpamangkot ko sila nahanungod sang mga Judio nga nakabalik halin sa pagkabihag sa Babilonia kag nahanungod man sang Jerusalem.

3Ginsugiran nila ako nga ang mga nabilin nga buhi kag nakabalik sa ila duta nagaantos, kag ang mga dumoluong nga nagaestar malapit sa ila nagapakanubo sa ila. Ginsugiran man nila ako nga ang mga pader sang Jerusalem wala pa makaayo kag subong man ang mga pwerta guba gihapon halin sang pagkasunog sini.

4Sang pagkabati ko sini tanan nagpungko ako kag naghibi. Sa sulod sang pila ka adlaw naglalaw ako kag wala magkaon. Nangamuyo ako sa Dios.

5Siling ko, “O Ginoong Dios sang langit, gamhanan ikaw kag nagatahod kami sa imo. Matutom ka kag nagatuman sang imo kasugtanan sa ila nga nagahigugma sa imo kag nagahimo sang imo ginasugo.

6Tamda ako, O Ginoo, kag pamatii ang akon pangamuyo, samtang nagapangamuyo ako sa adlaw kag gab-i para sa imo mga alagad, ang mga tawo sang Israel. Nagatuad ako nga kami nga mga tawo sang Israel nakasala. Ang akon katigulangan kag ako nakasala.

7Naghimo kami sing kalautan batok sa imo kag wala kami maghimo sang imo ginsugo. Wala namon gintuman ang mga kasugoan nga imo ginhatag sa amon paagi kay Moises nga imo alagad.

8Dumdoma karon ang ginsiling mo kay Moises: ‘Mga tawo sang Israel, kon indi kamo magmatutom sa akon, palaptahon ko kamo sa iban nga mga pungsod.

9Pero karon kon magbalik kamo sa akon kag himuon ang ginasugo ko sa inyo, dalhon ko kamo pabalik sa lugar nga akon ginpili nga ako pagasimbahon, bisan pa nga kamo nagalalapta tubtob sa punta sang duta.’

10“O Ginoo, mga alagad mo ini, imo kaugalingon nga mga tawo. Ginluwas mo sila paagi sa imo daku nga gahom kag kusog.

11Pamatii karon ang akon pangamuyo kag ang mga pangamuyo sang iban mo nga mga alagad nga luyag magpasidungog sa imo. Hatagi ako sing kadalag-an karon nga adlaw, kag but-a nga ang hari magmaluloy-on sa akon.” Sa sadto nga mga inadlaw, ako ang gintugyanan sa pagserbe sang bino sa lamisa sang hari.

Jump to: Chapter 2 →