Nehemiah 7

Ilonggo (Maayong Balita nga Biblia (2012))

← Chapter 6 Jump to: Chapter 8 →

1Karon ang pader nakaayo na, ang mga sira sang mga pwerta natakod na, kag ang mga gwardya sang Templo, ang mga katapo sang mga manugkanta, kag ang mga Levita nahatagan na sang ila bulohaton.

2Nagbutang ako sing duha ka mga tawo nga amo ang magadumala sang siudad sang Jerusalem: ang akon utod nga si Hanani, kag si Hananias nga pangulo sang mga gwardya sa pamakod. Si Hananias masaligan kag mahinadlukon sa Dios labaw sa iban.

3Ginsingganan ko sila nga indi nila pagbuksan ang mga pwerta sang Jerusalem kon aga sa wala pa magtaas ang adlaw, kag sa pagsira kag sa pagtrangka sini sa wala pa magpauli ang mga gwardya sa hapon. Ginsingganan ko man sila nga magpili sila sing mga gwardya gikan sa mga tawo nga nagaestar sa Jerusalem kag ibutang sila sa ila mga balantayan kag ang iban sa pagpatrolya sang lugar sa palibot sang ila mga balay.

4Ang siudad sang Jerusalem daku, pero diutay ang mga pumoluyo kag indi pa gid madamo ang mga balay nga napatindog.

5Ang Dios nagpanghikot sa akon sa pagtipon sang mga tawo kag sang ila mga pangulo kag mga opisyales kag sa pag-usisa sang lista sang ila mga panimalay. Nakita ko ang lista sadtong una magbalik halin sa pagkabihag kag amo ini ang nasulat didto:

6Ang masunod amo ang mga pumoluyo sang probinsya sang Juda nga nagbalik halin sa pagkabihag, sa diin gindala sila nga mga bihag ni Haring Nabucodonosor sang Babilonia. Nagbalik sila sa Jerusalem kag Juda, ang tagsa sa ila sa iya kaugalingon nga banwa.

7Ang mga pangulo nga nagdala sa ila pabalik amo sanday Zorobabel, Jesua, Nehemias, Azarias, Raamias, Nahamani, Mardoqueo, Bilsan, Misperet, Bigvai, Nehum, kag Baana.

← Chapter 6 Jump to: Chapter 8 →