Nehemiah 3

Ilonggo (Maayong Balita nga Biblia (2012))

← Chapter 2 Jump to: Chapter 4 →

1Amo ini ang pagpakaayo sang pader sang siudad. Ang Pinakamataas nga Pari nga si Eliasib kag ang iya upod nga mga pari nagpakaayo sang Pwerta sang Karnero, ginhalad ini, kag gintakod ang mga sira. Ginhalad nila ang pader tubtob sa Tore sang Isa ka Gatos kag sa Tore ni Hananel.

2Ang mga tawo halin sa Jerico nagkaayo sang madason nga bahin. Si Zacur nga anak ni Imri nagkaayo sang madason nga bahin.

3Ang barangay ni Hasenaa nagkaayo sang Pwerta sang Isda. Ginpahamtang nila ang mga balayan kag ang mga sira sa lugar sini kag ginbutang nila ang mga siradura kag ang mga pintal sa pagtrangka sang pwerta.

4Si Meremot nga anak ni Urias kag apo ni Hakoz, nagkaayo sang madason nga bahin. Si Mesullam nga anak ni Berequias kag apo ni Mesezabel, nagkaayo sang madason nga bahin. Si Sadoc nga anak ni Baana nagkaayo sang madason nga bahin.

5Ang mga lalaki sang banwa sang Tekoa nagkaayo sang madason nga bahin, pero ang pangulo nga mga tawo sang banwa indi maghimo sang mabug-at nga bulohaton nga ginhatag sa ila sang ila mga manugdumala.

6Si Joiada nga anak ni Pasea kag si Mesullam nga anak ni Besodias nagkaayo sang Pwerta nga Daan. Ginpahamtang nila ang mga balayan kag ang mga sira sa lugar sini kag ginbutang nila ang mga siradura kag ang mga pintal sa pagtrangka sang pwerta.

7Si Melatias sang Gabaon, si Jadon sang Meronot, kag ang mga lalaki sang Gabaon kag Mispa nagkaayo sang madason nga bahin, tubtob sa ginaestaran sang gobernador sang Nakatundan-sang-Eufrates.

8Si Uziel nga anak ni Harhaya, nga manugsalsal sang bulawan, nagkaayo sang madason nga bahin. Si Hananias nga manughimo sang agwa nagkaayo sang madason nga bahin tubtob sa Masangkad nga Pader.

9Si Rafaias nga anak ni Hur, ang manuggahom sang katunga sang Distrito sang Jerusalem, nagkaayo sang madason nga bahin.

10Si Jedaya nga anak ni Harumaf nagkaayo sang madason nga bahin nga malapit sa iya balay. Si Hatus nga anak ni Hasabnias nagkaayo sang madason nga bahin.

11Si Malquias nga anak ni Harim, kag si Hasub nga anak ni Pahat-moab nagkaayo sang madason nga bahin kag sang Tore sang mga Horno.

12Si Sallum nga anak ni Hallohes, ang manuggahom sang katunga sang Distrito sang Jerusalem, nagkaayo sang madason nga bahin. Ang iya mga bata nga babayi nagbulig sa bulohaton.

13Si Hanun kag ang mga pumoluyo sang siudad sang Zanoa nagkaayo sang Pwerta sang Patag. Gintakod nila ang mga sira, ginbutang ang mga siradura kag ang mga pintal sa pagtrangka sang pwerta, kag ginkaayo nila ang pader nga 1,500 ka tapak ang kalabaon pakadto sa Pwerta sang Ipot.

14Si Malquias nga anak ni Recab, ang manuggahom sang Distrito sang Bet-haquirim, nagkaayo sang Pwerta sang Ipot. Gintakod niya ang mga sira, ginbutang ang mga siradura kag mga pintal sa pagtrangka sang pwerta.

15Si Sallum nga anak ni Colhose, ang manuggahom sang Distrito sang Mispa, nagkaayo sang Pwerta sang Tuboran. Gin-atupan niya ang pwerta, gintakod ang mga sira, kag ginbutang ang mga siradura kag mga pintal. Sa Punong sang Siloe ginpatindog niya ang pader sa tupad sang katamnan sang hari tubtob sa hagdanan nga nagadulhog halin sa Siudad ni David.

16Si Nehemias nga anak ni Azbuk, ang manuggahom sang katunga sang Distrito sang Betzur, nagkaayo sang madason nga bahin tubtob sa lulobngan ni David, sa punong, kag sa ilistaran sang mga soldado.

17Ang masunod nga mga Levita nagkaayo sang pila ka bahin sang pader: Si Rehum nga anak ni Bani nagkaayo sang madason nga bahin. Si Hasabias, ang manuggahom sang katunga sang Distrito sang Keila, nagkaayo sang madason nga bahin sa ngalan sang iya distrito.

18Si Bavai nga anak ni Henadad, ang manuggahom sang katunga sang Distrito sang Keila, nagkaayo sang madason nga bahin.

19Si Ezer nga anak ni Jesua, ang manuggahom sang Mispa, nagkaayo sang madason nga bahin, sa atubangan sang ginataguan sang mga hinganiban tubtob sa lugar sa diin ang pader nagliko.

20Si Baruc nga anak ni Zabai nagkaayo sang madason nga bahin tubtob sa alagyan pasulod sa balay ni Eliasib, ang Pinakamataas nga Pari.

21Si Meremot nga anak ni Urias kag apo ni Hakoz, nagkaayo sang madason nga bahin tubtob sa punta sang balay ni Eliasib.

22Ang masunod nga mga pari nagkaayo sang pila ka bahin sang pader: Ang mga pari sa palibot sang Jerusalem nagkaayo sang madason nga bahin.

23Si Benjamin kag si Hasub nagkaayo sang madason nga bahin nga yara sa atubangan sang ila mga balay. Si Azarias nga anak ni Maasias kag apo ni Ananias nagkaayo sang madason nga bahin nga yara sa atubangan sang iya balay.

24Si Binui nga anak ni Henadad nagkaayo sang madason nga bahin, halin sa balay ni Azarias tubtob sa pamusod sang pader.

25Si Palal nga anak ni Usai nagkaayo sang madason nga bahin halin sa pamusod sang pader kag sa tore sang naibabaw nga palasyo malapit sa pasiyuhan sang gwardya. Si Pedaya nga anak ni Paros nagkaayo sang madason nga bahin tubtob sa isa ka bahin sa sidlangan malapit sa Pwerta sang Tubig kag sa tore nga nagagwardya sang Templo. Malapit ini sa bahin sang siudad nga ginatawag Ofel, sa diin ang mga nagaobra sang Templo nagaestar.

27Ang mga lalaki sang Tekoa nagkaayo sang madason nga bahin, amo ini ang ikaduha nga ginkaayo nila, halin sa lugar nga yara sa atubangan sang daku nga tore nga nagagwardya sang Templo, tubtob sa pader malapit sa Ofel.

28Ang grupo sang mga pari amo ang nagkaayo sang madason nga bahin, pakadto sa aminhan halin sa Pwerta sang Kabayo, ang tagsatagsa sa ila amo ang nagkaayo sang pader sa atubangan sa ila kaugalingon nga balay.

29Si Sadoc nga anak ni Imer nagkaayo sang madason nga bahin sa atubangan sang iya balay. Si Semaya nga anak ni Secanias, ang manugbantay sang Pwerta sa Sidlangan nagkaayo sang madason nga bahin.

30Si Hananias nga anak ni Selemias, kag si Hanun nga ikan-om nga anak ni Salaf nagkaayo sang madason nga bahin, amo ini ang ikaduha nga bahin nga ginkaayo nila. Si Mesullam nga anak ni Berequias nagkaayo sang madason nga bahin sa atubangan sang iya balay.

31Si Malquias, isa ka manugsalsal sang bulawan, nagkaayo sang madason nga bahin tubtob sa balay nga ginaestaran sang mga manug-obra sang Templo kag sang mga negosyante, nga yara sa tupad sang Pwerta sang Mifkad pakadto sa Templo, malapit sa kwarto sa ibabaw sang naaminhan—nasidlangan nga pamusod sang pader.

32Ang mga manugsalsal sang bulawan kag ang mga negosyante nagkaayo sang katapusan nga bahin halin sa kwarto sa pamusod tubtob sa Pwerta sang Karnero.

← Chapter 2 Jump to: Chapter 4 →