Nehemiah 2

Ilonggo (Maayong Balita nga Biblia (2012))

← Chapter 1 Jump to: Chapter 3 →

1Isa ka adlaw sang makaligad ang apat ka bulan, sang nagakaon ang hari nga si Artajerjes, gindala ko sa iya ang bino. Wala gid sia makakita nga nagkasubo ako sang una,

2gani ginpamangkot niya ako, “Ngaa nagakasubo ka? Wala ka man nagamasakit, siguro may ginapangasub-an ka.” Hinadlukan gid ako

3kag nagsabat, “Kabay nga ang Mahal nga Hari magkabuhi sa gihapon! Ano abi nga indi ako magkasubo nga ang siudad sa diin ang akon mga katigulangan ginlubong guba, kag ang mga pwerta sini nagkalasunog?”

4Ang hari nagpamangkot, “Ano karon ang luyag mo?” Nangamuyo ako sa Dios sang langit,

5kag dayon ginsugiran ko ang hari, “Mahal nga Hari, kon nahamuot ka sa akon kag ihatag mo ang akon ginapangabay, tugoti ako nga magkadto sa duta sang Juda, sa siudad sa diin ang akon mga katigulangan ginlubong, agod mapatindog ko liwat ang siudad.”

6Ang hari kaupod sa rayna nga nagapungko sa tupad niya, nagpamangkot sa akon kon daw ano ako kadugay didto, kag kon san-o ako magabalik. Ginsugiran ko sia kag nagsugot sia sa akon ginpangabay.

7Dayon nagpangabay ako sa hari nga kon mahimo hatagan niya ako sing mga sulat para sa mga gobernador sang Probinsya sang Nakatundan-sang-Eufrates, nga nagamando sa ila nga paagyon ako pakadto sa Juda.

8Nagpangayo man ako sing sulat para kay Asaf, ang nagabantay sang kakahuyan sang hari, nga nagamando sa paghatag sa akon sing mga tablon para sa mga pwerta sang pamakod sang Templo, para sa mga pader sang siudad, kag para sa balay nga akon estaran. Ang hari naghatag sang tanan nga ginpangayo ko tungod kay ginaupdan ako sang Dios.

9Ginpaupdan ako sang hari sing mga opisyales sang mga hangaway kag mga soldado nga nagasakay sa kabayo, kag naglakat ako pakadto sa Nakatundan-sang-Eufrates. Ginhatag ko sa mga gobernador didto ang mga sulat sang hari.

10Pero si Sanbalat nga taga-banwa sang Bet-horon, kag si Tobias nga isa ka opisyal nga Amonhon, nakabati nga may nag-abot nga tawo sa pagtinguha para sa kaayuhan sang mga tawo sang Israel, kag naakig gid sila.

11Nagkadto ako sa Jerusalem, kag nagtener didto sing tatlo ka adlaw,

12pero wala ko gid ginsugiri bisan sin-o kon ano ang ginbutang sang Dios sa akon tagipusoon nga pagahimuon para sa Jerusalem. Dayon sang tungang gab-i nagbangon ako kag naglakat dala ko ang pila sang akon mga kaupdanan. Ang asno nga akon ginsakyan amo lamang ang hayop nga gindala namon.

13Gab-i pa sang paggwa ko sa siudad. Nag-agi ako sa Pwerta sang Patag sa nakatundan kag nagpadulong sa nabagatnan kag nagpakadto sa Tuboran sang Dragon tubtob sa Pwerta sang Ipot. Gin-usisa namon ang naguba nga mga pader sang siudad kag ang mga pwerta nga nagkalasunog.

14Dayon nagpaaminhan ako kag nag-agi sa Pwerta sang Tuboran kag sa Punong sang Hari. Ang asno nga akon ginasakyan wala na sing may maagyan sa mga ginub-an,

15gani nagdulhog ako sa Patag sang Kidron kag nagpadayon sa pag-usisa sang pader. Dayon nagbalik ako sa akon gin-agyan kag nagbalik sa siudad paagi sa Pwerta sang Patag.

16Wala gid sing may nakahibalo nga mga opisyales sang banwa kon diin ako magkadto kag kon ano ang ginahimo ko. Wala pa gid ako magsugid bisan ano sa pareho ko nga mga Judio—sa mga pari, sa mga pangulo, sa mga opisyales, ukon sa bisan kay sin-o nga magapakigbahin sa hilikuton.

17Pero karon nagsiling ako sa ila, “Nakita ninyo ang aton palaligban, tungod kay ang Jerusalem guba kag ang mga pwerta sini nagkalasunog! Patindugon ta liwat ang mga pader sang siudad agod indi na kita mahuya.”

18Kag ginsugiran ko sila kon paano ang Dios nag-upod kag nagbulig sa akon, kag kon ano ang ginsiling sang hari sa akon. Nagsabat sila, “Sigi, sugoran ta ang pagpatindog sini liwat!” Kag naghanda sila sa pagsugod sang obra.

19Pero sang pagkabati ni Sanbalat, ni Tobias, kag ni Gesem nga Arabiahanon sang ginaplano namon nga pagahimuon, ginkadlawan kag ginyaguta nila kami. Nagsiling sila, “Ano ang ginahimo ninyo? Magarebelde bala kamo batok sa hari?”

20Nagsabat ako, “Ang Dios sang langit magapauswag sa amon. Mga alagad niya kami, kag magasugod kami sa pagpatindog. Pero kamo wala sing bahin, ukon kinamatarong, ukon handumanan sa Jerusalem.”

← Chapter 1 Jump to: Chapter 3 →