Nehemiah 6

Ilonggo (Maayong Balita nga Biblia (2012))

← Chapter 5 Jump to: Chapter 7 →

1Si Sanbalat, si Tobias, si Gesem, kag ang iban sang amon mga kaaway nakabati nga natapos na namon ang pagkaayo sang pader kag wala na sing bahin nga wala mag-angot bisan nga wala pa namon matakod ang mga sira sa mga pwerta.

2Gani si Sanbalat kag si Gesem nagpadala sa akon sing mensahe nga nagasiling nga magkitaay kami sa isa sang mga barangay sa Patag sang Ono. Isa ini ka daya nila sa paghalit sa akon.

3Nagpadala ako sing mga tawo sa pagsiling sa ila sini, “Nagahimo ako sang importante nga bulohaton kag indi ako makadulhog dira. Indi ko pag-untatan ang obra sa pagpakigkita man lang sa inyo.”

4Gintugnan nila ako sing apat ka beses, kag kada sabat ko amo man gihapon ang akon ginsiling.

5Dayon ginpadalhan ako ni Sanbalat sing ikalima nga mensahe, sa sini nga tion sa isa ka sulat nga wala masiradohi nga gindala sang isa sang iya mga suloguon.

6Amo ini ang ginasiling sang sulat: “Si Gesem nagasugid sa akon nga may sinugidsugid nga nagalapta sa kaingod nga mga katawhan nga ikaw kag ang mga Judio nagaplano sa pagrebelde kag amo ini ang kabangdanan nga ginakaayo ninyo ang pader. Nagasiling man sia nga ikaw nagaplano nga himuon mo ang imo kaugalingon nga hari,

7kag ikaw nagpadugi nga ang mga propeta magapahibalo sa Jerusalem nga ikaw ang hari sang Juda. Siguro gid nga ang Mahal nga Hari makahibalo nahanungod sini, gani maayo pa nga magkitaay kita sa pagpatugsiling sini.”

8Amo ini ang ginpadala ko sa iya nga sabat: “Wala sing kamatuoran ang ginasiling mo. Ikaw lang ang naghimu-himo sina.”

9Nagtinguha sila tanan sa pagpahog sa amon agod untaton namon ang obra. Nagpangamuyo ako, “Pero karon, O Dios, pabakura ako!”

10Sa sini nga tion si Semaya nga anak ni Delaya kag apo ni Mehetabel indi makahalin sa iya balay, gani ginbisitahan ko sia. Nagsiling sia sa akon, “Ikaw kag ako dapat maglakat sa Balaan nga Duog sang Templo sa pagpanago. Trangkahan ta ang mga pwertahan tungod kay magaabot sila sa pagpatay sa imo. Magaabot sila sa kagab-ihon sa pagpatay sa imo.”

11Nagsabat ako, “Indi ako ang sahi sang tawo nga magapalagyo kag magapanago. Nagahunahuna ka bala nga luwason ko ang akon kabuhi sa pagpanago sa Templo? Indi ko paghimuon ina.”

12Sang mabinagbinag ko ini natalupangdan ko nga ang Dios wala maghambal kay Semaya, kundi si Tobias kag si Sanbalat nagsuhol sa iya agod paandaman ako.

13Ginsuholan nila sia sa pagpahadlok sa akon agod magpakasala ako. Sa sini nga paagi maguba nila ang akon kadungganan kag mapakahuy-an ako.

14Nagpangamuyo ako, “O Dios, dumdoma ang ginhimo ni Tobias kag ni Sanbalat, kag siluti sila. Dumdoma ang babayi nga propeta nga si Noadias kag ang iban pa nga mga propeta nga nagtinguha sa pagpahog sa akon.”

15Sa tapos ang singkwentay dos ka adlaw nga pag-obra, ang bug-os nga pader natapos sa ika-25 nga adlaw sang bulan sang Elul.

16Sang pagkahibalo sini sang mga kaaway sa palibot nga mga pungsod natalupangdan nila nga nahuy-an sila, kay ang tagsatagsa nakahibalo nga ang hilikuton nahimo sa bulig sang Dios.

17Sa sulod sini nga panahon ang mga pangulo nga Judio kag si Tobias nagasulatay.

18Madamo nga mga tawo sa Juda nagaapin kay Tobias tungod kay sia ang umagad ni Secanias nga anak ni Ara. Labot pa, ang iya anak nga si Johanan nakapangasawa sang bata ni Mesullam nga anak ni Berequias.

19Ang mga tawo nagahambal sa atubang ko nahanungod sang maayo nga mga binuhatan ni Tobias, kag ginasugiran nila sia sang tanan nga ginpanghambal ko. Masunson nga ginapadalhan niya ako sing mga sulat sa pagpahog sa akon.

← Chapter 5 Jump to: Chapter 7 →