Nehemiah 4

Ilonggo (Maayong Balita nga Biblia (2012))

← Chapter 3 Jump to: Chapter 5 →

1Sang pagkabati ni Sanbalat nga kami nga mga Judio nagsugod sa pagpatindog liwat sang pader, naakig gid sia kag ginyaguta niya kami.

2Sa atubang sang iya mga kaupod kag sang mga hangaway sang Samaria nagsiling sia, “Ano bala ang ginahimo sining makaluluoy nga mga Judio? Kaayuhon bala nila ang siudad? Nagahunahuna bala sila nga matapos nila ang hilikuton sa isa ka adlaw paagi sa pagdulot sing mga halad? Magahimo bala sila sing mga bato nga inugpatindog gikan sa tinumpok nga ginub-an nga nagkalasunog?”

3Si Tobias nga Amonhon nagatindog didto sa tupad niya kag nagsiling man, “Ano nga sahi sang pader ang ila ginapatindog? Bisan gani ang mga singgalong makatumba sini!”

4Pero nagpangamuyo ako, “O Dios, pamatii kon daw ano ang pagyaguta nila sa amon! Patup-a sa ila kaugalingon nga ulo ang ila pagyaguta. Kuhai sila sang tanan nila nga mga pagkabutang, kag ipadala sila subong nga mga bihag sa iban nga pungsod.

5Indi pagpatawara ang kalautan nga ila ginahimo, kag indi pagkalimti ang ila mga sala, kay ginyaguta nila kami nga nagakaayo sang pader.”

6Gani nagpadayon kami sa pagkaayo sang pader, kag sa wala madugay nagtunga na ang kataason sini tungod kay ang mga tawo may handom sa pag-obra.

7Sang pagkabati ni Sanbalat kag ni Tobias, kag sang mga tawo sang Arabia, sang Amon, kag sang Asdod nga nagapadayon kami sa pagkaayo sang pader sang Jerusalem kag ang mga naguba nakaayo na, naakig gid sila.

8Gani nagplano sila sing tingob sa pagkadto kag pagsalakay sang Jerusalem agod magginamo,

9pero nagpangamuyo kami sa amon Dios kag nagbutang kami sing mga tawo sa pagbantay batok sa ila sa adlaw kag gab-i.

10Ang mga tawo sang Juda may ambahanon nga ila ginkanta: “Nagluya kami sa pagdala sang mga palas-anon, madamo nga mga ginub-an nga pagahakuton pa gwa. Ano ang pagkaayo namon sang pader sini nga adlaw?”

11Ang amon mga kaaway naghunahuna nga indi namon sila makita ukon indi namon mahibaluan ang nagakatabo tubtob sa pag-abot nila sa pagpamatay sa amon kag sa pagpauntat sang amon obra.

12Pero ang mga Judio nga nagaestar upod sa amon mga kaaway pirme lang nagapaandam sa amon sang mga plano sang amon mga kaaway batok sa amon.

13Gani ginhatagan ko ang mga tawo sing mga espada, mga bangkaw, kag mga pana kag ginbutang ko sila suno sa ila kabarangayan sa likod sang pader nga wala pa matapos.

14Nakita ko ang mga tawo nga ginhadlukan, gani nagsiling ako sa ila kag sa ila mga pangulo kag mga opisyales, “Indi kamo magkahadlok sa aton mga kaaway. Dumdoma ninyo kon daw ano kagamhanan kag makahaladlok ang Ginoo. Magpakig-away kamo para sa inyo mga pariente, mga kabataan, mga asawa, kag mga balay.”

15Ang amon mga kaaway nakabati nga nahibaluan namon kon ano ang ila ginaplano batok sa amon kag natalupangdan nila nga ang Dios nagguba sang ila mga plano. Dayon tanan kami nagbalik sa pag-obra sang pader.

16Sugod sadto, ang katunga sang akon mga tawo nag-obra kag ang katunga nagbantay nga may mga bangkaw, mga taming, mga pana, kag mga hapin nga salsalon sa dughan. Ang amon mga pangulo nag-ugyon sing bug-os sa pagsakdag sa mga tawo sang Juda

17nga nagakaayo sang pader. Bisan ang mga nagahakot sang mga ginagamit sa pader nagadala sa isa ka kamot sang mga gamit kag ang pihak nga kamot nagadala sing hinganiban,

18kag ang tanan nga nagaobra nagataklos sing espada. Ang tawo nga nagapatunog sing trumpeta sa pagpahibalo yara sa akon tupad.

19Ginsingganan ko ang mga tawo kag ang ila opisyales kag mga pangulo, “Ang bulohaton malapad kag nagalayuay kita.

20Kon mabatian ninyo ang pagpatunog sang trumpeta sa pagpahibalo sang katalagman, matipon kamo palibot sa akon. Ang aton Dios magapakig-away para sa aton.”

21Gani kada adlaw halin sa kaagahon tubtob makita na ang mga bituon sa kagab-ihon, ang katunga sa amon nag-obra sang pader, samtang ang katunga nagbantay nga may mga bangkaw.

22Sa sining mga tion ginsingganan ko ang tanan nga mga tawo nga nagadumala nga sila kag ang ila mga kabulig magpabilin sa Jerusalem kon gab-i, agod mabantayan namon ang siudad kon gab-i kag mag-obra kon adlaw.

23Ako, ang akon mga kaupod, ang akon mga suloguon, ang mga nagabantay sa akon wala na mag-uba sang amon mga bayu kon gab-i. Wala namon ginbulag ang amon mga hinganiban.

← Chapter 3 Jump to: Chapter 5 →